សិក្ខាសាលា ស្ដីពីសញ្ញាណទូទៅ នៃការវេចខ្ចប់ និងការបិទផ្លាកលើទំនិញគ្រោះថ្នាក់ (Dangerous Goods) ទីស្ដីការក្រសួង៖ នាថ្ងៃព្រហស្បតិ៍ ទី០៧ ខែធ្នូ ឆ្នាំ២០២៣ លោក សយ សេរីសុវឌ្ឍនៈ នាយករងវិទ្យាស្ថានតេជោសែន សាធារណការ និងដឹកជញ្ជូន តំណាងលោកនាយកស្តូីទី បានអញ្ជើញជាអធិបតីក្នុងសិក្ខាសាលា ស្ដីពីសញ្ញាណទូទៅ នៃការវេចខ្ចប់ និងការបិទផ្លាកលើទំនិញគ្រោះថ្នាក់ ដោយមានការចូលរួមពីសំណាក់ មន្ដ្រីរាជការមកពី អគ្គនាយកដ្ឋាន និងនាយកដ្ឋានពាក់ព័ន្ធ ចំណុះឱ្យក្រសួងសាធារណការ និងដឹកជញ្ជូន។ សិក្ខាសាលានេះ ត្រូវបានរៀបចំឡើង ដោយមានកិច្ចសហការ រវាងវិទ្យាស្ថានតេជោសែន សាធារណការ និងដឹកជញ្ជូន និង សមាគមភស្ដុភារកម្មកម្ពុជា ក្នុងគោលបំណងផ្ដល់នូវចំណេះដឹង បទពិសោធន៍ និងការអនុវត្ដការងារ លើការបិទស្លាកសម្គាល់(Labelling and Marking) ការវេចខ្ចប់ (Packaging and Containing) និងការដឹកជញ្ជូនទំនិញគ្រោះថ្នាក់ ប្រកបដោយសុវត្ថិភាព។ សិក្ខាកាម ដែលបានចូលរួម បានទទួលនូវអត្ថប្រយោជន៍ជាច្រើន រួមមាន៖ (១) ចំណេះដឹងជាមូលដ្ឋានអំពីកម្រិតនៃទំនិញគ្រោះថ្នាក់ (២) ស្គាល់ពីប្រភេទនៃការវេចខ្ចប់ទំនិញគ្រោះថ្នាក់ (Packing Group of Dangerous Goods) (៣) យល់ដឹងពីរបៀបសម្គាល់ប្រភេទទំនិញគ្រោះថ្នាក់ (៤) យល់ដឹងពីរបៀបបិទស្លាកសម្គាល់ និង (៥) មានលទ្ធភាពយកចំណេះដឹងដែលទទួលបានពីសិក្ខាសាលា សម្រាប់បំពេញការងារក្នុងអង្គភាពរបស់ខ្លួន។ សូមរំលឹកផងដែរថា៖ សិក្ខាសាលានេះ គឺជាសិក្ខាសាលាបន្ដ ពីសិក្ខាសាលា ស្ដីពីសញ្ញាណទូទៅនៃទំនិញគ្រោះថ្នាក់ ដែលបានរៀបចំកាលពី ថ្ងៃទី៣០ ខែវិច្ឆិកា ឆ្នាំ២០២៣ កន្លងទៅ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube