កិច្ចប្រជុំពិនិត្យលើការអនុវត្តផែនការសកម្មភាពអាទិភាពសំខាន់ៗរបស់អគ្គនាយកដ្ឋានរដ្ឋបាល និងហិរញ្ញវត្ថុ សម្រាប់ឆ្នាំ២០២៦ ទីស្តីការក្រសួង៖ នាព្រឹកថ្ងៃពុធ ទី១៤ ខែមករា ឆ្នាំ២០២៦ ឯកឧត្តម កែន រដ្ឋា អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុ បានដឹកនាំកិច្ចប្រជុំផ្ទៃក្នុង ដោយមានការចូលរួមពី លោក លោកស្រីជាថ្នាក់ដឹកនាំអគ្គនាយកដ្ឋាន និងមន្រ្តីពាក់ព័ន្ធនៃនាយកដ្ឋានក្រោមឱវាទ ដើម្បីពិនិត្យលើផែនការសកម្មភាពអាទិភាពសំខាន់ៗ ដែលបានដាក់ចេញសម្រាប់ការអនុវត្តនៅក្នុងឆ្នាំ២០២៦នេះ។ តាមរយៈផែនការសកម្មភាពអាទិភាពសម្រាប់អនុវត្តនៅក្នុងឆ្នាំ២០២៦ អគ្គនាយកដ្ឋានរដ្ឋបាល និងហិរញ្ញវត្ថុ បានផ្តោតការអនុវត្តលើកិច្ចការពាក់ព័ន្ធរួមមាន៖ ការងារក្នុងក្របខ័ណ្ឌនៃការពង្រឹងរដ្ឋបាលផ្ទៃក្នុងក្រសួង, ការងារក្នុងក្របខ័ណ្ឌនៃកិច្ចការកែទម្រង់រដ្ឋបាលសាធារណៈ និងការពង្រឹងប្រសិទ្ធភាពស្ថាប័ន និងសមត្ថភាពមន្រ្តី, ការងារក្នុងក្របខ័ណ្ឌកិច្ចការហិរញ្ញវត្ថុ និងការកែទម្រង់ហិរញ្ញវត្ថុសាធារណៈរបស់ក្រសួង, ការងារក្នុងក្របខ័ណ្ឌនៃកិច្ចសហប្រតិបត្តិការអន្តរជាតិសំខាន់ៗ, ការងារក្នុងក្របខ័ណ្ឌច្បាប់ និងការងារគាំទ្រដល់សកម្មភាពការងារស្នូលនៅក្នុងវិស័យសាធារណការ និងដឹកជញ្ជូន។ ថ្លែងនៅក្នុងកិច្ចប្រជុំ ឯកឧត្តមអគ្គនាយក បានកោតសរសើរដល់ លោក លោកស្រីជាថ្នាក់ដឹកនាំអគ្គនាយកដ្ឋាន និងមន្រ្តីរាជការក្រោមឱវាទទាំងអស់ ដែលបានខិតខំបំពេញការងារយ៉ាងសកម្មភាព និងសម្រេចបានលទ្ធផលការងារល្អប្រសើរនៅក្នុងឆ្នាំ២០២៥កន្លងទៅ។ ជាមួយគ្នានេះ ឯកឧត្តមអគ្គនាយក ក៏បានជំរុញលើកទឹកចិត្តដល់មន្រ្តីរាជការក្រោមឱវាទ សូមបន្តកិច្ចខិតខំប្រឹងប្រែងបន្ថែមទៀត ដើម្បីសម្រេចនូវទិសដៅការងារ និងកិច្ចការអាទិភាពសំខាន់ៗដែលបានដាក់ចេញសម្រាប់អនុវត្តនៅក្នុងឆ្នាំ២០២៦នេះ៕