ប្រទេសសមាជិកអាស៊ានប្តេជ្ញាពង្រឹងកិច្ចសហប្រតិបត្តិការប្រកបដោយប្រសិទ្ធភាពខ្ពស់ តាមរយៈការអនុវត្តផែនការមេតភ្ជាប់អាស៊ាន MPAC (MASTER PLAN ON ASEAN CONNECTIVITY) 2025 ទីស្តីការក្រសួង៖ ថ្ងៃព្រហស្បតិ៍ ១៣រោច ខែភទ្របទ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១២ ខែតុលា ឆ្នាំ២០២៣ ឯកឧត្តម ឡេង ធនយុទ្ធា រដ្ឋលេខាធិការ និងជាអ្នកសម្របសម្រួលថ្នាក់ជាតិ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានដឹកនាំមន្ត្រីជាន់ខ្ពស់ និងមន្រ្តីបង្គោលពាក់ព័ន្ធចូលរួមកម្មវិធី ថ្ងៃទី២ នៃសិក្ខាសាលាលើកទី២ ស្ដីពីការអនុវត្តផែនការមេតភ្ជាប់អាស៊ាន។ សិក្ខាសាលាថ្ងៃទី២ នេះ មាន H.E. M.I. Derry Aman តំណាងអចិន្ត្រៃយ៍នៃសាធារណរដ្ឋឥណ្ឌូនេស៊ីប្រចាំអាស៊ាន និងជាប្រធាន ACCC បានចូលរួមថ្លែងសុន្ទរកថាបើក និងមានការចូលរួមផ្ទាល់ពីតំណាងអគ្គនាយកដ្ឋានពាក់ព័ន្ធ មន្ត្រីបង្គោលថ្នាក់ជាតិ អង្គភាពដឹកនាំអនុវត្ត (LIBs) និងអង្គភាពអាស៊ានតាមវិស័យពាក់ព័ន្ធ មកពីបណ្ដាក្រសួង-ស្ថាប័នពាក់ព័ន្ធ ដូចជាក្រសួងសេដ្ឋកិច្ច និងហិរញ្ញវត្ថុ ក្រសួងអប់រំ យុវជន និងកីឡា ក្រសួងទេសចរណ៍ ក្រសួងពាណិជ្ជកម្ម និងក្រសួងប្រៃសណីយ៍ និងទូរគមនាគមន៍ តាមរយៈប្រព័ន្ធវីដេអូពីចម្ងាយ។ ជាថ្មីម្ដងទៀត សិក្ខាសាលាទាំង ២ ថ្ងៃនេះរៀបចំឡើងក្នុងគោលបំណង (១) ពិនិត្យវឌ្ឍភាពការងារប្រចាំឆ្នាំ ក្នុងការអនុវត្តផែនការមេ MPAC 2025 ពិនិត្យបញ្ហាប្រឈម និងជំហានបន្ទាប់ (២) ពិនិត្យ និងពិភាក្សាគំនិតផ្តួចផ្តើមថ្មី ដើម្បីជំរុញការអនុវត្តផែនការមេ MPAC 2025 និងត្រៀមរៀបចំរបៀបវារៈនៃការតភ្ជាប់អាស៊ានក្រោយឆ្នាំ២០២៥ ដោយពិភាក្សា និងលើកសំណើអំពីមធ្យោបាយដែលអាស៊ានអាចកៀរគរការគាំទ្រក្នុងការជំរុញការអនុវត្ត និងតាមដានគំនិតផ្តួចផ្តើម MPAC 2025 និង (៣) ផ្សារភ្ជាប់ជាមួយដៃគូសន្ទនា និងដៃគូខាងក្រៅផ្សេង។ ជាលទ្ធផលនៃកិច្ចពិភាក្សា អង្គសិក្ខាសាលាបានស្វែងយល់ពីការរួមបញ្ចូលគ្នា ដែលអាចកើតមានជាមួយនឹងការផ្តួចផ្តើមការតភ្ជាប់ផ្សេងទៀតតាមរយៈគំនិតផ្តួចផ្តើម/គម្រោងរួមគ្នា និងចែករំលែកទស្សនៈអំពីរបៀបពង្រឹងការប្រឹក្សា ACCC ប្រចាំឆ្នាំជាមួយ DPs និង OEPs ការចូលរួមជាមួយ DPs និង OEPs លើការតភ្ជាប់អាស៊ាន ព្រមទាំងពង្រឹងកិច្ចសហប្រតិបត្តិការប្រកបដោយប្រសិទ្ធភាពខ្ពស់៕