មន្ត្រីជំនាញនៃការិយាល័យទីចាត់ការ និងផែនការវិនិយោគខេត្តក្រចេះ សហការជាមួយរដ្ឋបាលស្រុកចិត្របុរី និងប្រធានគណៈកម្មការលទ្ធកម្មឃុំដារ និងជាប្រធានគម្រោង នាថ្ងៃទី៦ ខែកុម្ភៈ ឆ្នាំ២០២៦នេះ បានចុះសិក្សាផ្លូវចំនួន ២ខ្សែ ប្រវែង ២,១១២ម៉ែត្រ នៅភូមិខ្នងពស់ ឃុំដារ ស្រុកចិត្របុរី ខេត្តក្រចេះ។លោក ឈាង វត មេឃុំដារ បានបញ្ជាក់ថា ផ្លូវនេះ ជាគម្រោងអភិវឌ្ឍន៍ឆ្នាំ២០២៦ ប្រើប្រាស់ថវិកាឃុំ អភិវឌ្ឍន៍ពីផ្លូវក្រួសធម្មជាតិ ទៅជាផ្លូវបេតុងអាមេ ទទឹង ៥ម៉ែត្រ កម្រាស់១,៥តឹក សម្រាប់ឆ្នាំ២០២៦នេះ ដើម្បលើកកម្ពស់គុណភាពសោភ័ណភាព ផ្ដល់ភាពងាយស្រួលដល់ពលរដ្ឋដឹកជញ្ជូនកសិផល និងធ្វើដំណើរនៅក្នុងមូលដ្ឋាន។ជាមួយគ្នានោះ រដ្ឋបាលឃុំដារ បានជួសជុលផ្លូវលំក្រួសធម្មជាតិតភ្ជាប់ពីភូមិតាងួន ទៅភូមិម្រ៉ើម មួយខ្សែ ប្រវែង ១,៦០០ម៉ែត្រ ពីចំណុចស្ពានអូរអណ្តូង រហូតដល់ហួសស្ពានអូរទទារ ដោយនៅខ្វះពីអង់តែនទៅជាប់ព្រំប្រទល់ភូមិម្រ៉ើមប្រវែង ១០០០ម៉ែត្រ ទៀតតែប៉ុណ្ណោះ៕