ពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់រដ្ឋបាលខេត្តមណ្ឌលគិរី ក្រោមអធិបតីភាព ឯកឧត្តម ឈួន វិន រដ្ឋលេខាធិការ ប្រធានក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី មណ្ឌលគិរី៖ នារសៀលថ្ងៃព្រហស្បតិ៍ ទី២២ ខែមករា ឆ្នាំ២០២៦ ឯកឧត្តម ឈួន វិន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី អញ្ជើញជាអធិបតីក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់រដ្ឋបាលខេត្តមណ្ឌលគិរី ដោយមានវត្តមានចូលរួមពីសំណាក់ ឯកឧត្តម សរ សិទ្ធិ រដ្ឋលេខាធិការ ក្រសួងមហាផ្ទៃ ឯកឧត្តម ម៉ែន ង៉ុយ ប្រធានក្រុមប្រឹក្សាភិបាលខេត្តមណ្ឌលគិរី ឯកឧត្តម ថង សាវុន អភិបាលនៃគណៈអភិបាលខេត្តមណ្ឌលគិរី ព្រមទាំងឯកឧត្តម លោកជំទាវ លោក លោកស្រី ក្រុមការងារថ្នាក់ជាតិចុះមូលដ្ឋានខេត្តមណ្ឌលគិរី ថ្នាក់ដឹកនាំ មន្ត្រីពាក់ព័ន្ធពីគ្រប់អង្គភាពក្នុងខេត្ត និងភ្ញៀវកិត្តិយសជាច្រើនរូបផងដែរ។ ថ្លែងក្នុងឱកាសបិទសន្និបាទនេះ ឯកឧត្តមលេខាធិការ ប្រធានក្រុមការងារ បានលើកឡើងថា អង្គសន្និបាត ដែលតែងតែបានរៀបចំរៀងរាល់ឆ្នាំ ត្រូវបានចាត់ទុកជាព្រឹត្តិការណ៍មួយ ដែលគ្រប់តួអង្គពាក់ព័ន្ធទាំងអស់បានមកជួបជុំគ្នា និងរួមគ្នាធ្វើការពិនិត្យ វាយតម្លៃលើសមិទ្ធផលលើគ្រប់វិស័យដែលរដ្ឋបាលខេត្តមណ្ឌលគិរីសម្រេចបាន រួមទាំងការវិភាគលើបញ្ហាប្រឈម ពិនិត្យលទ្ធភាពរកដំណោះស្រាយ និងកាលានុវត្តភាព ព្រមទាំងបានដាក់ចេញនូវទិសដៅការងារសម្រាប់ឆ្នាំបន្ទាប់ ប្រកបដោយភាពគ្រប់ជ្រុងជ្រោយ និងមានប្រសិទ្ធភាពខ្ពស់។ ក្នុងនាមរាជរដ្ឋាភិបាលកម្ពុជា ក្នុងនាមសម្តេចធិបតី នាយករដ្ឋមន្ត្រី និងក្នុងនាមឯកឧត្តមផ្ទាល់ បានសម្តែងនូវការកោតសរសើរ និងវាយតម្លៃខ្ពស់ចំពោះថ្នាក់ដឹកនាំ មន្ត្រីរាជការ និងកងកម្លាំងប្រដាប់អាវុធគ្រប់លំដាប់ ថ្នាក់នៃខេត្តមណ្ឌលគិរី ដែលបានលះបង់កម្លាំងកាយចិត្ត ដោយមិនខ្លាចនឿយហត់នៅក្នុងកាតព្វកិច្ច បម្រើជាតិ មាតុភូមិ និងការខិតខំប្រឹងប្រែងបំពេញតួនាទី ភារកិច្ចរបស់ខ្លួនបានល្អប្រសើរ ជាពិសេស ខិតខំជំនះនូវឧបសគ្គនិងការលំបាក រហូតសម្រេចបាននូវសមិទ្ធផលជាច្រើន