ភ្នំពេញ៖ ពីឆ្នាំ២០២១-២០២៥ ក្រសួងសាធារណការ និងដឹកជញ្ជូន បានចុះបញ្ជីយានយន្តដើរដោយថាមពលអគ្គិសនី បានចំនួន ១២ ៩៦២គ្រឿង។ បើតាមទិន្នន័យរបស់ក្រសួងសាធារណការ ក្នុងឆ្នាំ២០២៥កន្លងទៅ ការចុះបញ្ជីយានយន្តអគ្គិសនី មានការកើនឡើងដល់ ៧ ៩៧១គ្រឿង។រយៈពេលប៉ុន្មានឆ្នាំចុងក្រោយនេះ ប្រជាពលរដ្ឋជាច្រើន បានងាកទៅប្រើប្រាស់យានយន្តដើរដោយថាមពលអគ្គិសនី ដែលជួយសន្សំសំចៃថវិកា និងកាត់បន្ថយផលប៉ះពាល់ដល់បរិស្ថាន។ របាយការណ៍សន្និបាតបូកសរុបការងារឆ្នាំ២០២៥របស់ក្រសួងសាធារណការ បានបង្ហាញថា ក្នុងរយៈពេល៥ឆ្នាំ ក្រសួងបានចុះបញ្ជីយានយន្តអគ្គិសនី បានចំនួន ១២ ៩៦២គ្រឿង។ បើតាមរបាយការណ៍ខាងលើ នៅឆ្នាំ២០២១ ការចុះបញ្ជីយានយន្តអគ្គិសនី មានត្រឹម ៦៣គ្រឿងប៉ុណ្ណោះ។ រីឯឆ្នាំ២០២២ មានចំនួន ៦៦៣គ្រឿង, ឆ្នាំ២០២៣ មានចំនួន ៧៥៧គ្រឿង, ឆ្នាំ២០២៤ មានចំនួន ៣ ៥០៨គ្រឿង និងឆ្នាំ២០២៥ កើនដល់ ៧ ៩៧១គ្រឿង។ សូមបញ្ជាក់ថា កាលពីឆ្នាំ២០២៤ រាជរដ្ឋាភិបាលកម្ពុជា បានដាក់ចេញគោលនយោបាយជាតិ ស្ដីពីការអភិវឌ្ឍវិស័យយានយន្តអគ្គិសនី ២០២៤-២០៣០។ គោលនយោបាយនេះ នឹងជំរុញបង្កើនការប្រើប្រាស់យានយន្តអគ្គិសនី ដែលបានកំណត់ការប្រើប្រាស់ ទោចក្រយានយន្តអគ្គិសនីឱ្យបាន៧០% និងរថយន្តអគ្គិសនីឱ្យបាន៤០% នៅត្រឹមឆ្នាំ២០៥០ ក្នុងគោលដៅសម្រេចបានអព្យាក្រឹតកាបូន៕