នៅថ្ងៃទី ១៤ ខែធ្នូ ឆ្នាំ ២០២៥ ក្រសួងសារធារណការ និង ដឹកជញ្ជូន បានជូនដំណឹងឱ្យបានដឹងថា ក្រសួងបានសម្របសម្រួលជាមួយក្រុមហ៊ុនផ្លូវល្បឿនលឿន ភ្នំពេញ-ក្រុងព្រះសីហនុ ដោយក្នុងន័យមនុស្សធម៌ ក្រុមហ៊ុនបានឯកភាពមិនយកកម្រៃសេវាចំពោះរថយន្ត ដឹកជញ្ជូនគ្រឿងឧបភោគបរិភោគ និង សម្ភារប្រើប្រាស់ចាំបាច់សម្រាប់ឧបត្ថម្ភតាមតំបន់ភៀសសឹកនានា។តាមការបង្ហោះរបស់ក្រសួងបានឱ្យដឹងថា ការសម្រេចបែបនេះ ដើម្បីសម្រួលបន្ទុកចំណាយ និង ការធ្វើដំណើរប្រកបដោយសុវត្ថិភាព ងាយស្រួល និង រហ័ស ចំពោះស្ថាប័នរដ្ឋ ឯកជន អង្គការមហាជន និង សប្បុរសជនទូទៅទាំងអស់ ដែលមានបំណងដឹកជញ្ជូនគ្រឿងឧបភោគបរិភោគ និង សម្ភារប្រើប្រាស់ចាំបាច់ យកទៅផ្តល់ជូនពលរដ្ឋភៀសសឹកនៅខេត្តកោះកុង និង ត្រូវធ្វើដំណើរតាមផ្លូវល្បឿនលឿនភ្នំពេញ-ក្រុងព្រះសីហនុ។ទន្ទឹមនេះ ដើម្បីជួយសម្រួលដល់ការដឹកជញ្ជូនទាំងអស់នេះ សូម ក្រសួង ស្ថាប័នរដ្ឋ និង ឯកជន អង្គការមហាជន និង សប្បុរសជនទូទៅ ទំនាក់ទំនងទៅក្រសួងសាធារណការ និង ដឹកជញ្ជូន តាមរយៈលេខទូរស័ព្ទ ០១២ ៩៧២ ០២៧ ដើម្បីក្រសួងសម្របសម្រួលជាមួយក្រុមហ៊ុនផ្លូវល្បឿនលឿន ខណៈការលើកលែងកម្រៃសេវាប្រើប្រាស់ផ្លូវល្បឿនលឿននេះ អនុវត្តចាប់ពីថ្ងៃជូនដំណឹងនេះតទៅ៕