ច្នៃចម្ការកាហ្វេ ចេញជារីស៊ត ទាញទេសចរបរទេសមកស្គាល់មណ្ឌលគិរី ហើយអនាគតដាំកាហ្វេនាំចេញ ធ្វើឱ្យកាហ្វេមណ្ឌលគិរីល្បីលើលោក កាហ្វេខ្មែរ ត្រូវបានទទួលស្គាល់គុណភាពថ្នាក់អន្តរជាតិពីវិទ្យាស្ថានវាយតម្លៃគុណភាពកាហ្វេអន្តរជាតិ Coffee Quality Institute (CQI)ដែលទទួលស្គាល់ថាមានគុណភាពខ្ពស់។ កាហ្វេពិសេស (Specialty Coffee) ត្រូវបានកំណត់ថាជាកាហ្វេដែលមានគុណភាពល្អពិសេស ដោយឆ្លងកាត់ដំណើរការដាំដុះ កែច្នៃ លីង និងឆុងតាមស្តង់ដាកម្រិតខ្ពស់ ធ្វើឱ្យអ្នកបរិភោគទទួលបានរសជាតិពិសេស ដែលខុសពីកាហ្វេទូទៅ ដោយសារគេផ្តោតលើភាពល្អឥតខ្ចោះនៅគ្រប់ដំណាក់កាលនៃការផលិត។ ស្តង់ដាវាយតម្លៃកាហ្វេពិសេស សមាគមកាហ្វេពិសេស (Specialty Coffee Association) វាយតម្លៃកាហ្វេផ្អែកលើ៖ ក្លិន រសជាតិ កម្រិតអាស៊ីត អារម្មណ៍ក្រោយបរិភោគ ភាពពេញលេញ កំហាប់ កម្រិតផ្អែម ភាពស្មើគ្នានៃគ្រាប់កាហ្វេ និងភាពស្អាតបរិសុទ្ធ។ កាហ្វេដែលបានពិន្ទុពី ៨០ ឡើងទៅ ១០០ ត្រូវបានចាត់ទុកជាកាហ្វេពិសេស។ សមិទ្ធផលកាហ្វេខ្មែរឆ្នាំ ២០២៥ នៅថ្ងៃទី ២៤ ខែមីនា ឆ្នាំ២០២៥ វិទ្យាស្ថាន CQI បានប្រកាសលទ្ធផលវាយតម្លៃកាហ្វេពី ចម្ការកាហ្វេភីដា (PIDA COFFEE FARM) ខេត្តមណ្ឌលគីរី៖ - កាហ្វេអារ៉ាប៊ីកា៖ ៨៥,១៧ ពិន្ទុ - កាហ្វេរូបូស្តា៖ ៨៥,៥៨ ពិន្ទុ ជាលទ្ធផល កាហ្វេរូបូស្តាខ្មែរឈរលំដាប់ទី ១៩ ក្នុងចំណាត់ថ្នាក់ពិភពលោក។ ប្រភពរូបភាពពី៖ ស្ថានទូត/ The Bean Embassy អត្ថបទ៖ ធន់ វឌ្ឍនា / THUN Vathana