កិច្ចប្រជុំកំណត់ផែនការយុទ្ធសាស្រ្តដឹកជញ្ជូនក្រុងកូឡាឡាំពួរ (Kuala Lumpur Transport Strategic Plan) ដើម្បីគាំទ្រដល់ការសម្រេចបាននូវចក្ខុវិស័យរបស់ សហគមន៍សេដ្ឋកិច្ចអាស៊ានឆ្នាំ២០២៥ (ASEAN Economic Community 2025) របស់ឧត្តមមន្រ្តីដឹកជញ្ជូនជាន់ខ្ពស់អាស៊ាន (STOM Task Force) ទីស្ដីការក្រសួង៖ ថ្ងៃចន្ទ ៧រោច ខែផល្គុន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៣ ខែមីនា ឆ្នាំ២០២៣ ឯកឧត្តម ឈៀង ពេជ្រ អគ្គនាយកនៃអគ្គនាយកដ្ឋានភ័ស្តុភារកម្ម ក្រសួងសាធារណការ និងដឹកជញ្ជូន បានអញ្ជើញចូលរួមកិច្ចប្រជុំលើកទី១ នៃក្រុមការងារចំពោះកិច្ចនៃឧត្តមមន្ត្រីដឹកជញ្ជូនជាន់ខ្ពស់អាស៊ាន (STOM Task Force) ដើម្បីពិនិត្យលើផែនការយុទ្ធសាស្រ្តដឹកជញ្ជូនកូឡាឡាំពួរ (Kuala Lumpur Transport Strategic Plan) (KLTSP) ដោយក្នុងនោះក៏មានការចូលរួមពីប្រទេសជាសមាជិកអាស៊ាន និងលេខាធិការដ្ឋានអាស៊ាន តាមរយៈប្រព័ន្ធវីដេអូពីចម្ងាយ។ កិច្ចប្រជុំនេះត្រូវបានរៀបចំឡើងក្នុងគោលដៅដើម្បីពិនិត្យលើទិដ្ឋភាពទូទៅ និងឯកសារជាគោលដៅជាក់លាក់ ក្នុងវិស័យដឹកជញ្ជូន នៃផែនការយុទ្ធសាស្ត្រដឹកជញ្ជូនកូឡាឡាំពួរ (KLTSP) ដែលផែនការយុទ្ធសាស្រ្តនេះមានគោលបំណងគាំទ្រដល់ការសម្រេចបាននូវចក្ខុវិស័យរបស់អាស៊ាន គឺសហគមន៍សេដ្ឋកិច្ចអាស៊ានឆ្នាំ២០២៥ (ASEAN Economic Community) 2025។ កិច្ចប្រជុំ លើកទី១នេះ បានយកចិត្តទុកដាក់យ៉ាងខ្លាំងលើ ពេលវេលា និងគោលដៅ សម្រាប់ ឧត្តមមន្រ្តីដឹកជញ្ជូនជាន់ខ្ពស់អាស៊ាន ដើម្បីពិនិត្យឡើងវិញនូវ ផែនការយុទ្ធសាស្រ្តដឹកជញ្ជូនកូឡាឡាំពួរ និងអភិវឌ្ឍផែនការយុទ្ធសាស្ត្រដឹកជញ្ជូនថ្មី បន្តពីផែនការយុទ្ធសាស្ត្រដឹកជញ្ជូនកូឡាឡាំពួរ (KLTSP 2016-2025)៕