ការចុះពិនិត្យតម្រាយទីតាំងគម្រោង និងប្រជុំពិភាក្សាលើវឌ្ឍនភាពនៃការសិក្សាបណ្តាញលូខ្នែង ខ្នែងរង និងប្រឡាយទឹកភ្លៀងសម្រាប់គម្រោងសាងសង់ប្រព័ន្ធបណ្តាញលូទឹកសំណល់ និងបណ្តាញលូទឹកភ្លៀង ក្នុងក្រុងសៀមរាប សៀមរាប៖ ថ្ងៃសុក្រ ទី១៤ ខែកុម្ភៈ ឆ្នាំ២០២៥ ឯកឧត្ដម សូរ វ៉ិចទ័រ រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង បានដឹកនាំក្រុមការងារពិនិត្យ និងពិភាក្សាលើការចុះពិនិត្យតម្រាយទីតាំងគម្រោង និងប្រជុំពិភាក្សាលើវឌ្ឍនភាពនៃការសិក្សាបណ្តាញលូខ្នែង ខ្នែងរង និងប្រឡាយទឹកភ្លៀង សម្រាប់គម្រោងសាងសង់ប្រព័ន្ធបណ្តាញលូទឹកសំណល់ និងបណ្តាញលូទឹកភ្លៀង (Green Siem Reap Sewerage and Storm Drainage System) ក្នុងក្រុងសៀមរាប ជាមួយក្រុមហ៊ុនទីប្រឹក្សាបច្ចេកទេស Saman- Yooshin -KCIEng JV ដោយមានការចូលរួមពីឯកឧត្ដមអនុរដ្ឋលេខាធិការ នាយករងគម្រោង ឯកឧត្តម លីសារី អភិបាលរងខេត្ត តំណាងក្រសួងសេដ្ឋកិច្ច និងហិរញ្ញវត្ថុ តំណាងធនាគារកូរ៉េ ប្រចាំនៅកម្ពុជា(EDCF) និងសមាជិក-សមាជិកាគម្រោងផងដែរ។ ដំណើរបេសកកម្មនេះធ្វើឡើងដើម្បីពិនិត្យលើតម្រាយទីតាំងផ្ទាល់ និងប្រជុំពិភាក្សាពីលក្ខណៈវិនិច្ឆ័យដោយផ្ដោតលើការរចនាប្លង់លម្អិត និងការអនុវត្តផែនការនៃគម្រោង អាចដំណើការទៅបានប្រកបដោយប្រសិទ្ធភាព។ បន្ថែមពីនេះទៀត គម្រោងនេះនឹងពង្រីកសមត្ថភាពក្នុងការលើកកម្ពស់ការគ្រប់គ្រងអនាម័យ និងទឹកកខ្វក់នៅក្រុងសៀមរាប ដើម្បីកែលម្អការពារទឹកជំនន់ ការកកស្ទះលូ និងការប៉ះពាល់បរិស្ថាន ដោយនឹងអភិវឌ្ឍទៅលើប្រព័ន្ធលូ អាងប្រព្រឹត្តកម្មចម្រោះប្រព័ន្ធទឹកកខ្វក់ និងវិធានអនាម័យផ្សេងៗ សំដៅធ្វើយ៉ាងណាអាចគ្រប់គ្រងលើប្រតិបត្តិការ សម្រេចគោលនយោបាយ និងយុទ្ធសាស្ត្រនានាទាក់ទងនឹងការគ្រប់គ្រង អភិវឌ្ឍប្រព័ន្ធចម្រោះទឹកកខ្វក់ ឱ្យទទួលបាននូវសោភ័ណភាពទីក្រុងបៃតង និងភាពទាក់ទាញផងដែរ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube