ស្ថានីយប្រព្រឹត្ដិកម្មទឹកកខ្វក់ទី៣ នៅខេត្ដព្រះសីហនុ ដែលប្រើប្រាស់បច្ចេកវិទ្យាចុងក្រោយរបស់ប្រទេសអ៊ីស្រាអែលនឹងត្រូវបញ្ចប់ការសាងសង់១០០%នៅខែមិថុនា ឆ្នាំ២០២៣ ខាងមុខ។ នេះបើយោងតាមការចុះផ្សាយពីហ្វេសប៊ុកផេកផ្លូវការរបស់សម្ដេចតេជោហ៊ុន សែន នាយករដ្ឋមន្ដ្រីនៅមុននេះបន្ដិច។ ក្នុងនោះដែរនៅថ្ងៃទី៣០ ខែមេសា ឆ្នាំ២០២៣នេះ សម្ដេចតេជោ ហ៊ុន សែន ក៏បានអញ្ជើញពិនិត្យសមិទ្ធផល និងវឌ្ឍនភាពនៃការសាងសង់ស្ថានីប្រព្រឹត្ដិទឹកកក់ខ្វក់ខាងលើ ដែលមានទីតាំងស្ថិតនៅភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ។ តាមការបញ្ជាក់សានីយប្រព្រឹត្ដិទឹកកខ្វក់នេះបានប្រើប្រាស់បច្ចេកវិទ្យា Membrane Aerated Biofilm Reactor (MABR) ដែលជាបច្ចេកវិទ្យាចុងក្រោយរបស់ប្រទេសអ៊ីស្រាអែល ដែលអនុវត្តដោយក្រុមហ៊ុន Xwater Technology រយៈពេល ២២ខែ គ្រោងបញ្ចប់ការសាងសង់នៅខែមិថុនា ឆ្នាំ២០២៣ ខាងមុខ ខណៈគម្រោងនេះចំណាយទឹកប្រាក់អស់ប្រមាណ ២០លានដុល្លារ។ សូមជម្រាបផងដែរថា គម្រោងស្ថានីយ៍ប្រព្រឹត្តកម្មទឹកកខ្វក់ទី៣ នេះបានបើកការដ្ឋានសាងសង់កាលពីថ្ងៃទី១៨ ខែកញ្ញា ឆ្នាំ២០២១ ហើយការសាងសង់ឡើងក្នុងគោលបំណងដើម្បីបន្សុទ្ធទឹកកខ្វក់ ទឹកស្អុយ ឱ្យក្លាយជាទឹកដែលស្អាត ស្របតាមស្តង់ដារបរិស្ថាន មុននឹងបញ្ចេញចោលទៅក្នុងសមុទ្រ៕