ភ្នំពេញ ៖ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងថា ផ្លូវល្បឿន លឿនភ្នំពេញ-ក្រុងព្រះសីហនុ ជាគំរូម៉ូឌែលហិរញ្ញប្បទានក្រោម ទម្រង់កិច្ចសន្យាភាពជាដៃគូរវាង រដ្ឋនិងឯកជន ដែលជាមូលដ្ឋាន ក្នុងការអនុវត្តគម្រោងសាងសង់ផ្លូវល្បឿនលឿនដទៃទៀត ដើម្បីជួយលើកកម្ពស់ប្រសិទ្ធភាព និងភាពងាយស្រួលនៃការធ្វើដំណើរ និងការដឹកជញ្ជូនផ្សេងៗរបស់បងប្អូនប្រជាពលរដ្ឋ។ ថ្លែងក្នុងពិធីអបអរសាទរខួប ១ឆ្នាំ នៃការបើកឱ្យប្រើប្រាស់ជាផ្លូវការ ផ្លូវល្បឿនលឿនភ្នំពេញ-ក្រុងព្រះសីហនុ ថ្ងៃទី០៧ ខែវិច្ឆិកា ឆ្នាំ២០២៣ ឯកឧត្តម ប៉េង ពោធិ៍នា បានមានប្រសាសន៍ថា ផ្លូវល្បឿន លឿនភ្នំពេញ-ក្រុងព្រះសីហនុ គឺជាផ្លូវល្បឿនលឿនទី១ដំបូងបង្អស់ មិនធ្លាប់មាននៅកម្ពុជា ក្រោមគំនិតផ្តួចផ្តើម និងកិច្ចខិតខំប្រឹងប្រែងរបស់ សម្តេចអគ្គមហាសេនាបតីតេជោ ហ៊ុន សែន ដែលបានដឹកនាំរាជរដ្ឋាភិបាលនៅក្នុងអាណត្តិទី៦ ហើយក៏ជាកិច្ចខិតខំប្រឹងប្រែងរបស់ ឯកឧត្ដមឧបនាយករដ្ឋមន្ត្រី ស៊ុន ចាន់ថុល ផងដែរ ដែលបានសម្រេចនូវសមិទ្ធផលជាប្រវត្តិសាស្ត្ររបស់កម្ពុជានេះឡើង។ ឯកឧត្តម ប៉េង ពោធិ៍នា បានបន្តថា ឯកឧត្តមឧបនាយករដ្ឋមន្ត្រីស៊ុន ចាន់ថុល ដែលបានខិតខំប្រឹងប្រែងយ៉ាងសកម្មជំរុញដំណើរការអនុវត្តគម្រោងសាងសង់ផ្លូវល្បឿនលឿន ភ្នំពេញ-ក្រុងព្រះសីហនុនេះ ប្រកបដោយជោគជ័យ និងទទួលបានការកោតសរសើរពីមហាជន ចាប់តាំងពីដំណាក់កាល ការចរចា ការចុះហត្ថលេខាលើអនុស្សរណៈ និងកិច្ចព្រមព្រៀងនានា និងរហូតឈានទៅសម្រេចបានការប្រកាស បើកការដ្ឋាន និងសម្ភោធបើកឱ្យប្រើប្រាស់ជាផ្លូវការកាលពីចុងឆ្នាំ២០២២កន្លងទៅ។ ឯកឧត្តម បានបញ្ជាក់ថា ក្នុងនាមក្រសួងសាធារណការ សូមគាំទ្រ និងជំរុញលើក ទឹកចិត្តដល់ក្រុមហ៊ុនវិនិយោគរបស់ប្រទេសចិនដទៃទៀត ជាពិសេសក្រុមហ៊ុនសាជីវកម្មស្ពាន និងថ្នល់ចិន(CRBC) ឱ្យបន្តចូលរួមជាមួយរាជរដ្ឋាភិបាលក្នុងការបណ្តាក់ទុនវិនិយោគលើគម្រោងជាអាទិភាពផ្សេងៗទៀត ដែលរាជរដ្ឋាភិបាលបាននិងកំពុងពិនិត្យ និងពិភាក្សាត្រៀមដាក់ឱ្យអនុវត្តនាពេលឆាប់ៗខាងមុខ។ « គម្រោងសាងសង់ផ្លូវល្បឿនលឿនភ្នំពេញ-ក្រុងព្រះសីហនុនេះ គឺជាគម្រោងវិនិយោគហេដ្ឋារចនាសម្ព័ន្ធផ្លូវថ្នល់ដ៏ធំទី១ ដែលបាននាំមកឱ្យរាជរដ្ឋាភិបាល