ភ្នំពេញ៖ លោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន នៅថ្ងៃទី៣ ខែមីនា បានដឹកនាំកិច្ចប្រជុំពិភាក្សាដើម្បីកំណត់ទីតាំងសាងសង់ស្ថានីយច្រកទ្វារព្រំដែនអន្តរជាតិ៤កន្លែង របស់គម្រោងជំរុញការតភ្ជាប់ហេដ្ឋារចនាសម្ព័ន្ធច្រកទ្វារព្រំដែន (3CEP) ក្នុងក្របខ័ណ្ឌហិរញ្ញប្បទានធនាគារវិនិយោគហេដ្ឋារចនាសម្ព័ន្ធអាស៊ី (AIIB)។ កិច្ចប្រជុំនេះ មានការចូលរួមពីតំណាងមកពីក្រសួងសេដ្ឋកិច្ច និងហិរញ្ញវត្ថុ អគ្គនាយកដ្ឋានដោះស្រាយផលប៉ះពាល់ដោយសារគម្រោងអភិវឌ្ឍន៍ និងអគ្គនាយដ្ឋានពាក់ព័ន្ធ អភិបាលខេត្តទាំង៤ (ខេត្តក្រចេះ រតនគិរី តាកែវ និងត្បូងឃ្មុំ) និងមន្រ្តីពាក់ព័ន្ធមួយចំនួនផងដែរ។ កិច្ចប្រជុំនេះ ធ្វើឡើងក្នុងគោលបំណងដើម្បីពិនិត្យរបាយការណ៍បឋម និងពិនិត្យពិភាក្សាកំណត់ទីតាំង និងជំរុញការងារបន្តអនុវត្តរបស់គម្រោងសាងសង់អគារស្ថានីយច្រកទ្វារព្រំដែនឱ្យប្រព្រឹត្តទៅបានដោយរលូន និងទទួលបានជោគជ័យ ដែលទាមទារឱ្យមានការបង្កើតក្រុមការងារបច្ចេកទេសចំពោះកិច្ច ដើម្បីចុះសិក្សាស្រាវជ្រាវបន្ថែមអំពីស្ថានភាពទីតាំង ទំហំដីត្រូវការ និងការកាន់កាប់។ ជាមួយនេះ ក៏ពិនិត្យមើលស្ថានភាពភូមិសាស្រ្ត ការពិនិត្យមើលលទ្ធភាព និងដីត្រៀមសម្រាប់ការសាងសង់ វិធានការត្រៀមបម្រុងទុកដីសម្រាប់ការចរចារ និងដោះស្រាយផលប៉ះពាល់ ។ល។ សូមបញ្ជាក់ថា ស្ថានីយច្រកទ្វារព្រំដែន ដែលនឹងត្រូវសាងសង់នេះ ស្ថិតនៅលើទីតាំងច្រកកទ្វារអន្តរជាតិចំនួន៤ កន្លែង គឺត្រពាំងស្រែ ខេត្តក្រចេះ, ភ្នំដិន ខេត្តតាកែវ, ត្រពាំងផ្លុង ខេត្តត្បូងឃ្មុំ និងអូរយ៉ាដាវ នៅខេត្តរតនគិរី៕