ស្ទឹងត្រែង៖ ប្រជាពលរដ្ឋក្នុងសង្កត់ស្ទឹងត្រែង ក្រុងស្ទឹងត្រែង បានសម្តែងនូវមោទនភាព សប្បាយរីករាយចំពោះសមិទ្ធផលផ្លូវចាក់បេតុងជាច្រើនខ្សែ ដែលបានស្ថាបនារួចរាល់និងប្រគល់ជូនដល់ពួកគាត់បានប្រើប្រាស់ជាសាធារណៈចាប់ពីពេលនេះតទៅ ដែលជាអំណោយថវិការបស់រាជរដ្ឋាភិបាល ទម្លាក់មកអភិវឌ្ឍន៍ឃុំ សង្កាត់ ឆ្នាំ២០២៣។ ប្រជាពលរដ្ឋទាំងនោះ បានឱ្យដឹងថា ពីមុនកន្លែងនេះ ពុំមានប្រជាពលរដ្ឋច្រើនរស់នៅទេ ជាតំបន់ព្រៃ មានផ្លូវលំតូចចង្អៀត ទឹកហូរកាត់ដាច់ផ្លូវទៅជាជង្ហុកធំៗសម្រាប់ប្រជាពលរដ្ឋធ្វើដំណើរ ដោយថ្មើរជើងឆ្លងកាត់ម្តងម្កាលតែប៉ុណ្ណោះ។ ពួកគាត់បន្តថា ក្រោយមកផ្លូវនេះ ត្រូវបានអាជ្ញាធរសង្កាត់ធ្វើជាផ្លូវក្រាលក្រួសក្រហម ដើម្បីសម្រួលដល់ការធ្វើដំណើរជូនប្រជាពលរដ្ឋ។ ពលរដ្ឋទាំងនោះបានបន្ថែមទៀតថា ដោយមានការរីកចម្រើន ក្រោមការដឹកនាំពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ផ្លូវនេះត្រូវបានប្រែក្លាយទៅជាចាក់បេតុងតែម្តង។ នាពេលនោះដែរលោក ជា វណ្ណ ចៅសង្កាត់ក្រុងស្ទឹងត្រែង បានឱ្យដឹងថា បន្ទាប់ពីបានឯកភាពទាំងស្រុងពីប្រជាពលរដ្ឋ និងស្ថាប័នពាក់ព័ន្ធ ដែលបានពិនិត្យឯកភាពទៅលើសំណើគម្រោងរបស់សង្កាតរួចរាល់ហើយនោះ នៅខែកុម្ភៈ ឆ្នាំ២០២៣ គណៈកម្មការលទ្ធកម្មសង្កាត់បានរៀបចំដាក់ដំណើរការឱ្យដេញថ្លៃលើគម្រោងសាងសង់ផ្លូវបេតុងអាម៉េចំនួន២គម្រោង ១គម្រោងស្ថិតក្នុងភូមិព្រែក មានប្រវែង៣៣២ម៉ែត្រ ទទួលសាងសង់ដោយក្រុម សុធីរាជឃិនត្រាក់សិន ក្នុងតម្លៃ១៣១.៨០៤.០០០រៀល ក្នុងនោះប្រជាពលរដ្ឋភូមិព្រែកដែលរស់នៅតាមដងផ្លូវបានស្ម័គ្រចិត្របរិច្ចាគថវិកាចូលរួមធ្វើលូរំដោះទឹកប្រវែង២២៧ម៉ែត្រ លូមុខកាត់0,៦ម៉ែត្រផងដែរ អស់ថវិកាសរុប៣០លានរៀល។ ចំពោះគម្រោងទី២ស្ថិតក្នុងភូមិស្ពានថ្មមានប្រវែង៦៨៨ម៉ែត្រ ចាក់លូមុខកាត់ទំហំ១ម៉ែត្រ មានប្រវែង១០ម៉ែត្រ១កន្លែង សាងសង់ដោយក្រុមហ៊ុន ម៉ាត់ ហាសាន់ ក្នុងតម្លៃ៣០៩.៥៣៤.០០០រៀល។ លោកចៅសង្កាត់ បន្តថា សរុបជារួមនៅឆ្នាំ២០២៣នេះ សង្កាត់សម្រេចបានផ្លូវចាក់បេតុង២ខ្សែ ប្រវែង១.០២០ម៉ែត្រ ទទឹង៥ម៉ែត្រ ដាក់លូទោលកាត់ផ្លូវមុខកាត់១ម៉ែត្រ ប្រវែង១០ម៉ែត្រ១កន្លែង ចំណាយថវិកាមូលនិធិសង្កាត់ចំនួន៤៤១.៣៣៨.០០០រៀល។ ចំណែកលោក សាយ កុសល អភិបាលក្រុងស្ទឹងត្រែង ក៏បានសម្តែងនូវមោទនភាពផងដែរ ចំពោះសមិទ្ធនានា ដែងសង្កាត់ស្ទឹងត្រែងសម្រចបាន ដែលបានអនុវត្តន៍ចំទិសដៅក្នុងការប្រើប្រាស់ថវិកាដែលរាជរដ្ឋាភិបាល ទម្លាក់ជូនមកឃុំ-សង្កាត់ ដើម្បីអភិវឌ្ឍជូនប្រជាពលរដ្ឋក្នុងមូលដ្ឋាន ដែលខ្លួនគ្រប់គ្រងបានយ៉ាងល្អប្រសើរ។ លោកអភិបាលក្រុង ក៏ស្នើដល់ប្រជាពលរដ្ឋដែលរស់នៅតាមដងផ្លូវផងដែរ សូមមេត្តាចូលរួមជាមួយអាជ្ញាធរទាំអស់គ្នា ពេលអាជ្ញាចុះធ្វើផ្លូវប្រសិនបើប៉ះពាល់ផល ដូចជារបង តូប រាន ជាដើម សូមមានការចូលរួមបដិភាគ ខន្តី ដើម្បីផលប្រយោជន៍ទាំងអស់គ្នា។ ក្នុងឱកាសនេះផងដែរលោក ឡូយ សុផាត តំណាងរាស្ត្រមណ្ឌលខេត្តស្ទឹងត្រែង ក៏បានពាំនាំបណ្តាំសាកសួរសុខទុក្ខពីសម្តេច ហេង សំរិន សម្តេចតេជោនាយករដ្ឋមន្ត្រី ដែលសម្តេចតែងមានការនឹករឭកពីសុខ ទុក្ខ របស់បងប្អូនប្រជាពលរដ្ឋរបស់លោកគ្រប់ទីកន្លែងទាំងទីក្រុង និងជនបទដូចៗគ្នា ដែលធ្លាប់កម្សត់កម្រ និងទួលនូវការលំបាកវេទនាយ៉ាងធ្ងន់ធ្ងរ ជាមួយក្នុងពេលកន្លងមក ក្នុងសម័យខ្មែរក្រហម។ លោកតំណាងរាស្ត្រក៏បានបន្តថា សម្តេចតេជោ លោកបានគិតគូរណាស់ពីផលប្រយោជន៍ប្រជាពលរដ្ឋគ្រប់ទីកន្លែង ដែលឈានទៅដល់ដាក់ចេញជាផ្លូវការនូវយុទ្ធសាស្ត្រចតុកោណ ដែលជាយុទ្ធសាស្ត្រថ្មី និងប្រកបដោយប្រសិទ្ធភាព និងភាពជោគជ័យជូនប្រជាពលរដ្ឋ។ ក្នុងឱកាសនោះផងដែរ អ្នកតំណាងរាស្ត្រ ក៏ស្នើប្រជាពលរដ្ឋទាំងអស់គ្នា សូមទៅបោះឆ្នោតគ្រប់ៗគ្នា នៅថ្ងៃទី២៣ ខែកក្កដា ឆ្នាំ២០២៣ ខាងមុខនេះកុំបីខាន ដើម្បីការអភិវឌ្ឍប្រទេសជាតិយើងឆ្ពោះទៅមុខបន្តទៀត៕