កិច្ចប្រជុំក្រុមការងារចំពោះកិច្ចរៀបចំគ្រឿងឥស្សរិយយសជូនមន្ត្រីរាជការ និងមន្ត្រីជាប់កិច្ចសន្យារបស់ក្រសួងសាធារណការ និងដឹកជញ្ជូន ទីស្តីការក្រសួង ៖ នាថ្ងៃពុធ ទី២ ខែកក្កដា ឆ្នាំ២០២៥ ឯកឧត្តម ប៉ាល់ ចន្ទតារា រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានក្រុមការងារចំពោះកិច្ច បានអញ្ជើញដឹកនាំកិច្ចប្រជុំក្រុមការងារចំពោះកិច្ចរៀបចំគ្រឿងឥស្សរិយយសជូនមន្ត្រីរាជការ និងមន្ត្រីជាប់កិច្ចសន្យារបស់ក្រសួងសាធារណការ និងដឹកជញ្ជូន ដែលមានអតីតភាពការងារចាប់ពី១០ឆ្នាំ និងពុំធ្លាប់ទទួលបានគ្រឿងឥស្សរិយយស ដោយមានការអញ្ជើញចូលរួមពី ឯកឧត្តម លោក-លោកស្រីជាថ្នាក់ដឹកនាំអគ្គនាយកដ្ឋានក្រោមឱវាទក្រសួង សមាជិក សមាជិកា នៃក្រុមការងារចំពោះកិច្ច និងតំណាងមន្ទីរសាធារណការ និងដឹកជញ្ជូនទាំង២៥ រាជធានី-ខេត្ត។ កិច្ចប្រជុំនេះរៀបចំឡើង ក្នុងគោលបំណងពិនិត្យ និងវាយតម្លៃលើសមាសភាពមន្រ្តីរាជការ និងមន្រ្តីជាប់កិច្ចសន្យារបស់ក្រសួង ដែលបានបំពេញការងារលើសពី១០ឆ្នាំ (គិតត្រឹមថ្ងៃទី២០ ខែមីនា ឆ្នាំ២០២៥) និងពុំធ្លាប់ទទួលបានគ្រឿងឥស្សរិយយស ដើម្បីរៀបចំជាបញ្ជីឈ្មោះ និងស្នើសុំរាជរដ្ឋាភិបាល។ ឯកឧត្តមប្រធានអង្គប្រជុំ បានគូសបញ្ជាក់ជូនថា ការពិនិត្យ និងវាយតម្លៃនេះ ត្រូវផ្តោតលើគុណវុឌ្ឍិ លក្ខណសម្បត្តិ និងលក្ខខណ្ឌរួម ដែលបានកំណត់ដោយក្រុមការងារចំពោះកិច្ច សំដៅធ្វើយ៉ាងណាឱ្យការស្នើសុំគ្រឿងឥស្សរិយយសនេះ មានភាពត្រឹមត្រូវតាមនីតិវិធី ប្រកបដោយតម្លាភាព និងយុត្តិធម៌ ស្របទៅតាមប្រសាសន៍ណែនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា កាលថ្ងៃទី២០ ខែមីនា ឆ្នាំ២០២៥ កន្លងទៅ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube