វគ្គបណ្តុះបណ្តាល ស្តីពីការវាយតម្លៃលើផលប៉ះពាល់នៃលិខិតបទដ្ឋានគតិយុត្ត ជូនដល់ក្រុមការងារវាយតម្លៃលើផលប៉ះពាល់នៃលិខិតបទដ្ឋានគតិយុត្តរបស់ក្រសួងសាធារណការ និងដឹកជញ្ជូន រាជធានីភ្នំពេញ៖ នាថ្ងៃពុធ ទី៩ ខែធ្នូ ឆ្នាំ២០២៥ ឯកឧត្តម ប៊ុន សុផាត អនុរដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញជាសហធិបតីជាមួយ ឯកឧត្តម ប៉ិច សុខា អនុរដ្ឋលេខាធិការ ទីស្តីការគណៈរដ្ឋមន្ត្រី និងជាអគ្គលេខាធិការ នៃក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ នៃទីស្តីការគណៈរដ្ឋមន្ត្រី និង លោក Chris Willamson ប្រធានផ្នែកនយោបាយ សេដ្ឋកិច្ច សុខភាព និងអភិវឌ្ឍ នៃស្ថានទូតអង់គ្លេសប្រចាំកម្ពុជា ក្នុងពិធីបើកវគ្គបណ្តុះបណ្តាល ស្តីពីការវាយតម្លៃលើផលប៉ះពាល់នៃលិខិតបទដ្ឋានគតិយុត្ត ជូនដល់ក្រុមការងារវាយតម្លៃលើផលប៉ះពាល់នៃលិខិតបទដ្ឋានគតិយុត្តរបស់ក្រសួងសាធារណការ និងដឹកជញ្ជូន ដោយមានការចូលរួមពីឯកឧត្តម លោកជំទាវជាអនុប្រធាន និងសមាជិកក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ តំណាងក្រុមប្រឹក្សាអ្នកច្បាប់ នៃទីស្ដីការគណៈរដ្ឋមន្ត្រី។ វគ្គបណ្តុះបណ្តាលនេះ ត្រូវបានរៀបចំឡើងក្នុងគោលបំណងដើម្បីពង្រឹងសមត្ថភាពរបស់ក្រុមការងារ និងធានាប្រសិទ្ធភាព ប្រសិទ្ធផល និងនិរន្តរភាពក្នុងការរៀបចំរបាយការណ៍វាយតម្លៃលើផលប៉ះពាល់នៃលិខិតបទដ្ឋានគតិយុត្តរបស់ក្រសួងសាធារណការ និងដឹកជញ្ជូន តាមរយៈការណែនាំអំពីគោលការណ៍ ការអនុវត្តការរៀបចំរបាយការណ៍ និងករណីសិក្សាជាក់ស្តែងពាក់ព័ន្ធនឹងវិស័យសាធារណការ ដឹកជញ្ជូន និងឡូជីស្ទីក។ ការប្រើប្រាស់វិធីសាស្ត្រវាយតម្លៃលើផលប៉ះពាល់នៃច្បាប់ បទប្បញ្ញត្តិ ឬលិខិតបទដ្ឋានគតិយុត្ត គឺដើម្បីវាយតម្លៃលើសំណើបញ្ញត្តិកម្ម ក្នុងគោលបំណងជំរុញឱ្យភាគីពាក់ព័ន្ធ ជាពិសេសបុគ្គលដែលរៀបចំបញ្ញត្តិកម្ម មានការសម្រេចចិត្តកាន់តែប្រសើរ។ វិធីសាស្ត្រ RIA ត្រូវបានយកមកប្រើប្រាស់ជាឧបករណ៍សម្រាប់ធ្វើការវាយតម្លៃជាប្រព័ន្ធនូវផលប៉ះពាល់នៃសំណើបទប្បញ្ញត្តិ ឬគោលនយោបាយមួយ ដែលនៅក្នុងនោះរួមមានផលប៉ះពាល់ដល់សហគមន៍ សង្គម សេដ្ឋកិច្ច វប្បធម៌ និងបរិស្ថាន ព្រមទាំងបន្ទុកចំណាយ និងការប្រកួតប្រជែងរបស់ធុរកិច្ច៕