កិច្ចប្រជុំពិនិត្យការងារឆ្លងច្បាប់ស្ដីពីចរាចរណ៍ផ្លូវគោក និងពិធីសម្ពោធសួនសុវត្ថិភាព ទីស្ដីការក្រសួង៖នាថ្ងៃអង្គារ ទី២៤ ខែកុម្ភៈ ឆ្នាំ២០២៥ លោកជំទាវ មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋាន គ.ស.ច.គ បានអញ្ជើញដឹកនាំកិច្ចប្រជុំពិនិត្យការងារឆ្លងច្បាប់ស្ដីពីចរាចរណ៍ផ្លូវគោក និងពិធីសម្ពោធសួនសុវត្ថិភាព ដោយមានការអញ្ជើញចូលរួមពីឯកឧត្តម ហ៊ឹម យ៉ាន រដ្ឋលេខាធិការ ក្រសួងមហាផ្ទៃ និងជាអគ្គលេខាធិការរងនៃអគ្គលេខាធិការដ្ឋាន គ.ស.ច.គ. ថ្នាក់ដឹកនាំតំណាងអគ្គស្នងការដ្ឋាននគរបាលជាតិនៃក្រសួងមហាផ្ទៃ តំណាងអគ្គនាយកដ្ឋានពាក់ព័ន្ធក្រោមឱវាទក្រសួង សមាជិក សមាជិកា របស់អគ្គលេខាធិការដ្ឋាន គ.ស.ច.គ. និងមន្ត្រីពាក់ព័ន្ធជាច្រើនរូប។ កិច្ចប្រជុំនេះរៀបចំឡើងដោយផ្ដោតលើរបៀបវារៈសំខាន់ៗចំនួន៣ រួមមាន៖ ១)កិច្ចពិភាក្សាអំពីរបៀបវារៈនៃកិច្ចប្រជុំឆ្លងលើសេចក្តីព្រាងច្បាប់ស្តីពីចរាចណ៍ផ្លូវគោកថ្មី ២)កិច្ចពិភាក្សាអំពីការរៀបចំកម្មវិធីទិវាអន្តរជាតិរំលឹកដល់ជនរងគ្រោះ ដោយគ្រោះថ្នាក់ចរាចរណ៍ផ្លូវគោកលើកទី២០ និងពិធីសម្ពោធដាក់ឱ្យប្រើប្រាស់សួនសុវត្ថិភាពចរាចរណ៍ផ្លូវគោក និង ៣)កិច្ចពិភាក្សាបញ្ហាផ្សេងៗ៕