សិក្ខាកាមប្រមាណ១១០នាក់ ចូលរួមវគ្គបណ្តុះបណ្តាលស្តីពី “ការងារលទ្ធកម្ម” និង “នីតិវិធីក្នុងការរៀបចំផែនការយុទ្ធសាស្ត្រថវិកា ផែនការថវិកា និងការអនុវត្តថវិកាកម្មវិធី” ដល់អង្គភាពក្រោមឱវាទក្រសួង សាធារណការ និងដឹកជញ្ជូន និងមន្ទីរទាំង២៥ រាជធានី-ខេត្ត សៀមរាប៖ ថ្ងៃចន្ទ ១រោច ខែមាឃ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី៦ ខែកុម្ភៈ ឆ្នាំ ២០២៣ ឯកឧត្តមអនុរដ្ឋលេខាធិការ ស៊ឹង សុគង់ តំណាងឯកឧត្តម សួង ហេង រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងកម្មវិធីបើកវគ្គបណ្តុះបណ្តាលស្តីពី៖ “ការងារលទ្ធកម្ម” និង “នីតិវិធីក្នុងការរៀបចំផែនការយុទ្ធសាស្ត្រថវិកា ផែនការថវិកា និងការអនុវត្តថវិកាកម្មវិធី” ដល់អង្គភាពក្រោមឱវាទក្រសួងសាធារណការ និងដឹកជញ្ជូន និងមន្ទីរទាំង២៥ រាជធានី-ខេត្ត ប្រមាណ១១០នាក់ ដោយមានការអញ្ជើញចូលរួមធ្វើបទបង្ហាញចែករំលែកពីឯកឧត្តម វង្ស រ៉ូដាវុឍ ទីប្រឹក្សាក្រសួងសេដ្ឋកិច្ច និងហិរញ្ញវត្ថុផងដែរ។ វគ្គបណ្តុះបណ្តាលនេះមានរយៈពេលពីរថ្ងៃ ចាប់ពីថ្ងៃទី៦ ដល់ថ្ងៃទី៧ ខែកុម្ភៈ ឆ្នាំ២០២៣ រៀបចំឡើង ក្នុងគោលបំណងពង្រឹងសមត្ថភាពសិក្ខាកាមទាំងអស់ឱ្យចេះអនុវត្តថវិកាកម្មវិធីពេញលេញរបស់អង្គភាពថវិកានីមួយៗ និងធ្វើឱ្យប្រសើរឡើងដល់ការប្រើប្រាស់ថវិកាជាតិ ប្រកបដោយប្រសិទ្ធភាព តម្លាភាព និងការចាត់ចែងថវិកាបានត្រឹមត្រូវ ច្បាស់លាស់ ពិសេសដំណើការនីតិវិធីចំពោះការអនុវត្តថវិកាកម្មវិធី ដែលជាផ្នែកមួយនៃការកែទម្រង់ផ្ទៃក្នុងស៊ីជម្រៅរបស់ក្រសួង អង្គភាពក្រោមឱវាទ អំពីការគ្រប់គ្រងហិរញ្ញវត្ថុសាធារណៈឈានចូលដល់ដំណាក់កាលទី៤ ជាគោលដៅក្នុងការបង្កើនគណនេយ្យភាព សមិទ្ធកម្ម ដោយបានរំពឹងថានឹងមានក្នុងរយៈពេល៥ឆ្នាំ (២០២២-២០២៦) លើគោលនយោបាយ អភិវឌ្ឍន៍ជាតិរបស់រាជរដ្ឋាភិបាល សមស្របទៅនឹងបរិការណ៍ នៃសកលភាវូបនីយកម្មទូទាំងតំបន់ និងនៅទូទាំងសកល។ ថ្លែងក្នុងសុន្ទរកថាបើកកម្មវិធីនាឱកាសនោះ ឯកឧត្តមអនុរដ្ឋលេខាធិការ បានថ្លែងអំណរគុណយ៉ាងជ្រាលជ្រៅចំពោះក្រសួងសេដ្ឋកិច្ច និងហិរញ្ញវត្ថុ ដែលបានសហការយ៉ាងជិតស្និទ្ធជាមួយក្រសួង សាធារណការ និងដឹកជញ្ជូន ធ្វើឱ្យវគ្គបណ្តុះបណ្តាលនៅថ្ងៃនេះលេចចេញជារូបរាងឡើង។  បន្ថែមពីលើនេះ ឯកឧត្តមអនុរដ្ឋលេខាធិការ បានគូសបញ្ជាក់ថា៖ បច្ចុប្បន្ននេះការអនុវត្តកម្មវិធីការកែទម្រង់ការគ្រប់គ្រងហិរញ្ញវត្ថុសាធារណៈ បានឈានចូលដំណាក់កាលទី៤ សំដៅបង្កើនការផ្សារភ្ជាប់ថវិកាទៅនឹងគោលនយោបាយអាទិភាពរបស់រាជរដ្ឋាភិបាល ហើយការអនុវត្តថវិកាកម្មវិធីពេញលេញរបស់អង្គភាពថវិកា ពិតជាមានសារ:សំខាន់ណាស់សម្រាប់សមាសភាពដែលអញ្ជើញមកពីអង្គភាពថវិកា រដ្ឋបាលកណ្តាល និងមន្ទីរសាធារណការ និងដឹកជញ្ជូនទាំង២៥ រាជធានី-ខេត្ត ដើម្បីពង្រឹងសមត្ថភាព និងលើកកម្ពស់ការយល់ដឹងបន្ថែម និងគាំទ្រដល់ប្រក្រតីភាព និងប្រសិទ្ធភាពនៃការអនុវត្តការងារនៅក្នុងអង្គភាពរបស់ខ្លួន។ ជាទីបញ្ចប់ ឯកឧត្តមអនុរដ្ឋលេខាធិការ បានជំរុញលើកទឹកចិត្តឱ្យសិក្ខាកាមទាំងអស់ផ្តោតការយកចិត្តទុកដាក់ស្វែងយល់ និងពិភាក្សាឱ្យកាន់តែស៊ីជម្រៅទៅលើការចង្អុលបង្ហាញពីសំណាក់គ្រូបង្គោល ដើម្បីទទួលបាននូវចំណេះដឹងថ្មីបន្ថែមទៀត សម្រាប់យកទៅអនុវត្តក្នុងការងារប្រចាំថ្ងៃសមស្របទៅតាមនីតិវិធី ដើម្បីប្រសិទ្ធភាពការងារខ្ពស់ និងផ្សព្វផ្សាយឱ្យកាន់តែទូលំទូលាយបន្ថែមទៀតនៅក្នុងអង្គភាពរបស់ខ្លួន៕