កិច្ចប្រជុំពិគ្រោះយោបល់ជាមួយដៃគូអភិវឌ្ឍន៍ ស្តីពីការចូលរួមគាំទ្រដល់ការអនុវត្តគោលនយោបាយជាតិស្តីពីការអភិវឌ្ឍវិស័យយានយន្តអគ្គិសនី ២០២៤-២០៣០ ឱ្យកាន់តែមានប្រសិទ្ធភាព រាជធានីភ្នំពេញ៖ នាថ្ងៃសុក្រ ទី២០ ខែមិថុនា ឆ្នាំ២០២៥ ឯកឧត្តម នឹម សុធា អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុង "កិច្ចប្រជុំពិគ្រោះយោបល់ក្រៅផ្លូវការជាមួយដៃគូអភិវឌ្ឍន៍ ស្តីពីការចូលរួមគាំទ្រដល់ការអភិវឌ្ឍវិស័យយានយន្តអគ្គិសនីនៅកម្ពុជា" ដែលរៀបចំឡើងដោយលេខាធិការដ្ឋាននៃគណៈកម្មាធិការ គ.ល.គ.យ.អ. និងសម្របសម្រួលដោយអង្គការ EnergyLab Asia។ កិច្ចប្រជុំដ៏មានសារៈសំខាន់នេះ មានការចូលរួមពីតំណាងដៃគូអភិវឌ្ឍន៍សំខាន់ៗជាច្រើន រួមមាន តំណាងស្ថានទូតសហរដ្ឋអាមេរិកនៅកម្ពុជា ស្ថានទូតអូស្ត្រាលី (តាមរយៈកម្មវិធី CAPRED) LIECHTENSTEINISCHER ENTWICKLUNGS -DIENST (LED), ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA), ទីភ្នាក់ងារសហប្រតិបត្តិការអន្តរជាតិនៃប្រទេសកូរ៉េ (KOICA) ក្រុមហ៊ុនប្រឹក្សាបច្ចេកទេស SEVEA ព្រមទាំងថ្នាក់ដឹកនាំ និងមន្ត្រីជំនាញពាក់ព័ន្ធជាច្រើនរូបទៀត។ ថ្លែងក្នុងពិធីបើកកិច្ចប្រជុំ ឯកឧត្តមអនុរដ្ឋលេខាធិការ បានគូសបញ្ជាក់អំពីការប្តេជ្ញាចិត្តដ៏មុតមាំរបស់រាជរដ្ឋាភិបាល ក្នុងការជំរុញវិស័យយានយន្តអគ្គិសនី ដើម្បីរួមចំណែកដល់ការអភិវឌ្ឍសេដ្ឋកិច្ចបៃតង និងសម្រេចបាននូវគោលដៅនៃគោលនយោបាយជាតិស្ដីពីការអភិវឌ្ឍវិស័យយានយន្តអគ្គិសនី។ ឯកឧត្តមបានលើកឡើងថា ការចូលរួមគាំទ្រពីដៃគូអភិវឌ្ឍន៍ ទាំងផ្នែកបច្ចេកទេស ហិរញ្ញវត្ថុ និងការចែករំលែកបទពិសោធន៍ គឺជាកត្តាចាំបាច់ដែលមិនអាចខ្វះបាន ដើម្បីពន្លឿនការអនុវត្តគោលនយោបាយជាតិឱ្យទទួលបានជោគជ័យ។ កិច្ចប្រជុំបានផ្តោតលើការពិភាក្សា និងផ្លាស់ប្តូរយោបល់យ៉ាងផុសផុលលើរបៀបវារៈសំខាន់ៗ រួមមានវឌ្ឍនភាពនៃការអនុវត្តគោលនយោបាយជាតិស្តីពីការអភិវឌ្ឍវិស័យយានយន្តអគ្គិសនី ២០២៤-២០៣០ ការធ្វើផែនទីគាំទ្រ (Support Mapping) ដើម្បីកំណត់ពីសកម្មភាពដែលដៃគូអភិវឌ្ឍន៍កំពុង និងគ្រោងនឹងអនុវត្ត ព្រមទាំងកំណត់ពីចន្លោះប្រហោង និងកាលានុវត្តភាពសម្រាប់កិច្ចសហការ ការកំណត់អាទិភាព និងផ្លូវគន្លឹះ (Critical Path) ក្នុងការអនុវត្តវិធានការគោលនយោបាយ និងការស្វែងរកយន្តការសម្របសម្រួល និងចែករំលែកព័ត៌មានឱ្យកាន់តែមានប្រសិទ្ធភាពរវាងរាជរដ្ឋាភិបាល និងដៃគូអភិវឌ្ឍន៍។ ជាលទ្ធផល កិច្ចប្រជុំបានឯកភាពគ្នាលើការបង្កើតយន្តការពិគ្រោះយោបល់ជាប្រចាំ ដើម្បីសម្របសម្រួលរាល់ការគាំទ្រ និងធានាថាការអនុវត្តគម្រោងនានាមានភាពស៊ីសង្វាក់គ្នា ជៀសវាងការត្រួតស៊ីគ្នា និងឆ្លើយតបទៅនឹងតម្រូវការអាទិភាពរបស់រាជរដ្ឋាភិបាល៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube