រដ្ឋមន្រ្តីក្រសួងសាធារណការ និងដឹកជញ្ជូន ជួបពិភាក្សាការងារជាមួយអគ្គលេខាធិការអាស៊ាន ទីក្រុងណៃពិដោ ៖ ក្នុងឱកាសអញ្ជើញចូលរួមក្នុងកិច្ចប្រជុំរដ្ឋមន្រ្តីដឹកជញ្ជូនអាស៊ានលើកទី៣១ និងកិច្ចប្រជុំពាក់ព័ន្ធ នៅប្រទេសមីយ៉ាន់ម៉ា នារសៀលថ្ងៃទី២០ ខែវិច្ឆិកា ឆ្នាំ២០២៥ ឯកឧត្តម ប៉េង ពោធិ៍នា បានជជែកពិភាក្សាការងារជាមួយ ឯកឧត្តមបណ្ឌិត កៅ គឹមហ៊ួន អគ្គលេខាធិការអាស៊ាន ដោយមានការចូលរួមពី ឯកឧត្តម ចេង ម៉ានិត ឯកអគ្គរាជទូតកម្ពុជាប្រចាំប្រទេសមីយ៉ាន់ម៉ា។ ឯកឧត្តមរដ្ឋមន្រ្តីបានថ្លែងអំណរគុណដល់លេខាធិការដ្ឋានអាស៊ាន ដែលបានដើរតួនាទីដ៏សំខាន់ក្នុងការសម្របសម្រួលជំរុញការលើកកម្ពស់ស្តង់ដារដឹកជញ្ជូនក្នុងតំបន់ និងបានស្នើឱ្យឯកឧត្តមអគ្គលេខាធិការបន្តជួយជំរុញកិច្ចសហប្រតិបត្តិការក្នុងតំបន់លើគ្រប់វិស័យ ពិសេសវិស័យដឹកជញ្ជូន ដើម្បីផ្តល់ផលប្រយោជន៍ជាអតិបរមាជូនប្រជាជនកម្ពុជា ក៏ដូចជាប្រជាជនក្នុងតំបន់៕