កំណាត់ផ្លូវជាតិលេខ ៧៦ ក្នុងភូមិសាស្ត្រអូរងើយ ស្រុកអូរាំង ខេត្តមណ្ឌលគិរី ត្រូវបានផ្អាកចរាចរណ៍ជាបណ្ដោះអាសន្ន ចំពោះទាំងម៉ូតូ រថយន្តតូច និងរថយន្តធំ​ ដោយសារតែកាលពីយប់មិញ​ កំណាត់ផ្លូវមួយនេះបានបាក់ស្រុតទាំងស្រុងមិនអាចធ្វើដំណើរបាន។ អាស្រ័យហេតុនេះ អ្នកដែលត្រូវធ្វើដំណើរចេញចូលភ្នំពេញ-មណ្ឌលគិរី ត្រូវវៀងតាមផ្លូវជាតិ​លេខ​៧៦ ដដែល តែក្នុងទិសដៅផ្សេង ដែលចេញពីខេត្តមណ្ឌលគិរី ឆ្ពោះទៅតាមខេត្តរតនគិរី កាត់ខេត្តផ្សេងៗទៀត ដើម្បីទៅភ្នំពេញ។ បើតាមមន្ត្រីជំនាញនៃមន្ទីរសាធារណការ និងដឹកជញ្ជូនខេត្តមណ្ឌលគិរី បញ្ជាក់ថា ក្នុងអំឡុងពេលនៃការផ្អាកចរាចរណ៍​បណ្តោះ​អាសន្ននេះ សម្រាប់ប្រជាពលរដ្ឋដែលចង់ធ្វើដំណើរពីភ្នំពេញ មកមណ្ឌលគិរី ឬពីមណ្ឌលគិរី​ ទៅភ្នំពេញ ត្រូវ​វៀង​ទិស​ដៅ​ធ្វើដំណើរតាមផ្លូវជាតិលេខ ៧៦ ក្នុងទិសដៅផ្សេង តាមខេត្តរតនគិរី កាត់តាមស្ទឹងត្រែង ក្រចេះ ឬផ្លូវវៀងផ្សេងទៀត។ ចំណែកឯអ្នកដែលចង់ធ្វើដំណើរពីស្រុកកែវសីមា ទៅកាន់ខេត្តមណ្ឌលគិរី ក៏មិនអាចប្រើប្រាស់ផ្លូវមួយខ្សែនេះទៀតបានដែរ។ អំឡុងពេលនៃការស្តារនិងជួសជួលកំណាត់ផ្លូវជាតិក្នុងភូមិសាស្ត្រខាងលើ ចន្លោះ​គីឡូម៉ែត្រ៩២+០០០ ដល់​​គីឡូម៉ែត្រ​៩៥+០០០ មន្ទីរសាធារណការ​ និងដឹកជញ្ជូនខេត្តមណ្ឌលគិរី ស្នើសុំឱ្យអ្នកដែលចាំបាច់ប្រើប្រាស់កំណាត់ផ្លូវមួយខ្សែនេះ មានការយោគយល់។ មន្ទីរសាធារណការ​ និងដឹកជញ្ជូន ខេត្តមណ្ឌលគិរី បញ្ជាក់ដែរថា មន្ត្រីជំនាញ នឹងចាប់ផ្តើមការជួសជួល ឬធ្វើផ្លូវវៀងតាមនិតិវិធី នៅថ្ងៃនេះ ឬស្អែក ដើម្បីដោះស្រាយការធ្វើដំណើរជូនបងប្អូនប្រជាពលរដ្ឋឱ្យបានឆាប់រហ័សបំផុតតាមដែលអាចធ្វើបាន៕