ប្រទីបក្រសួងសាធារណការ និងដឹកជញ្ជូន នារាត្រីថ្ងៃទី១​ នៃព្រះរាជពិធីបុណ្យអុំទូក​ អកអំបុក​ បណ្តែតប្រទីប​ និងសំពះព្រខែ បងប្អូនដឹងទេថា! ប្រទីបក្រសួងសាធារណការ និងដឹកជញ្ជូន រចនាឡើងបង្កប់នូវអត្ថន័យខ្លឹមសារអ្វីខ្លះ?​ ប្រទីបក្រសួងសាធារណការ និងដឹកជញ្ជូនមានអត្ថន័យបង្ហាញ អំពីការអភិវឌ្ឍរីកចម្រើនលើហេដ្ឋារចនាសម្ព័ន្ធ មធ្យោបាយ និងសេវាដ៏សម្បូរបែបក្នុងវិស័យសាធារណការ និងដឹកញ្ជូន រួមមាន ការដឹកជញ្ជូន​តាម​ផ្លូវគោក ផ្លូវដែក ផ្លូវទឹក ផ្លូវសមុទ្រ កំពង់ផែ ប្រព័ន្ធភស្តុភារកម្ម និងប្រព័ន្ធចម្រោះទឹក​កខ្វក់។ ទី១៖ រូបសញ្ញាក្រសួងសាធារណការ និងដឹកជញ្ជូន ស្ថិតនៅ​ចំកណ្តាល ទ្រដោយក្បាច់ភ្ញីភ្លើង រំលេចពាក្យស្លោក ​“អរគុណសន្តិភាព” ពីខាងក្រោម និងអមដោយទង់ជាតិ​មួយគូជានិមិត្តរូប តំណាងឱ្យស្ថាប័នក្រសួងដែលមានសមត្ថកិច្ច និងបំពេញមុខងារជាសេនាធិការឱ្យ​រាជរដ្ឋា-ភិបាលកម្ពុជា ក្នុងបេសកកម្មដឹកនាំ និងគ្រប់គ្រងលើវិស័យសាធារណការ និងដឹកជញ្ជូន ក្នុងគោលដៅអភិវឌ្ឍន៍​សេដ្ឋកិច្ច និងលើកកម្ពស់ជីវភាពរស់នៅរបស់ប្រជាជន។ រូប «ព្រះវិស្ណុ»ខាងក្នុង តំណាងឱ្យមហិទ្ធិឫទ្ធិតេជៈបារមីក្នុងវិស័យសំណង់វិស្វកម្មរបស់ជាតិក្នុងការរចនាប្លង់សាងសង់ ការពារថែរក្សា​និងឃុំគ្រងឱ្យបានរឹងមាំ គង់វង្សនិងឋិតថេរយូរអង្វែងនូវស្នាដៃនិងសំណង់ស្ថាបត្យកម្ម វិស្វកម្ម វប្បធម៌ រូបិយ ព្រមទាំង​សំណង់អច្ឆរិយៈនានារបស់ដូនតាខ្មែរដែលបានបន្សល់ទុកជាកេរ្តិ៍មរតកដ៏មានតម្លៃរបស់មនុស្សជាតិ។ ទី២៖ នាគក្បាលបី នៅសងខាងប្រទីប តំណាងឱ្យភាពត្រជាក់ត្រជុំ ជ័យជម្នះ និងសុខសុភមង្គល សម្រាប់​ប្រជាពលរដ្ឋកម្ពុជា និងជានិមិត្តរូបដ៏មានមហិទ្ធិឫទ្ធិ និងស័ក្តិសិទ្ធិ ក្នុងការថែរក្សា និងការពាប្រឆាំងនឹងខ្មាំងសត្រូវ ទាំងរូបិយ និងអរូបិយ កាពារនូវសំណង់ប្រាសាទ ធនធានទ្រព្យសម្បត្តិជាតិ ប្រជាពលរដ្ឋ និងទឹកដីនៃព្រះរាជាណាចក្រកម្ពុជា។ ទី៣៖ ផ្លូវថ្នល់ តំណាងឱ្យប្រព័ន្ធហេដ្ឋារចនាសម្ព័ន្ធផ្លូវថ្នល់ ដែល​បាននិង​កំពុងអភិវឌ្ឍរីកចម្រើន​ និងមាន​ភាព​​ប្រទាក់ក្រឡាខ្វាត់ខ្វែង​នៅទូទាំងប្រទេស ទាំងនៅទីក្រុង និងទីជនបទ និងសមិទ្ធផលថ្មីៗ ដូចជា​ ផ្លូវល្បឿនលឿនភ្នំពេញ-ក្រុងព្រះសីហនុ ដែល​ជាផ្លូវល្បឿនលឿនដំបូងរបស់កម្ពុជានិងបានកំពុងប្រើប្រាស់ រួមជាមួយនឹងផ្លូវល្បឿនលឿន​​​សំខាន់ៗផ្សេងទៀត ដែលបាននិងកំពុង​សាងសង់ និងត្រៀមអនុវត្តនាពេលអនាគតខាងមុខនេះ ដើម្បីរួមចំណែក​​ក្នុងការសម្រួល​​ដល់​​ការ​ធ្វើដំណើរ និងការ​ដឹកជញ្ជូនផ្សេងៗប្រកបដោយសុវត្ថិភាព និងប្រសិទ្ធភាពខ្ពស់។ ទី៤៖ រថភ្លើង តំណាងឱ្យសេវាដឹកជញ្ជូនតាមផ្លូវដែក ដែលត្រូវបានសាងសង់ ជួសជុល និងដាក់ឱ្យប្រើប្រាស់​ឡើងវិញ បន្ទាប់ពីត្រូវបានទទួលរងនូវការបំផ្លិចបំផ្លាញស្ទើរទាំងស្រុងក្នុងរបបកម្ពុជាប្រជាធិបតេយ្យ។ ជាមួយគ្នានេះ​ រថភ្លើងល្បឿនលឿន ក៏ជានិមិត្តរូបតំណាងឱ្យផែនការអភិវឌ្ឍនាពេលអនាគត រួមមាន គម្រោងធ្វើទំនើបកម្មប្រព័ន្ធ​ដឹកជញ្ជូន​​តាមផ្លូវដែករបស់កម្ពុជាដែលមានស្រាប់ និងគម្រោងសាងសង់ផ្លូវដែកថ្មីក្នុងរាជធានីភ្នំពេញ និងតភ្ជាប់ទៅអាកាស​យានដ្ឋានអន្តរជាតិថ្មី និងតំបន់ប៉ូលសេដ្ឋកិច្ចជាតិសំខាន់ៗ។ ទី៥៖ កប៉ាល់​ដឹកទំនិញ តំណាងឱ្យការតភ្ជាប់តាមផ្លូវទឹក ផ្លូវសមុទ្រ និងកំពង់ផែរបស់កម្ពុជា ជាមួយបណ្តាប្រទេសនានានៅក្នុងតំបន់ និងអន្តរជាតិ តាមរយៈការបង្កើនសមត្ថភាពកំពង់​ផែ ដើម្បី​បម្រើឱ្យការនាំចេញ-នាំចូលទំនិញគ្រប់ប្រភេទប្រកបដោយប្រសិទ្ធភាព​នាពេល​បច្ចុប្បន្ន និងអនាគត។ ទី៦៖ ស្ពានត្សឹបាសា ឬហៅថា ស្ពានអ្នកលឿង តំណាងឱ្យហេដ្ឋារចនាសម្ព័ន្ធ​ស្ពានដែលវែងជាងគេនៅកម្ពុជា ឆ្លងកាត់ទន្លេមេគង្គ មានប្រវែង ២២១៥ម៉ែត្រ។ ស្ពាននេះគឺជាផ្នែកមួយដ៏សំខាន់​ក្នុងការ​តភ្ជាប់ជាមួយ​ផ្លូវអាស៊ាន​ហាយវ៉េធំៗ និង​ការតភ្ជាប់​ប្រព័ន្ធដឹកជញ្ជូន​នៃរបៀងសេដ្ឋកិច្ចភាគខាងត្បូងរបស់មហាអនុតំបន់មេគង្គដ៏មានសក្តានុពល។ ទី៧៖ អគារស្ថានីយច្រកទ្វារព្រំដែនអន្តរជាតិស្ទឹងបត់-បានណងអៀន តំណាងឱ្យច្រកព្រំដែនសេដ្ឋកិច្ចថ្មី​​មួយ​បន្ថែមទៀតរបស់កម្ពុជាដែល​មានមុខងារ​សម្រួល និងបង្កើនទំហំពាណិជ្ជកម្ម ទេសចរណ៍ និងវិនិយោគឆ្លងកាត់​ព្រំដែនរវាងកម្ពុជា-ថៃ។ ច្រកទ្វារព្រំដែនអន្តរជាតិថ្មីនេះ គឺជាចក្ខុវិស័យដ៏វែងឆ្ងាយរបស់រាជរដ្ឋាភិបាល​ក្នុងការ​ពង្រីក​​​សកម្មភាព​​ពាណិជ្ជកម្មឆ្លងកាត់ព្រំដែនជាអន្តរជាតិ និងតភ្ជាប់អាស៊ាន។ ទី៨៖ វិទ្យាស្ថានតេជោសែន សាធារណការ និងដឹកជញ្ជូន តំណាងឱ្យគ្រឹះស្ថានបណ្តុះបណ្តាល អភិវឌ្ឍន៍ និងកសាងធនធានមនុស្សលើវិស័យសាធារណការ និងដឹកជញ្ជូន។ វិទ្យាស្ថាននេះបាននិងកំពុង​ធ្វើការបណ្តុះបណ្តាល​​សិស្ស និស្សិត និងមន្រ្តីរាជការ ដោយ​ផ្តោតលើជំនាញបច្ចេកទេសសំខាន់ៗ​ពាក់ព័ន្ធនឹងសំណង់ផ្លូវ-ស្ពាន សំណង់​កំពង់ផែ និងការគ្រប់គ្រងប្រព័ន្ធដឹកជញ្ជូននិងភស្តុភារកម្ម។ https://facebook.com/590238303287168/posts/664898095821188