អបអរសាទរការប្រារព្ធខួបលើកទី២៥ នៃការបញ្ចប់សង្គ្រាមស៊ីវិលនៅកម្ពុជា និងខួបទី៥ឆាំ្ន នៃការកសាងវិមានឈ្នះឈ្នះ នាថ្ងៃទី២៩ ខែធ្នូ ឆ្នាំ២០២៣ ឯកឧត្តម ជា ថោយ និង ឯកឧត្តម មួន វាសនា រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តមរដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញចូលរួមពិធីអបអរសាទរការប្រារព្ធខួបលើកទី២៥ នៃការបញ្ចប់សង្គ្រាមស៊ីវិលនៅកម្ពុជា និងខួបទី៥ឆាំ្ន នៃការកសាងវិមានឈ្នះឈ្នះ ក្រោមអធិបតីដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅទីលានវិមានឈ្នះ ឈ្នះ។ ពិធីនេះមានការចូលរួមយ៉ាងច្រើនកុះករពីគ្រប់ស្ថាប័ន អង្គភាព ជាមួយគ្នានោះ ថ្នាក់ដឹកនាំ មន្ត្រីរាជការ ក្រសួងសាធារណការ និងដឹកជញ្ជូន ក៏បានចូលរួមក្នុងពិធី និងបានដាក់តាំងបង្ហាញនៅសមិទ្ធផលក្នុងវិស័យសាធារណការ និងដឹកជញ្ជូន សម្រាប់បង្ហាញជូនគណៈអធិបតី ថ្នាក់ដឹកនាំ អ្នកអញ្ជើញទស្សនា ប្រជាពលរដ្ឋ នៅទីតាំងប្រារព្ធពិធីផងដែរ។ ការរៀបចំប្រារព្ធខួបលើកទី២៥ នៃការបញ្ចប់សង្គ្រាមស៊ីវិលនៅកម្ពុជា និងការអនុវត្តប្រកបដោយជោគជ័យ នយោបាយឈ្នះឈ្នះ គឺធ្វើឡើងដើម្បីរំឮក និងការចងចាំនូវការបញ្ចប់សង្គ្រាមស៊ីវិលទាំងស្រុងនៅកម្ពុជានាំមកនូវសន្តិភាព និងការឯកភាពជាតិពេញលេញនិងការអភិវឌ្ឍប្រទេសជាតិមកដល់សព្វថ្ងៃនេះ ។ ព្រឹត្តិការណ៍នេះក៏ប្រារព្ធឡើងនៅខួបទី៥ឆ្នាំនៃការកសាងវិមានឈ្នះ ឈ្នះ ដែលជាសំណង់ប្រវត្តិសាស្ត្រដើ ម្បីរំឭកដល់វីរភាព និងគុណតម្លៃនៃនយោបាយឈ្នះឈ្នះ ដែលបានផ្តួចផ្តើមឡើងដោយសម្តេចអគ្គមហាសេនាបតីតេជោ ហ៊ុន សែន ដែលជាស្ថាបនិក និងជាមគ្គុទ្ទេសក៍ឯកសន្តិភាពនៃយើង និងជាការបង្កើនការយល់ដឹងពីប្រវត្តិសាស្ត្រជាតិ ក្នុងស្មារតីស្រលាញ់ជាតិមាតុភូមិក្នុងការបន្តថែរក្សាស្ថិរភាព សន្តិសុខ និងអភិវឌ្ឍន៍ជាតិ មាតុភូមិផងដែរ។ សូមជម្រាបជូនថាពិធីអបអរសាទរការប្រារព្ធខួបលើកទី២៥ នៃការបញ្ចប់សង្គ្រាមស៊ីវិលនៅកម្ពុជា និងខួបទី៥ឆាំ្ន នៃការកសាងវិមានឈ្នះឈ្នះ ប្រារព្ធឡើងមានរយៈពេល៣ថ្ងៃ គឺចាប់ពីថ្ងៃទី២៩-៣០ និង ៣១ ខែធ្នូ ឆ្នាំ ២០២៣៕