កិច្ចប្រជុំ និងសំណេះសំណាលជាមួយថ្នាក់ដឹកនាំ មន្ត្រីរាជការ និងមន្ត្រីកិច្ចសន្យា នៃអគ្គាធិការដ្ឋាន នាព្រឹកថ្ងៃពុធ ទី២០ ខែកញ្ញា ឆ្នាំ២០២៣ នៅទីស្តីការក្រសួង ឯកឧត្តម មួន វាសនា រដ្ឋលេខាធិការ នៃក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំ និងសំណេះសំណាលជាមួយ ថ្នាក់ដឹកនាំ មន្ត្រីរាជការ និងមន្ត្រីកិច្ចសន្យា នៃអគ្គាធិការដ្ឋាន ដោយមានការចូលរួមពីសំណាក់ ឯកឧត្តម ភួង ភិរុណ អនុរដ្ឋលេខាធិការ។ ឯកឧត្តមអគ្គាធិការ នៃអគ្គាធិការដ្ឋាន បានធ្វើសេចក្តីរាយការណ៍អំពី រចនាសម្ព័ន្ធការងារ ការគ្រប់គ្រងដឹកនាំ ការអនុវត្តការងារកន្លងមក និងទិសដៅអនុវត្តបន្ត។ ក្នុងនោះ ឯកឧត្តមអគ្គាធិការ ក៏បានលើកឡើងពីបញ្ហាប្រឈម និងសំណូមពរមួយចំនួនរបស់អគ្គាធិការដ្ឋាន ដើម្បីជូនអង្គពិធីបានជ្រាប។ ជាមួយគ្នានេះ ឯកឧត្តមរដ្ឋលេខាធិការ បានពិនិត្យ និងដោះស្រាយលើបញ្ហាប្រឈម និងសំណូមពរដែលបានលើកមកពិភាក្សាផងដែរ។ ទន្ទឹមនេះ ឯកឧត្តមអនុរដ្ឋលេខាធិការ ក៏បានពាំនាំនូវសេចក្តីនឹករលឹក និងប្រសាសន៍ផ្តាំផ្ញើរបស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ជូនដល់ថ្នាក់ដឹកនាំ មន្ត្រីរាជការ និងមន្ត្រីកិច្ចសន្យាទាំងអស់ ត្រូវរក្សាសាមគ្គីភាពផ្ទៃក្នុង បង្កើនកិច្ចសហការជាមួយអង្គភាពក្រោមឱវាទក្រសួង និងដៃគូសហការពាក់ព័ន្ធ រួមគ្នាប្រកាន់ខ្ជាប់ឱ្យបានត្រឹមត្រូវ នូវគោលការណ៍តាមបែបបទសីលធម៌ តម្លាភាព និងមានប្រសិទ្ធភាព ជាមន្ត្រីអធិការកិច្ច។ ចុងបញ្ចប់ ឯកឧត្តមរដ្ឋលេខាធិការ បានសម្តែងនូវការកោតសរសើរ ចំពោះការខិតខំប្រឹងប្រែងរបស់ថ្នាក់ដឹកនាំ និងមន្ត្រីរាជការ នៃអគ្គាធិការដ្ឋានផងដែរ៕