ពិធីបើកអង្គសិក្ខាសាលាពិនិត្យ និងពិភាក្សាលើសេចក្តីព្រាងកម្មវិធីបណ្តុះបណ្តាល និងការបណ្តុះបណ្តាលសាកល្បង នៃគម្រោងកសាងសមត្ថភាពស្ដីពីវិធីសាស្រ្តថែទាំ-ថ្នល់ ដើម្បីលើកកម្ពស់ហេដ្ឋារចនាសម្ព័ន្ធប្រកបដោយចីរភាព នៅបណ្ដាប្រទេសកម្ពុជា ឡាវ និងវៀតណាម ភ្នំពេញ៖ ថ្ងៃអង្គារ ១២រោច ខែស្រាពណ៍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១២ ខែកញ្ញា ឆ្នាំ២០២៣ ឯកឧត្តម ហឿន សំនៀង នាយកវិទ្យាស្ថានតេជោសែន សាធារណការ បានអញ្ជើញបើកអង្គសិក្ខាសាលា ពិនិត្យលើសេចក្ដីព្រាងកម្មវិធីបណ្ដុះបណ្ដាល និងកម្មវិធីបណ្ដុះបណ្ដាលសាកល្បង នៃគម្រោង “កសាងសមត្ថភាពស្ដីពីវីធីសាស្រ្តថែទាំ-ថ្នល់ ដើម្បីលើកកម្ពស់ហេដ្ឋារចនាសម្ព័ន្ធប្រកបដោយចីរភាព នៅបណ្ដាប្រទេសកម្ពុជា-ឡាវ-វៀតណាម ដោយមានការចូលរួមពី ថ្នាក់ដឹកនាំ និងមន្រ្តី នៃ រាជធានី-ខេត្ត ក្រុមប្រឹក្សាគម្រោង តំណាងវិទ្យាស្ថានមេគង្គ នៃព្រះរាជាណាចក្រថៃ តំណាងក្រសួងដឹកជញ្ជូន នៃប្រទេសវៀតណាម និង នៃប្រទេសឡាវ ព្រមទាំងសិក្ខាកាមចូលរួមប្រមាណជាង៦០នាក់។ ឯកឧត្តមនាយកវិទ្យាស្ថានបានថ្លែងថា ក្រុមការងាររបស់វិទ្យាស្ថានបានខិតខំប្រឹងប្រែងបំពេញការងារយ៉ាងសកម្ម ទាំងការងារស្នូល និងការស្វែងរកកិច្ចសហការ គាំទ្រពីដៃគូជាតិ និងអន្តរជាតិ ក្នុងគោលដៅឆ្ពោះទៅរកចក្ខុវិស័យរួម នោះគឺ “ការកសាង និងពង្រឹងធនធានមនុស្សក្នុង ”។ តាមរយៈសិក្ខាសាលានេះ គឺជាសក្ខីភាពនៃសមិទ្ធផលថ្មីមួយទៀត ដែលនឹងឈានឆ្ពោះទៅការរៀបចំវគ្គបណ្តុះបណ្តាលបច្ចេកទេសស្តីពីវិធីសាស្រ្តថែទាំ-ថ្នល់ មិនសម្រាប់តែប្រទេសកម្ពុជាប៉ុណ្ណោះទេ ប៉ុន្តែសម្រាប់ប្រទេសវៀតណាម និងឡាវ ផងដែរ។ សិក្ខាសាលានេះត្រូវការជាចាំបាច់នូវការចូលរួមចំណែកពីភាគីពាក់ព័ន្ធក្នុងការជួយពិនិត្យផ្ទៀងផ្ទាត់ ផ្តល់ធាតុចូល និងយោបល់បន្ថែម ទៅលើលទ្ធផលនៃការរៀបចំកម្មវិធីបណ្តុះបណ្តាល ដើម្បីកែលម្អឱ្យការរៀបចំវគ្គបណ្តុះបណ្ដាលជូនដល់សិក្ខាកាមគោលដៅនៃគម្រោងនេះកាន់តែល្អប្រសើរឡើង និងមានលក្ខណៈគ្រប់ជ្រុងជ្រោយ ព្រមទាំងផ្តល់ឱកាសដល់ប្រទេសទាំងបី ដើម្បីសិក្សាពីគ្នាទៅវិញទៅមក។ ឯកឧត្តមក៏បានថ្លែងអំណរគុណដល់មូលនិធិក្នុងក្របខណ្ឌកិច្ចសហប្រតិបត្តិការមេគង្គ-កូរ៉េ (MKCF) និងវិទ្យាស្ថានមេគង្គ (Mekong Institute) ដែលបានផ្តល់ឱកាសក្នុងការពិនិត្យ និងការវាយតម្លៃប្រកបដោយសុក្រឹតភាព និងបានជ្រើសរើសគម្រោងស្នើសុំរបស់វិទ្យាស្ថានតេជោសែន សាធារណការ នេះឡើង៕