ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន អញ្ជើញអមដំណើរ សម្តេចធិបតី នាយករដ្ឋមន្ត្រី ក្នុងពិធីសំណេះសំណាលជាមួយសិស្សនិទ្ទេស A នៃការប្រឡងសញ្ញាបត្រមធ្យមសិក្សាទុតិយភូមិ និងការប្រឡងសញ្ញាបត្របច្ចេកទេស និងវិជ្ជាជីវៈកម្រិត៣ រាជធានីភ្នំពេញ៖ កាលពីព្រឹកថ្ងៃអង្គារ ទី០៩ ខែមករា ឆ្នាំ២០២៤ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញចូលរួមអមដំណើរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា អញ្ជើញជួបសំណេះសំណាលជាមួយ សិស្សនិទ្ទេស A នៃការប្រឡងសញ្ញាបត្រមធ្យមសិក្សាទុតិយភូមិ និងការប្រឡងសញ្ញាបត្របច្ចេកទេស និងវិជ្ជាជីវៈកម្រិត៣ ដែលបានប្រព្រឹត្តទៅនៅមជ្ឈមណ្ឌលសន្និបាត និងពិព័រណ៌អន្តរជាតិជ្រោយចង្វារ (OCIC)។ ប្អូនៗសិស្សជាប់និទ្ទេស A ដែលបានចូលរួមក្នុងពិធីសំណេះសំណាលនាឱកាសនេះ សរុបមានចំនួន ១៦៩១ រូប ក្នុងនោះ ១៦៧៣ រូប ជាសិស្សដែលបានប្រឡងសញ្ញាបត្រមធ្យមសិក្សាទុតិយភូមិ នាសម័យប្រឡង ថ្ងៃទី០៦ ខែវិច្ឆិកា ឆ្នាំ២០២៣ ដោយឡែក ១៨ រូបផ្សេងទៀត ជាសិស្សដែលប្រឡងសញ្ញាបត្របច្ចេកទេស និងវិជ្ជាជីវៈកម្រិត៣ នាសម័យប្រឡង ថ្ងៃទី២០ ខែតុលា ឆ្នាំ២០២៣។ ថ្លែងក្នុងជំនួបនេះ សម្តេចធិបតី បានលើកឡើងថា សិជាប់និទ្ទេស A ទាំងអស់ ទទួលបានលទ្ធផលល្អប្រសើរទៅបាន ដោយសារមានការចូលរួមពីតួអង្គសំខាន់ចំនួន៥ ដែលរួមមាន៖ (១) សិស្សានុសិស្សខ្លួនឯងផ្ទាល់ (២) ការយកចិត្តទុកដាក់បង្រៀន ពីលោកគ្រូ អ្នកគ្រូ (៣) ការជួយជ្រោមជ្រែងពីមាតាបិតា-អាណាព្យាបាលរបស់សិស្សានុសិស្ស ទាំងអស់ (៤) ការយកចិត្តទុកដាក់របស់ក្រសួងអប់រំ យុវជន និងកីឡា និង (៥) ការចូលរួមរបស់មហាជន រួមទាំងក្រុមការងាររាជរដ្ឋាភិបាលចុះជួយមូលដ្ឋាន ដែលបានខ្នះខ្នែងផ្តល់លទ្ធភាពបំពាក់បំប៉នសមត្ថភាព ដល់សិស្សានុសិស្សនៅមុនការប្រឡង រហូត ទទួលបានលទ្ធផលល្អក្នុងការសិក្សា និងការប្រឡងដោយជោគជ័យ និងទទួលបានជ័យលាភីនិទ្ទេស A នេះ។ តាមរយៈការប្រកាសដាក់ឱ្យអនុវត្តយុទ្ធសាស្ត្របញ្ចកោណ-ដំណាក់កាលទី១ រាជរដ្ឋាភិបាល នីតិកាលទី៧ ដែលមាន សម្តេចធិបតីនាយករដ្ឋមន្ត្រី ជាប្រមុខដឹកនាំ គឺពិតបានយកចិត្តទុកដាក់ជាពិសេសលើការអភិវឌ្ឍធនធានមនុស្ស ពីព្រោះ “មនុស្ស” គឺជាអាទិភាពគន្លឹះទី១ ក្នុងចំណោមអាទិភាពគន្លឹះទាំង៥ ដែលរួមមាន “មនុស្ស ផ្លូវ ទឹក ភ្លើង និងបច្ចេកវិទ្យា”។ ជាក់ស្តែង នៅក្នុងកម្មវិធីនយោបាយ របស់រាជរដ្ឋាភិបាល ឆ្នាំ២០២៣-២០២៨ ក៏បានបញ្ជាក់ដែរថា នឹងពង្រឹងសមត្ថភាពប្រកួតប្រជែងរបស់យុវជនកម្ពុជា ដោយបន្តជំរុញការអភិវឌ្ឍធនធានមនុស្ស និងមូលធនមនុស្ស តាមរយៈការលើកកម្ពស់គុណភាពអប់រំ និងការបណ្តុះបណ្តាលជំនាញបច្ចេកទេសវិជ្ជាជីវៈគ្រប់កម្រិត ដើម្បីផ្គត់ផ្គង់ជំនាញការ ដែលប្រកបដោយផលិតភាពខ្ពស់ ឱ្យបានគ្រប់គ្រាន់ និងឆ្លើយតបទៅនឹងតម្រូវការទីផ្សារការងារ ក៏ដូចជាការអភិវឌ្ឍសង្គម-សេដ្ឋកិច្ច របស់កម្ពុជាផងដែរ៕