ជាពិសេសក្រសួង សាធារណការ និងដឹកជញ្ជូន អាចយកធ្វើជាបទពិសោធន៍ និងជាគំរូម៉ូឌែលហិរញ្ញប្បទានក្រោមទម្រង់កិច្ចសន្យា ភាពជាដៃគូរវាងរដ្ឋ និងឯកជន(PPP) ឬទម្រង់សាងសង់-ប្រតិបត្តិការ-ផ្ទេរ(BOT) ដើម្បីប្រើប្រាស់ជាមូលដ្ឋាន ក្នុងការពិនិត្យលទ្ធភាពបន្តផ្តួចផ្តើមអនុវត្តគម្រោងសាងសង់ផ្លូវល្បឿនលឿនដទៃទៀត ដូចជា ផ្លូវល្បឿនលឿន ភ្នំពេញ-ក្រុងបាវិត និងផ្លូវល្បឿនលឿនភ្នំពេញ-សៀមរាប-ប៉ោយប៉ែត រួមទាំងគម្រោងវិនិយោគលើវិស័យផ្លូវដែក និងផ្លូវទឹកផងដែរ ដោយឈរលើសក្តានុពលនៃផលចំណេញផ្នែកសេដ្ឋកិច្ច (EIRR) និងផ្នែកហិរញ្ញវត្ថុ (FIRR) » ។ សូមបញ្ជាក់ថា ផ្លូវល្បឿនលឿនភ្នំពេញ-ក្រុងព្រះសីហនុ ត្រូវបានប្រកាសបើកការដ្ឋានសាងសង់នៅថ្ងៃទី២២ ខែមីនា ឆ្នាំ២០១៩ និងបានសម្ពោធបើកឱ្យប្រើប្រាស់ជាផ្លូវការ នៅថ្ងៃទី០៩ ខែវិច្ឆិកា ឆ្នាំ២០២២។ ផ្លូវល្បឿនលឿននេះ មានប្រវែងសរុប ១៨៧គីឡូម៉ែត្រ ដែលត្រូវបាន វិនិយោគសាងសង់ដោយក្រុមហ៊ុន Cambodian PPSHV Expressway Co.,Ltd ដែលជាក្រុមហ៊ុនបុត្រសម្ព័ន្ធ របស់ក្រុមហ៊ុនសាជីវកម្មស្ពាន និងថ្នល់ចិន(CRBC) ក្រោមទម្រង់សាងសង់-ប្រតិបត្តិការ-ផ្ទេរ(BOT) និងប្រើប្រាស់ ថវិកាវិនិយោគសរុបប្រមាណ ២ ០១៩ លានដុល្លារអាមេរិក។ អនុលោមតាមកិច្ចព្រមព្រៀង សម្បទានដែលក្រុមហ៊ុន វិនិយោគបានចុះហត្ថលេខាជាមួយរាជរដ្ឋាភិបាលកម្ពុជា ផ្លូវល្បឿនលឿននេះ មានរយៈពេល ប្រតិបត្តិការ ៥០ឆ្នាំ ដែលក្នុងនោះ ក្រសួងសាធារណការ និងដឹកជញ្ជូន និងក្រសួងសេដ្ឋកិច្ច និងហិរញ្ញវត្ថុ ត្រូវដើរតួនាទីយ៉ាងសំខាន់ ក្នុងការត្រួតពិនិត្យការអនុវត្តកិច្ចព្រមព្រៀងសម្បទាន និងសកម្មភាពប្រតិបត្តិការរបស់ ក្រុមហ៊ុនវិនិយោគ ទាំងទៅលើការផ្តល់សេវា ការថែទាំ ការគ្រប់គ្រងសុវត្ថិភាព-សណ្ដាប់ធ្នាប់ចរាចរណ៍ និងការដាក់ ចេញ នូវគោលការណ៍ណែនាំ ផ្សេងៗ ដើម្បីជំរុញប្រតិបត្តិការឱ្យកាន់តែមានប្រសិទ្ធភាព។ ជាមួយគ្នានេះ រាជរដ្ឋាភិបាលក៏បានសម្រេចជាមួយ ក្រុមហ៊ុនវិនិយោគផងដែរ ក្នុងការកំណត់ការគិតកម្រៃសេវាប្រើប្រាស់ផ្លូវ (Toll Fee) ត្រឹម៨០%ប៉ុណ្ណោះ សម្រាប់រយៈពេល ០១ឆ្នាំដំបូងនៃការបើកឱ្យប្រើប្រាស់ ចាប់ពីថ្ងៃទី០១ ខែវិច្ឆិកា ឆ្នាំ២០២២ ដល់ ថ្ងៃទី៣១ ខែតុលា ឆ្នាំ២០២៣៕