កំពត: ខណ:ពេលដំណើរការស្ថាបនាផ្លូវវាងក្រុងកំពតជិតសម្រេចរួចរាល់ អ្នករស់នៅអមសងខាងផ្លូវមួយខ្សែនេះហាក់មានសង្ឃឹមឡើងវិញ ពិសេសសម្រាប់អាជីវកម្មផ្សេងៗដែលបានជួបក្តីលំបាកជាយូរមកហើយ។ រៀបរាប់ស្រដៀងគ្នា អ្នកទទួលខុសត្រូវនៅសណ្ឋាគារបេឡា និងម្ចាស់ហាងលក់គ្រឿងបន្លាស់រថយន្តអមសងខាងផ្លូវវាងក្រុងដែលមានទីតាំងក្នុងភូមិត្រពាំងធំ ឃុំត្រពាំងធំ ស្រុកទឹកឈូបានឱ្យដឹងថា យូរឆ្នាំមកហើយ ស្ថានភាពអាជីវកម្មរបស់ពួកគាត់មិនល្អសោះដោយសារផ្លូវធ្វើដំណើរមានភាពលំបាកខ្លាំង ដោយ រៀងរាល់ខែវស្សាទឹកលិចលង់ផ្លូវ និងមានជង្ហក់ជ្រៅៗ សូម្បីរថយន្តធុនធំក៏ពិបាកឆ្លងកាត់ រីឯរថយន្តធុនតូចគឺមិនអាចបើកបរបាន។ ចំណែកខែប្រាំងដីហុយរហូតធ្វើឱ្យមុខរបរអាជីវកម្មមួយចំនួនត្រូវបង្ខំចិត្តបិទទ្វារតែម្តង។ អ្នកទាំង២បានបន្តថា មកដល់ពេលនេះ ទោះបីផ្លូវសាងសង់មិនទាន់រួចរាល់១០០ភាគរយក្តី បើតាមការសង្កេតជាក់ស្តែងឃើញថាផ្លូវវាងក្រុងចាប់ផ្តើមមានសកម្មភាពចរាចរណ៍ច្រើនឡើងវិញ ដូច្នេះសង្ឃឹមថាក្រោយពីផ្លូវស្ថាបនារួចរាល់ អាជីវកម្មរបស់ពួកគាត់អាចនឹងបានប្រសើរឡើង។ លោក នាក់ ចិន វិស្វករប្រចាំការដ្ឋានសាងសង់បានប្រាប់ឱ្យដឹងថា ផ្លូវវាងក្រុងកំពតមានប្រវែង ៣.៦៧០ម៉ែត្រ កំពុងស្ថាបនាជាប្រភេទ DBSTនេះបានបើកការដ្ឋានសាងសង់កាលពីខែមេសា ឆ្នាំ២០២២ ហើយគ្រោងនឹងបញ្ចប់នៅខែធ្នូ ឆ្នាំ២០២៣។ ការស្ថាបនាបានគោរពតាមលក្ខណៈបច្ចេកទេសដោយមានការត្រួតពិនិត្យត្រឹមត្រូវ និងធានាភាពជាប់ធន់យូរជាងការសាងសង់ពីមុន។ សូមបញ្ជាក់ថា ផ្លូវវាងក្រុងកំពតជាផ្លូវសម្រាប់បញ្ចៀសរថយន្តធុនធំពីការបើកឆ្លងកាត់ក្រុង ផ្លូវនេះមានប្រវែងជិត៤គីឡូម៉ែត្រដោយបែកចេញពីផ្លូវជាតិលេខ៣ត្រង់ចំណុចក្បែរខ្លោងទ្វារចូលក្រុងកំពត រួចតភ្ជាប់ជាមួយផ្លូវជាតិលេខ៣៣ ត្រង់ចំណុចភូមិត្រពាំងធំ ឃុំត្រពាំងធំ ស្រុកទឹកឈូ។ នៅអមសងខាងផ្លូវវាងក្រុងមានអាជីវកម្មជាច្រើន ដូចជា យានដ្ឋានជួសជុល និងលក់គ្រឿងបន្លាស់រថយន្ត ភោជនីយដ្ឋាន អាហារដ្ឋាន និងកន្លែងកម្សាន្តពេលរាត្រីជាដើម។ បច្ចុប្បន្នកន្លែងអាជីវកម្មមួយចំនួនធំនៅបន្តបិទទ្វារដោយសារផ្លូវធ្វើដំណើរជួបការលំបាក៕​