កិច្ចប្រជុំពិនិត្យវឌ្ឍនភាពការងាររបស់ក្រុមការងារសម្របសម្រួលផ្នែកចងក្រងទិន្នន័យ ត្រួតពិនិត្យ និងវាយតម្លៃប្រសិទ្ធភាពគម្រោង (ក្រុម “ង”) ចំណុះឱ្យលេខាធិការដ្ឋាននៃគណៈកម្មការសម្របសម្រួល និងតម្រង់ទិសការគ្រប់គ្រង និងអនុវត្តគម្រោងហេដ្ឋារចនាសម្ព័ន្ធសាធារណការ និងដឹកជញ្ជូន ទីស្តីការក្រសួង៖ នាថ្ងៃចន្ទ ទី១៣ ខែតុលា ឆ្នាំ២០២៥ ឯកឧត្តម វ៉ាស៊ឹម សុរិយា អនុរដ្ឋលេខាធិការ និងជាប្រធានក្រុម “ង” បានអញ្ជើញដឹកនាំកិច្ចប្រជុំពិនិត្យវឌ្ឍនភាពការងាររបស់ (ក្រុម “ង”) ដោយមានការអញ្ជើញចូលរួមពី ឯកឧត្តមអនុរដ្ឋលេខាធិការ ឯកឧត្តមទីប្រឹក្សាក្រសួង និងអស់លោកដែលជាថ្នាក់ដឹកនាំមកពីអង្គភាពពាក់ព័ន្ធ និងក្រុមការងារបច្ចេកទេសទទួលបន្ទុក។ កិច្ចប្រជុំនេះ ត្រូវបានរៀបចំឡើងដើម្បីពិនិត្យលើវឌ្ឍនភាពការងារដែលសម្រេចបាននាពេលកន្លងមក បញ្ហាប្រឈម ដើម្បីស្វែងរកដំណោះស្រាយឱ្យបានទាន់ពេលវេលា ជាពិសេសផ្តោតលើវឌ្ឍនភាពនៃការអភិវឌ្ឍន៍ប្រព័ន្ធប៉ាណូឡិកា (Project Dashboard) ដើម្បីតាមដានប្រសិទ្ធភាពនៃការអនុវត្តគម្រោងហេដ្ឋារចនាសម្ព័ន្ធសាធារណការ និងដឹកជញ្ជូន ឱ្យបានទាន់ពេលវេលា មានសង្គតិភាព និងគណនេយ្យភាព។ គិតមកដល់បច្ចុប្បន្ន ប្រព័ន្ធប៉ាណូឡិកា សម្រេចវឌ្ឍនភាពបានប្រមាណ ៩៥% ដែលគ្រោងស្នើសុំអនុសាសន៍ថ្នាក់ដឹកនាំទទួលបន្ទុក ដើម្បីដាក់ឱ្យមន្រ្តីបង្គោលមកពីអង្គភាពគ្រប់គ្រងគម្រោង (PMU) ទទួលការបណ្តុះបណ្តាល និងអនុវត្តសាកល្បងនាពេលឆាប់ៗខាងមុខនេះ ។ ជាមួយគ្នានេះ ក៏គ្រោងគោរពស្នើសុំគោលការណ៍ឯកភាពពីលោកជំទាវរដ្ឋលេខាធិការប្រចាំការ និងជាប្រធានលេខាធិការដ្ឋានសម្របសម្រួលគម្រោង ដើម្បីដាក់ជូនថ្នាក់ដឹកនាំក្រសួងប្រើប្រាស់ជាផ្លូវការ៕