ជំនួបសម្តែងការគួរសមរវាងគណៈប្រតិភូកម្ពុជា និងតំណាងអង្គការសុខភាពពិភពលោក ទីក្រុងម៉ារ៉ាកេស ប្រទេសម៉ារ៉ុក ទីក្រុងម៉ារ៉ាកេស ប្រទេសម៉ារ៉ុក៖ នាព្រឹកថ្ងៃពុធ ទី១៩ ខែកុម្ភៈ ឆ្នាំ២០២៥ បន្ទាប់ពីជំនួបទ្វេភាគីជាមួយ ឯកឧត្តមរដ្ឋមន្រ្តីក្រសួងដឹកជញ្ជូន និងឡូជីស្ទីក នៃប្រទេសម៉ារ៉ុក ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធានអចិន្ត្រៃយ៍គណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ.) បានបន្តជួបប្រជុំទ្វេភាគីជាមួយលោកបណ្ឌិត Etienne Krug ប្រធាននាយកដ្ឋានសុខភាពសង្គម នៃអង្គការសុខភាពពិភពលោក ។ នៅក្នុងជំនួបកិច្ចប្រជុំនេះ ឯកឧត្តមរដ្ឋមន្ត្រីប្រធានគណៈប្រតិភូកម្ពុជា និងតំណាងអង្គការសុខភាពពិភពលោក បានពិភាក្សាការងារលើ ១) ការរៀបចំសួនសុវត្ថិភាពចរាចរណ៍នៅព្រះរាជាណាចក្រកម្ពុជា និង ២) ការលើកកម្ពស់ការយល់ដឹងអំពីសុវត្ថិភាពចរាចរណ៍ផ្លូវគោកសម្រាប់សាធារណជន និងការពង្រឹងការរៀបចំតំបន់សុវត្ថិភាពចរាចរណ៍នៅតាមសាលារៀន (Safe school Zones)។ តាមរយៈកិច្ចពិភាក្សានេះ ភាគីកម្ពុជាបានស្នើឱ្យអង្គការសុខភាពពិភពលោកបន្តគាំទ្រដល់កម្ពុជាលើសកម្មភាពមួយចំនួន ដើម្បីសម្រេចបានតាមផែនការជាតិរបស់កម្ពុជា លើការកាត់បន្ថយចំនួនអ្នកស្លាប់ និងអ្នករងរបួសដោយសារគ្រោះថ្នាក់ចរាចរណ៏ឱ្យបាន៥០% ត្រឹមឆ្នាំ២០៣០ និងពង្រឹងកិច្ចសហប្រតិបត្តិការលើការលើកកម្ពស់សុវត្ថិភាពចរាចរណ៍នៅគ្រប់វិស័យពាក់ព័ន្ធក្នុងប្រទេសកម្ពុជា។ ជាមួយគ្នានេះដែរ ឯកឧត្តមរដ្ឋមន្ត្រី ប្រធានគណៈប្រតិភូ បានថ្លែងអំណរគុណដល់អង្គការសុខភាពពិភពលោកដែលបានអញ្ជើញ រៀបចំ និងគាំទ្រដល់គណៈប្រតិភូកម្ពុជា ក្នុងការចូលរួមក្នុងសន្និសីទសកលថ្នាក់រដ្ឋមន្ត្រីស្តីពីសុវត្ថិភាពចរាចរណ៍ផ្លូវគោកលើកទី៤។ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube