បន្ទាយមានជ័យៈ រដ្ឋបាលក្រុងសិរីសោភ័ណ បានចេញសេចក្ដី ជូនដំណឹង ស្តីពីការរៀបចំសណ្តាប់ធ្នាប់ របៀបរៀបរយ ក្នុងក្រុង ក្នុងនោះតម្រូវឱ្យរុះរើ និងកាត់សំណង់រំលោភលើដីចំណីផ្លូវជាតិលេខ ៥៦ A ជំហានដំបូង ចាប់ពីចំណុចភូមិ កងវ៉ា សង្កាត់កំពង់ស្វាយ មកក្នុងខេត្ត ដល់ចំណុចភ្លើងស្តុបទី១ (បំបែកផ្លូវជាតិលេខ៥ និងផ្លូវជាតិលេខ៥៦ ) ភូមិសូភី សង្កាត់កំពង់ស្វាយ នាប៉ែកខាងជើងក្រុង ។ លោក ស្រេង សូផល អភិបាលក្រុងសិរីសោភ័ណ រួមដំណើរដោយអភិបាលរង ២ រូប កាលពីថ្ងៃទី ១៤ ខែវិច្ឆិកា ឆ្នាំ២០២៤ បានដឹកនាំមន្ត្រីអាជ្ញាធរ មន្ត្រីជំនាញ យុវជន បានចុះវាស់វែងអ័ក្សផ្លូវ ក្រោមលក្ខណៈបច្ចេកទេសថា ដីចំណីផ្លូវ (ពីចំណុចអ័ក្សកណ្តាល ផ្លូវ ទៅចិញ្ចើម) មានប្រវែងខុសគ្នា ពោលគឺ ផ្លូវជាតិលេខ៥៦ នេះ ដីចំណីផ្លូវ ខាងកើត ប្រវែង ១៥ ម៉ែត្រ។ រីឯដីចំណីផ្លូវទៅខាងលិច ប្រវែង ២៥ ម៉ែត្រ ។ ក្នុងនោះ តម្រូវឱ្យ ប្រជាពលរដ្ឋ ម្ចាស់ក្រុមហ៊ុន សហគ្រាស អាជីវករ ពាណិជ្ជករ ដែលមានការសាងសង់ តម្រូវឱ្យរុះរើ ឬកាត់ការសាងសង់ សំណង់ សំយាប រោង តូប ផ្ទះ ស្លាកយីហោ ការដាក់ តាំងទំនិញលក់ដូ រនិងការចតយានយន្តគ្រប់ប្រភេទ ដែលធ្វើឱ្យខូចសណ្តាប់ធ្នាប់ របៀប រៀបរយសាធារណៈ មានការកកស្ទះចរាចរណ៍ គ្រោះថ្នាក់ចរាចរណ៍ និងសោភ័ណភាព ក្រុង គឺឱ្យកាត់ ឬរុះរើយកត្រឹមប្រវែង ១ ម៉ែត្រ គិតពីបង្គោលភ្លើងអគ្គិសនី ទៅខាងក្រៅ។ លិខិតលេខ១៨១ សជណ ចុះថ្ងៃទី ១៤ ខែវិច្ឆិកា ឆ្នាំ២០២៣ បានណែនាំថា សូមបងប្អូនចូលរួមស្ម័គ្រចិត្តរុះរើ ដោយខ្លួនឯង គិតចាប់ពីចេញសេចក្តីជូនដំណឹងនេះ រហូតដល់ថ្ងៃទី ២៤ ខែវិច្ឆិកា ឆ្នាំ២០២៣ ខាងមុខ ហើយណែនាំដល់ប្រជាពលរដ្ឋ ដែលធ្វើសំយ៉ាប និងតូបសំណង់ផ្សេងៗ ដែលធ្វើរំលោភ ទៅលើចំណីផ្លូវជាតិលេខ៥៦ ត្រូវរុះរើចេញដោយខ្លួនឯង ចាប់ពីថ្ងៃជូនដំណឹងតទៅ។ ពោលគឺ រៀបចំសណ្តាប់ធ្នាប់ និងការពារសុវត្ថិភាព និងគ្រោះថ្នាក់ចរាចរណ៍ កើតឡើង និងតាមដងផ្លូវ ឱ្យមានសោភ័ណ ភាព និងសណ្តាប់ធ្នាប់ល្អ លោកបានដឹកនាំមន្ត្រីជំនាញ ចុះវាស់វែងអក្ខផ្លូវ និងមានវិធាន ការចំពោះអ្នកដែលធ្វើសំយ៉ាប និងតូបសំណង់ផ្សេងៗ រំលោភលើចំណីផ្លូវ។ លោក ស្រេង សុផល បានបន្តថា ការអនុវត្តនេះ គឺយោងការណែនាំ និងលិខិតពីរដ្ឋបាល ខេត្តបន្ទាយមានជ័យ លេខ៦២០ /សជណ ២៣ ចុះថ្ងៃទី ១៤ ខែកញ្ញា ឆ្នាំ២០២៣ ចុះហត្ថលេខាដោយលោក អ៊ុំ រាត្រី អភិបាលខេត្តបន្ទាយមានជ័យ ។ សូមរំលឹកថា កន្លងមក ក្នុងឆ្នាំ២០២៣ នេះ (ក្រោយបោះឆ្នោតជ្រើសតាំងតំណាងរាស្ត្រ ខែកក្កដា ឆ្នាំ២០២៣) រដ្ឋបាលក្រុងប៉ោយប៉ែត និងសង្កាត់អូរជ្រៅ ប៉ោយប៉ែត ផ្សារកណ្តាល បានអនុវត្តដោយអន្លើ នូវវិធានការតម្រូវឱ្យរុះរើ ឬកាត់ការសាងសង់សំណង់ សំយាប រោង តូប ផ្ទះ ស្លាកយីហោ ការដាក់តាំងទំនិញលក់ដូរ និងការចតយានយន្ត គ្រប់ ប្រភេទ ដែលធ្វើឱ្យខូចសណ្តាប់ធ្នាប់ របៀបរៀបរយសាធារណៈ មានការកកស្ទះ ចរាចរណ៍ គ្រោះថ្នាក់ចរាចរណ៍ និងសោភ័ណភាពក្រុង ពោលគឺ អនុវត្តនៅកំណាត់ផ្លូវខ្លះ ដែលមានការរំលោភ និងចង្អៀតខ្លាំង ។ វិធានការនោះ បានទទួលលទ្ធផលមួយចំនួន ៕