កិច្ចប្រជុំពិភាក្សាជុំវិញវិធានការបញ្ចៀសការកកស្ទះនៅលើផ្លូវល្បឿនលឿនភ្នំពេញ-ក្រុងព្រះសីហនុ ក្នុងកាលៈទេសៈដែលមានចរាចរណ៍មមាញឹក នាឱកាសថ្ងៃឈប់សម្រាក និងពិធីបុណ្យជាតិនានា ទីស្តីការក្រសួង៖ នាព្រឹកថ្ងៃពុធ ទី៣១ ខែមករា ឆ្នាំ២០២៤ ឯកឧត្តម សួង ហេង រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានអង្គភាពគ្រប់គ្រងគម្រោងដំណាក់កាលប្រតិបត្តិការ និងថែទាំ នៃគម្រោងផ្លូវល្បឿនលឿនភ្នំពេញ-ក្រុងព្រះសីហនុ បានអញ្ជើញដឹកនាំកិច្ចប្រជុំជាមួយតំណាងក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ ដោយមានការអញ្ជើញចូលរួមពី ឯកឧត្តម ជាថ្នាក់ដឹកនាំ និងមន្ត្រីជំនាញពាក់ព័ន្ធមួយចំនួនទៀត។ កិច្ចប្រជុំនាឱកាសនេះ ត្រូវបានរៀបចំឡើងតបតាមការណែនាំពីសំណាក់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ក្នុងគោលបំណងជជែកពិភាក្សាស្វែងរកដំណោះស្រាយ ដើម្បីត្រៀមចាត់វិធានការឆ្លើយតបនឹងកាលៈទេសៈដែលមានចរាចរណ៍មមាញឹក ដែលបង្កឱ្យមានការកកស្ទះនៅតាមបញ្ជរទូទាត់ប្រាក់នៃផ្លូវល្បឿនលឿនភ្នំពេញ-ក្រុងព្រះសីហនុ ក្នុងឱកាសថ្ងៃឈប់សម្រាក និងពិធីបុណ្យជាតិផ្សេងៗ នាពេលខាងមុខ។ ក្រសួងសាធារណការ និងដឹកជញ្ជូន សូមយកឱកាសនេះ ក្រើនរម្លឹកជាថ្មីអំពីលក្ខខណ្ឌនៃការប្រើប្រាស់ផ្លូវល្បឿនលឿន និងការចេញចូលគន្លងទាំង ៣ ប្រភេទ នៅលើផ្លូវល្បឿនលឿនឱ្យបានត្រឹមត្រូវ ដើម្បីគោលការណ៍សុវត្ថិភាព ការជួយកាត់បន្ថយការកកស្ទះ និងមិនចំណាយពេលរង់ចាំយូរ៕ ដើម្បីចូលទៅទស្សនាវីដេអូ បងប្អូនអាចចុចលើតំណភ្ជាប់វីដេអូខាងក្រោមៈ -លក្ខខណ្ឌនៃការប្រើប្រាស់ផ្លូវល្បឿនលឿន https://fb.watch/pjzrdAa2NI/?mibextid=v7YzmG -ការស្វែងយល់អំពីការចេញចូលគន្លងទាំង ៣ ប្រភេទ នៅលើផ្លូវល្បឿនលឿន https://fb.watch/pjzmY1iha3/?mibextid=xOYQyo