ភ្នំពេញ៖ រដ្ឋមន្រ្ដីក្រសួងសាធារណការ និងដឹកជញ្ជូន បានបង្ហាញអំពីផែនការរយៈពេល១០០ថ្ងៃ សម្រាប់ កែទម្រង់ក្នុងវិស័យសាធារណការ និងដឹកជញ្ជូនក្នុងអាណត្ដិទី៦នេះ ដោយបន្ដពង្រីកការកសាងផ្លូវ ជាតិសំខាន់ៗ និងប្រព័ន្ធចុះបញ្ជីគ្រប់គ្រងយានយន្ដ ឱ្យមានប្រសិទ្ធភាព។ ក្នុងជំនួបសម្ដែងការគួរសមជាមួយគណៈប្រតិភូយុវជនកម្ពុជាចំនួន២៧រូប នៃសមាគមនាវា យុវជនអាស៊ីអាគ្នេយ៍ និងជប៉ុន ដែលនឹងចូលរួមក្នុងកម្មវិធីនាវាយុវជនអាស៊ីអាគ្នេយ៍ប្រចាំឆ្នាំ កាលពី ថ្ងៃទី២ ខែតុលានេះ នៅទីស្ដីការក្រសួងសាធារណការ ឯកឧត្ដម ស៊ុន ចាន់ថុល ទេសរដ្ឋមន្រ្ដី រដ្ឋមន្រ្ដី ក្រសួងសាធារណការ និងដឹកជញ្ជូនបានមានប្រសាសន៍ថា ក្រសួងបានដាក់ចេញនូវផែនការ និង គម្រោងកំពុងដំណើរការបន្ត ដែលពាក់ព័ន្ធនឹងការធ្វើឱ្យប្រសើរឡើងនូវបណ្តាញផ្លូវជាតិរបស់កម្ពុជា ការពង្រីកកំពង់ផែសមុទ្រទឹកជ្រៅនៅក្រុងព្រះសីហនុ។ ឯកឧត្ដមទេសរដ្ឋមន្ត្រីក៏បានគូសបញ្ជាក់អំពីគំនិតផ្តួចផ្តើមកំណែទម្រង់បច្ចុប្បន្នរបស់ក្រសួង ប្រកបដោយជោគជ័យក្នុងអាណត្ដិទី៥កន្លងមក ដែលក្នុងនោះរួមមាន ប្រព័ន្ធស្វ័យប្រវត្តិកម្មចុះបញ្ជី យានយន្តការចេញប័ណ្ណបើកបរការប្រឡងយកប័ណ្ណបើកបរ និងការត្រួតពិនិត្យលក្ខណៈបច្ចេកទេស យានយន្ត។ ជាមួយគ្នានេះដែរ ឯកឧត្តមទេសរដ្ឋមន្រ្តីបានរម្លឹកដល់យុវជនកម្ពុជាទាំងអស់ថា ពួកគេគឺជា ឯកអគ្គរាជទូតសុច្ឆន្ទៈរបស់កម្ពុជា ដែលត្រូវបង្ហាញអំពីសមិទ្ធផលសំខាន់ៗដែលរាជរដ្ឋាភិបាល បានធ្វើ។ ឯកឧត្ដមទេសរដ្ឋមន្រ្តីបានបន្ថែមទៀតថា នេះគឺជាឱកាសបង្កើតបណ្តាញទំនាក់ទំនងល្អមួយ ហើយសង្ឃឹមថា តំណាងយុវជនទាំងអស់នេះ នឹងបន្តរក្សា និងបង្កើតទំនាក់ទំនងមិត្តភាពយូរអង្វែង ជាមួយយុវជនរួមដំណើរដទៃទៀត ក្នុងស្មារតីជាប្រទេសដែលស្ថិតនៅក្នុងតំបន់តែមួយ។ សូមបញ្ជាក់ថា យុវជនវ័យក្មេងកម្ពុជាចំនួន២៧រូប ត្រូវបានជ្រើសរើសឱ្យចូលរួមក្នុង កម្មវិធី នាវាយុវជនអាស៊ីអាគ្នេយ៍លើកទី៤៥ នៅក្នុងប្រទេសជប៉ុន ដែលនឹងប្រព្រឹត្តទៅចាប់ពីថ្ងៃទី២៣ ខែតុលា ដល់ថ្ងៃទី១២ ខែធ្នូ ឆ្នាំ២០១៨។គោលបំណងនៃកម្មវិធីនេះគឺដើម្បីពង្រឹងទំនាក់ទំនង និងការ ស្វែង​យល់ពីគ្នាទៅវិញទៅមករវាងយុវជននៃប្រទេសជប៉ុន និងយុវជននៃបណ្តាប្រទេសអាស៊ីអាគ្នេយ៍ ទាំង១០ ពង្រីកទស្សនវិស័យរបស់ពួកគេចំពោះពិភពលោក និងលើសពីនេះទៀតដើម្បីពង្រឹងស្មារតីនៃ​កិច្ចសហប្រតិបត្តិការអន្តរជាតិ និងជំនាញជាក់ស្តែងសម្រាប់កិច្ចសហប្រតិបត្តិការអន្តរជាតិ៕អត្ថបទ៖ ប៉ូ សុផានិត