វគ្គបណ្តុះបណ្តាល និងផ្សព្វផ្សាយបទដ្ឋានសិក្សាគម្រោងផ្លូវថ្នល់ ស្ដីពីការឌីហ្សាញធរណីមាត្រផ្លូវ - ផ្នែកផ្លូវប្រសព្វ កំពត៖ នាថ្ងៃព្រហស្បតិ៍ ទី២៧ ខែវិច្ឆិកា ឆ្នាំ២០២៥ ឯកឧត្តមបណ្ឌិត យិត បុណ្ណា រដ្ឋលេខាធិការ តំណាងដ៏ខ្ពងខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីបើកវគ្គបណ្តុះបណ្តាល និងផ្សព្វផ្សាយបទដ្ឋានសិក្សាគម្រោងផ្លូវថ្នល់ ស្ដីពីការឌីហ្សាញធរណីមាត្រផ្លូវ - ផ្នែកផ្លូវប្រសព្វ រៀបចំដោយអគ្គនាយកដ្ឋានបច្ចេកទេស ដោយមានការចូលរួមអមក្នុងកម្មវិធីបើកវគ្គមាន ឯកឧត្តមអនុរដ្ឋលេខាធិការ ទទួលបន្ទុកការងារបច្ចេកទេស ឯកឧត្តមទីប្រឹក្សាក្រសួង ឯកឧត្តមអគ្គនាយក នៃអគ្គនាយកដ្ឋានបច្ចេកទេស លោកអគ្គនាយករងមកពីអគ្គនាយកដ្ឋានពាក់ព័ន្ធ ព្រមទាំងមានការចូលរួមពីសិក្ខាកាមមកពីនាយកដ្ឋានអនុវត្តគម្រោងថ្នាក់កណ្ដាលរបស់ក្រសួង ក្រសួងសេដ្ឋកិច្ច និងហិរញ្ញវត្ថុ មន្ទីរសាធារណការ និងដឹកជញ្ជូនទាំង ២៥ រាជធានី-ខេត្ត និងគ្រប់អង្គភាពវិស្វកម្ម ដែលអនុវត្តគម្រោងស្ថិតក្រោមអាណាប័កក្រសួងសាធារណការ និងដឹកជញ្ជូន។ វគ្គបណ្ដុះបណ្ដាលនេះរៀបចំឡើងក្នុងគោលបំណងដើម្បីផ្សព្វផ្សាយនូវបទដ្ឋានបច្ចេកទេសដែលបានធ្វើបច្ចុប្បន្នភាព ដោយបានប្រកាសឱ្យប្រើប្រាស់ជាផ្លូវការដោយឯកឧត្តមរដ្ឋមន្រ្តីក្រសួងសាធារណការ និងដឹកជញ្ជូន នាខែមិនា ឆ្នាំ២០២៥ កន្លងទៅ ក៏ដូចជាផ្តល់ជូនគ្រប់ផ្នែកពាក់ព័ន្ធទាំងអស់យល់ច្បាស់ពីនីតិវិធី និងវិធីសាស្រ្តលើបច្ចេកទេសថ្មីៗ ឆ្លើយតបទៅនឹងការវិវឌ្ឍសកលភាវូបនីយកម្ម បច្ចេកវិទ្យាឌីជីថល ជាពិសេសការបង្កើនភាពធន់ទៅនឹងប្រែប្រួលអាកាសធាតុ ដែលពិភពលោកកំពុងជួបប្រទះនាពេលបច្ចុប្បន្ននេះ៕