[Cambodia Morning Post] - ស្ពានកោះពេជ្រ-កោះនរា នឹងបើកសម្ពោធជាផ្លូវការនៅថ្ងៃទី១៥ វិច្ឆិកា ២០២៣ខាងមុខនេះ
ភ្នំពេញ ៖ ទីបំផុត ស្ពានតភ្ជាប់កោះពេជ្រ កោះ នរានឹងដាក់សម្ពោធជាផ្លូវការនៅថ្ងៃទី១៥ វិច្ឆិកា ២០២៣ ក្រោមអធិបតីភាពសម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ពោលគឺតាមការសន្យារបស់រាជរដ្ឋាភិបាលនាពេលកន្លងមកថាស្ពាននេះ នឹងត្រូវដាក់សម្ពោធឱ្យប្រើប្រាស់នៅមុនពិធីបុណ្យអុំទូក បណ្ដែតប្រទីប អកអំបុក និងសំពះខែ ។
ស្ពានកោះពេជ្រ កោះនរា ជាប្រភេទស្ពានខ្សែកាប មានប្រវែង ប្រមាណ៥០០ម៉ែត្រ និងទទឹង២៤,៥ម៉ែត្រ ដែលបានចំណាយថវិកាសាងសង់ប្រមាណជិត៤០លានដុល្លារអាមេរិក ដោយចំណាយពេលសាងសង់រយៈពេលជាង៣០ខែ ។
ស្ពានេះបានបើកការដ្ឋានសាងសង់កាលពីចុងឆ្នាំ ២០២០កន្លងទៅហើយស្ពាននេះ បានជួយសម្រួលចរាចរណ៍រវាងអ្នករស់នៅតំបន់ច្បារអំពៅ បឹងស្នោរ វាលស្បូវជាដើម ដែលកន្លងមកពលរដ្ឋចេញចូលភ្នំពេញគឺមានច្រកតែមួយគត់គឺស្ពានក្បាលថ្នល់ ឬមិនអញ្ចឹងពួកគាត់អាចជិះវាងទៅផ្លូវរោងចក្រស្រាបៀរថាយហ្គ័រ ទៅតាខ្មៅ ដែលត្រូវប្រើពេលយូរ ។ នៅពេលស្ពានកោះពេជ្រ កោះនរាសង់រួចនិងដាក់ដំណើរការ ប្រជាពលរដ្ឋនៅតំបន់ច្បារអំពៅ វាលស្បូវ និង បឹងស្នោរនឹងលែងព្រួយបារម្ភពីការកកស្ទះចរាចរណ៍ទៀតហើយ ដោយពួកគាត់មានជម្រើសពីរទី១ទៅឆ្លងស្ពានក្បាលថ្នល់ដដែលឬក៏អាចឆ្លងស្ពានកោះពេជ្រ កោះនរា ៕
