បងប្អូនរៀបចំតង្វាយដើម្បីសំពះព្រះខែ និងអកអំបុក ហើយឬនៅសម្រាប់យប់នេះ? នារាត្រីថ្ងៃទី២ នៃព្រះរាជពិធីបុណ្យអុំទូក ដែលត្រូវជាថ្ងៃឧបោសថសីល ពេញបូណ៌មី ១៥កើត ខែកត្តិក បើតាមទំនៀមរបស់ដូនតាខ្មែរយើងតាំងពីបុរាណរៀងមក គឺមានរៀបចំពិធីសំពះព្រះខែ និងអកអំបុក។ កិច្ចពិធីនេះធ្វើឡើងដើម្បីរម្លឹកដល់ ព្រះបរមពោធិសត្វ ដែលបានយោងយកកំណើតជាទន្សាយ “សសបណ្ឌិត” ដោយគ្រានោះ ព្រះអង្គបានលះបង់អាយុសង្ខារដល់ព្រះឥន្ទ្រាធិរាជ ដើម្បីបំពេញទានបារមី។ ដោយអំណាចនៃការធ្វើទាននេះ រូបទន្សាយពោធិសត្វ បានចារិកជាប់នៅក្នុងមណ្ឌលព្រះចន្ទ តាំងពីកាលនោះមក ហើយមនុស្សគ្រប់រូបក៏មើលឃើញរូបទន្សាយច្បាស់ នៅក្នុងយប់១៥កើត ពេញបូណ៌មី នេះឯង។ មួយអន្លើទៀត គឺដើម្បីជាការសាទរនឹងភោគផលកសិកម្ម ដែលទើបប្រមែប្រមូលថ្មីៗ នៅក្នុងរដូវរំហើយនេះ រួមមាន ស្រូវអង្ករ (ដែលយកមកធ្វើអំបុក) ចេក ដូង ដំលូង សាគូ ត្រាវ ស្ករផែន និង ស្កររងូ ជាដើម ។ល។ ក្នុងឱកាសនៃការប្រារព្ធពិធីសំពះព្រះខែ និងអកអំបុក នារាត្រីនេះ យើងខ្ញុំសូមជូនពរដល់បងប្អូនប្រជាពលរដ្ឋខ្មែរគ្រប់រូប សូមទទួលបាននូវសេចក្តីសុខចម្រុងចម្រើន ភ្លឺថ្លាត្រជាក់ត្រជុំ ប្រៀបបានពន្លឺព្រះចន្ទពេញបូណ៌មី គិតគូរប្រកបកិច្ចការអ្វី សូមឱ្យបានដូចសេចក្តីប្រាថ្នា។ ជាពិសេស សូមចូលរួមទាំងអស់គ្នាក្នុងការថែរក្សា វប្បធម៌ ទំនៀមទំលាប់ ប្រពៃណី ដ៏ផូរផង់របស់ជាតិយើង៕