កិច្ចប្រជុំលើកទី១ នៃ Focal Group for Green Value Chain (FG-GVC) និងកិច្ចប្រជុំគណៈកម្មាធិការរួម សម្រាប់សហគមន៍សេដ្ឋកិច្ចអាស៊ាន លើកទី១៤ ឆ្នាំ២០២៣ ទីស្ដីការក្រសួង៖ នាព្រឹកថ្ងៃពុធ ១២រោច ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៨ ខែមករា ឆ្នាំ២០២៣ ឯកឧត្តម ឈៀង ពេជ្រ អគ្គនាយក នៃអគ្គនាយកដ្ឋានភស្តុភារកម្ម បានអញ្ជើញដឹកនាំក្រុមការងារចូលរួមកិច្ចប្រជុំចំនួន២៖ ១) កិច្ចប្រជុំលើកទី១ នៃ Focal Group for Green Value Chain (FG-GVC) និង ២) កិច្ចប្រជុំគណៈកម្មាធិការរួម សម្រាប់សហគមន៍សេដ្ឋកិច្ចអាស៊ាន លើកទី១៤ (CoW 14) ដោយកិច្ចប្រជុំទាំងពីរនេះក៏មានការចូលរួមពីមន្ត្រីជាន់ខ្ពស់នៃប្រទេសសមាជិកអាស៊ាន និងតំណាងពីស្ថាប័នពាក់ព័ន្ធ តាមរយៈការចូលរួមដោយផ្ទាល់ និងតាមប្រព័ន្ធវីដេអូពីចម្ងាយផងដែរ។ ជាលទ្ធផលសម្រាប់កិច្ចប្រជុំលើកទី១ នៃ FG-GVC នេះ៖ ១) បានយល់ព្រមលើអភិបាលកិច្ចរបស់ FC-GVC រួមទាំងការជ្រើសរើស អគ្គលេខាធិការរងអាស៊ាន(DSG) សម្រាប់សហគមន៍សេដ្ឋកិច្ចអាស៊ាន(AEC) ជាប្រធាន ២) បានពិភាក្សាលើសំណើ ដើម្បីជ្រើសរើសអនុប្រធាននៃ FG-GVC រួមទាំងការប្រើប្រាស់វិធីសាស្រ្តរួមគ្នា ដែលស្ថាប័នតាមវិស័យចូលរួមវេនក្នុងការទទួលយកតួនាទីនេះ ៣) ពិនិត្យមើលឡើងវិញនូវផែនការការងារអាស៊ានសម្រាប់ការពង្រឹងរបៀបវារៈ GVC (២០១៦-២០២៥) ៤) បានពិភាក្សាលើសេចក្តីព្រាងនៃផែនការការងារ GVC ដែលបានកែប្រែជំហានបន្ទាប់ FG-GVC ដើម្បីផ្តល់ការបញ្ចូលអន្តរកាលត្រឹមថ្ងៃទី២ ខែកុម្ភៈ ឆ្នាំ២០២៣។ សម្រាប់កិច្ចប្រជុំ CoW 14 រៀបចំឡើងដើម្បីពិភាក្សាអំពី៖ ១) បញ្ជីសមិទ្ធិភាព និងអាទិភាពប្រចាំឆ្នាំ២០២៣ នូវអន្តរសសរស្តម្ភ និង ២) គំនិតផ្តួចផ្តើមសំខាន់ៗនៅក្រោមការតភ្ជាប់ និងក្រុមប្រឹក្សាធុរកិច្ចដើម្បីកំណត់ផ្នែកនៃកិច្ចសហប្រតិបត្តិការ និងការគាំទ្រដែលត្រូវការសម្រាប់ស្ថាប័នពាក់ព័ន្ធ។ កិច្ចប្រជុំ ក៏បានពិនិត្យឡើងវិញនូវវឌ្ឍនភាពការងារក្នុងឆ្នាំ២០២២ កន្លងទៅ និងបានរៀបចំអាទិភាពប្រចាំឆ្នាំ២០២៣ (APs) សរុបចំនួន១២២ ដែលបានស្នើឡើង ក្នុងនោះក៏មានវិស័យដឹកជញ្ជូនចំនួន៨ ក្រោមការពង្រឹងការតភ្ជាប់ និងកិច្ចសហប្រតិបត្តិការតាមវិស័យផងដែរ៕