កិច្ចប្រជុំពិនិត្យវឌ្ឍនភាពការងារត្រៀមរៀបចំវេទិការួមរវាងរដ្ឋ និងវិស័យឯកជនក្នុងតំបន់អាស៊ី លើកទី១៦ នៅព្រះរាជាណាចក្រកម្ពុជា ទីស្ដីការក្រសួង៖ នាថ្ងៃពុធ ទី៨ ខែតុលា ឆ្នាំ២០២៥ ឯកឧត្តម ពៅ ម៉ាលី រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មការ បានដឹកនាំកិច្ចប្រជុំបន្តតាមដានវឌ្ឍនភាពការងាររបស់គណៈកម្មការរៀបចំវេទិការួមរវាងរដ្ឋ និងវិស័យឯកជនក្នុងតំបន់អាស៊ី លើកទី១៦ ដែលគ្រោងនឹងប្រព្រឹត្តទៅនៅខែវិច្ឆិកា ខាងមុខនេះ ដោយមានការអញ្ជើញចូលរួមពីឯកឧត្តមអនុរដ្ឋលេខាធិការ ឯកឧត្តមអគ្គនាយក លោកអគ្គនាយកស្ដីទី លោកអគ្គនាយករង លោកប្រធាន និងអនុប្រធាននាយកដ្ឋាន និងមន្ត្រីជំនាញពាក់ព័ន្ធដែលជាសមាជិកនៃគណៈកម្មការផងដែរ។ កិច្ចប្រជុំនេះ បានធ្វើឡើងបន្ទាប់ពីកិច្ចប្រជុំលើកទី១ កាលពីថ្ងៃទី១៥ ខែសីហា កន្លងទៅ ដើម្បីពិនិត្យ និងតាមដានវឌ្ឍនភាពនៃការអនុវត្តការងារដែលបានបែងចែកជូនដល់ក្រុមការងារនីមួយៗ។ អង្គប្រជុំបានវាយតម្លៃខ្ពស់ចំពោះ វឌ្ឍនភាពគួរឱ្យកត់សម្គាល់ ដែលក្រុមការងារសម្រេចបានក្នុងរយៈពេលកន្លងមក។ ឯកឧត្តមរដ្ឋលេខាធិការ បានណែនាំឱ្យក្រុមការងារទាំងអស់ បន្តសហការគ្នាយ៉ាងជិតស្និទ្ធិបន្ថែមទៀត ដើម្បីធានាថាការរៀបចំវេទិកាដ៏មានសារៈសំខាន់ជាប្រវត្តិសាស្ត្រនេះ នឹងប្រព្រឹត្តទៅបានយ៉ាងរលូន តាមផែនការដែលបានគ្រោងទុក និងទទួលបានលទ្ធផលផ្លែផ្កា ដើម្បីជាមុខមាត់ក្រសួង ក៏ដូចជាប្រទេសជាតិទាំងមូល៕