សិក្ខាសាលារួមគ្នាស្តីពី «ឧបករណ៍ និងនីតិវិធីនៃការគណនាអត្រានៃកម្រៃសេវាប្រើប្រាស់ប្រព័ន្ធលូ» ក្រោមកម្មវិធីអភិវឌ្ឍន៍សមត្ថភាព ក្នុងក្របខ័ណ្ឌគម្រោងផ្គត់ផ្គង់ទឹកស្អាត និងអនាម័យ (PWSSP) រាជធានីភ្នំពេញ៖ នាថ្ងៃសុក្រ ទី២៤ ខែតុលា ឆ្នាំ២០២៥ អគ្គនាយកដ្ឋានប្រព័ន្ធចម្រោះទឹកកខ្វក់ នៃក្រសួងសាធារណការ និងដឹកជញ្ជូន សហការជាមួយអង្គការហ្រ្គេត (GRET) ដឹកនាំសម្របសម្រួលក្នុងការរៀបចំសិក្ខាសាលារួមគ្នាស្តីពី «ឧបករណ៍ និងនីតិវិធីនៃការគណនាអត្រានៃកម្រៃសេវាប្រើប្រាស់ប្រព័ន្ធលូ» ក្រោមអធិបតីភាព ឯកឧត្តម ចៅ សុភៈភិបាល អគ្គនាយក នៃអគ្គនាយកដ្ឋានប្រព័ន្ធចម្រោះទឹកកខ្វក់។ សិក្ខាសាលារួមគ្នានេះ ធ្វើឡើងក្នុងក្នុងគោលបំណងសំខាន់ចំនួន៣ រួមមាន ១). ចែករំលែកបង្ហាញពី «ឧបករណ៍ និងនីតិវិធី នៃការគណនាអត្រានៃកម្រៃសេវាប្រើប្រាស់ប្រព័ន្ធលូ» (២). ពិនិត្យលើសេចក្តីព្រាងប្រកាសអន្តរក្រសួងស្តីពីអត្រានៃកម្រៃសេវាប្រើប្រាស់ប្រព័ន្ធលូ ដែលមានចែងក្នុងមាត្រា៨៣នៃច្បាប់ស្តីពីប្រព័ន្ធទឹកកខ្វក់ និង ៣). ប្រមូលមតិយោបល់ និងធាតុចូលបន្ថែមសម្រាប់កែលម្អលើសេចក្តីព្រាងប្រកាសអន្តរក្រសួងនេះឱ្យកាន់តែល្អប្រសើរ ឆ្លើយតបតាមបរិបទសង្គមបច្ចុប្បន្ន និងអនាគត។ សូមបញ្ជាក់ជូនផងដែរថា សិក្ខាសាលារួមគ្នានេះក៏មានការចូលរួមពី តំណាងពីដៃគូអភិវឌ្ឍន៍ធនាគារអភិវឌ្ឍន៍អាស៊ី (ADB) តំណាងពីក្រសួងសេដ្ឋកិច្ច និងហិរញ្ញវត្ថុ និងក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ តំណាងរដ្ឋាករទឹកស្វយ័តក្រុងភ្នំពេញ និងសៀមរាប តំណាងពីមន្ទីរសាធារណការ និងដឹកជញ្ជូនខេត្ត រួមមាន ខេត្តពោធិ៍សាត់ កំពង់ឆ្នាំង សៀមរាប កំពង់ធំ និងតំណាងពីអង្គការ NIRAS និង ISEA៕