ក្រសួងសាធារណការ និងដឹកជញ្ជូន បានប្រកាសយ៉ាងច្បាស់អំពីសារៈសំខាន់ជាយុទ្ធសាស្ត្រនៃផ្លូវជាតិលេខ ៧១C ។ ក្រសួងបានចាត់ទុកផ្លូវមួយខ្សែនេះថាជា «សរសៃឈាមសេដ្ឋកិច្ចជាតិដ៏មានសក្តា នុពល» មិនអាចខ្វះបាន ក្នុងការជួយទ្រទ្រង់ និងជំរុញកំណើនសេដ្ឋកិច្ចកម្ពុជាឱ្យកាន់តែរឹងមាំ ។ជាក់ស្តែង ក្រសួងសាធារណការ និងដឹកជញ្ជូន បានប្រកាសនាថ្ងៃទី២៧ ខែវិច្ឆិកា ឆ្នាំ២០២៥នេះថា ៖ ផ្លូវជាតិលេខ៧១C ជាសរសៃឈាមសេដ្ឋកិច្ចជាតិដ៏មានសក្តានុពលរបស់កម្ពុជា ជួយសម្រួលដល់ការតភ្ជាប់ទំនាក់ទំនងគមនាគមន៍ ធ្វើសមាហរណកម្មតភ្ជាប់ផ្ទៃក្នុងប្រទេស និងជាមួយតំបន់ រួមចំណែកក្នុងការលើកកម្ពស់ប្រសិទ្ធភាពនៃការដោះដូរពាណិជ្ជកម្ម វិនិយោគ ដំណាំកសិផល កសិ-ឧស្សាហកម្ម និងទេសចរណ៍បានឆាប់រហ័ស និងចំណាយតិច ជាពិសេសជាមួយប្រទេសជិតខាង ។សូមជម្រាបជូនថា ផ្លូវជាតិលេខ ៧១C មានប្រវែង ១១៤,៦២គីឡូម៉ែត្រ ចាប់ពីផ្លូវជាតិលេខ៧ ចំណុច PK150+700 ក្នុងខេត្តត្បូងឃ្មុំ រហូតទៅដល់ផ្លូវជាតិលេខ៧១ ចំណុច PK30+400 ក្នុងខេត្តកំពង់ចាម ត្រូវបានបើកសម្ពោធដាក់ឱ្យប្រើប្រាស់ជាផ្លូវការនៅថ្ងៃទី ១២ ខែមេសា ឆ្នាំ ២០២៥ ។ ការប្រកាសរបស់ក្រសួងសាធារណការនៅពេលនេះ គឺជាការក្រើនរំលឹកដល់សាធារណជន អំពីតម្លៃនៃសមិទ្ធផលជាតិ និងជាការបង្ហាញពីផ្លែផ្កានៃការអភិវឌ្ឍដែលរាជរដ្ឋាភិបាលបានខិតខំកសាង ដើម្បីបម្រើដល់ជីវភាពរស់នៅរបស់ប្រជាពលរដ្ឋ ៕