ដូចមានឆ្លុះបញ្ចាំងនៅក្នុងរបាយការណ៍បូកសរុបលទ្ធផលការងារប្រចាំឆ្នាំ២០២៥ និងទិសដៅការងារឆ្នាំ២០២៦ របស់រដ្ឋបាលខេត្តមណ្ឌលគិរី។ ឯកឧត្តមរដ្ឋលេខាធិការ បានបន្ថែមថា ទោះបីកម្ពុជាបានប្រឈមដោយផ្ទាល់នឹងវិបត្តិនៃការឈ្លានពាន ដោយកម្លាំងប្រដាប់អាវុធពីសំណាក់កងទ័ពថៃ ចាប់ពីខែកក្កដា ឆ្នាំ២០២៥ ក៏ដោយ រាជរដ្ឋាភិបាលបានខិតខំប្រឹងប្រែងដោះស្រាយយ៉ាងយកចិត្ត ទុកដាក់និងហ្មត់ចត់បំផុត ដោយដៃម្ខាងវាយទប់ទល់ និងការពារឱ្យបានជាដាច់ខាតនូវបូរណភាពទឹកដី និងអធិបតេយ្យជាតិពីការឈ្លានពានរបស់ខ្មាំងសត្រូវ និងដៃម្ខាងរក្សាឱ្យបាននូវស្ថិរភាពនយោបាយ សន្តិសុខ សណ្តាប់ធ្នាប់សាធារណៈ និងប្រក្រតីភាពសេដ្ឋកិច្ច សង្គម ពាណិជ្ជកម្ម និងការវិនិយោគ ជាមួយនឹងការខិតខំតស៊ូតាមផ្លូវការទូត ដោយផ្អែកលើច្បាប់អន្តរជាតិ និងស្វះស្វែងរកកិច្ចអន្តរាគមន៍ពី អាស៊ាន សហគមន៍អន្តរជាតិ និងប្រទេសមហាអំណាច នៅក្នុងការបញ្ចប់សង្គ្រាមឈ្លានពានពីកងទ័ពថៃ ដើម្បីការពារការបាត់បង់អាយុជីវិត និងសេចក្តីសុខសាន្តរបស់ប្រជាជន។ ទន្ទឹមនេះ ឯកឧត្តមប្រធានក្រុមការងារ បានលើកឡើងថា សមិទ្ធផលដែលក្រសួងស្ថាប័ន ក៏ដូចជារដ្ឋបាលគ្រប់ថ្នាក់សម្រេចបានកន្លងមកនេះ គឺបានឆ្លុះបញ្ចាំងពីកិច្ចខិតខំប្រឹងប្រែងក្នុងការចូលរួមអនុវត្តយ៉ាងសកម្មនូវកម្មវិធីនយោបាយ និងយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលសម្រាប់នីតិកាលទី៧ នៃរដ្ឋសភា ដើម្បីជំរុញល្បឿននៃការអភិវឌ្ឍប្រទេសជាតិឱ្យឈានឆ្ពោះទៅសម្រេចបាននូវចក្ខុវិស័យកម្ពុជា ឆ្នាំ២០៣០ និងឆ្នាំ២០៥០។ ពាក់ព័ន្ធនឹងការចូលរួមទទួលខុសត្រូវរបស់រដ្ឋបាលថ្នាក់ក្រោមជាតិ ឯកឧត្តមប្រធាន បានផ្តល់អនុសាសន៍ណែនាំលើកិច្ចការសំខាន់ៗមួយចំនួនរួមមាន៖ (១) ការពង្រឹងសន្តិភាព និងស្ថិរភាពនយោបាយ (២) ការថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម (៣) ការគ្រប់គ្រងរដ្ឋបាលដែនដី (៤) ការផ្តល់សេវាសាធារណៈជូនប្រជាពលរដ្ឋ (៥) ការអភិវឌ្ឍមូលដ្ឋាន (៦) ការគ្រប់គ្រង និងការអភិវឌ្ឍតំបន់ព្រំដែន (៧) ការចូលរួមអនុវត្តកម្មវិធីគោលនយោបាយអាទិភាពរបស់រាជរដ្ឋាភិបាល និង (៨) ការពង្រឹងរបៀបរបបការងារ៕