កិច្ចប្រជុំគណៈកម្មការសម្របសម្រួល (JCC) និងក្រុមការងារដើម្បីអនុវត្តគម្រោងពង្រឹងសមត្ថភាពរដ្ឋបាលកំពង់ផែ នៅព្រះរាជាណាចក្រកម្ពុជា ទីស្ដីការក្រសួង៖ នាព្រឹកថ្ងៃអង្គារ ១១រោច ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៧ ខែមករា ឆ្នាំ២០២៣ ឯកឧត្តម អៀង វ៉េងស៊ុន រដ្ឋលេខាធិការ ក្រសួងសាធារណការ និង ដឹកជញ្ជូន បានអញ្ជើញដឹកនាំកិច្ចប្រជុំគណៈកម្មការសម្របសម្រួល (JCC) និងក្រុមការងារដើម្បីអនុវត្តគម្រោងពង្រឹងសមត្ថភាពរដ្ឋបាលកំពង់ផែ នៅព្រះរាជាណាចក្រកម្ពុជា ដោយមានការអញ្ជើញចូលរួមពីឯកឧត្តម អនុរដ្ឋលេខាធិការ មន្ត្រីពាក់ព័ន្ធ ដែលជាសមាជិកគណៈកម្មការសម្របសម្រួលអនុវត្តគម្រោង មន្រ្តីជាន់ខ្ពស់តំណាងឱ្យ JICA ប្រចាំកម្ពុជា និងក្រុមជំនាញការជប៉ុនផងដែរ។ កិច្ចប្រជុំនេះរៀបចំឡើងដើម្បីពិនិត្យលើគោលបំណងនៃគម្រោងពង្រឹងសមត្ថភាពរដ្ឋបាលកំពង់ផែនិងស្តង់ដារបច្ចេកទេសកំពង់ផែនៅព្រះរាជាណាចក្រកម្ពុជា ព្រមទាំងសកម្មភាពការងាររបស់ក្រុមការងារអនុវត្តគម្រោង។ កិច្ចប្រជុំបានបន្តផ្លាស់ប្តូរមតិយោបល់លើដំណើរការអនុវត្តគម្រោង ពេលវេលា និងការងារដែលបានកំណត់ដើម្បីធ្វើឱ្យគម្រោងនេះដំណើរការទៅបានដោយជោគជ័យ។ ឯកឧត្តមរដ្ឋលេខាធិការ បានជំរុញលើកទឹកចិត្តឱ្យគណៈកម្មការសម្របសម្រួលអនុវត្តគម្រោង និងក្រុមការងារទាំងអស់បន្តសហការឱ្យបានជិតស្និទ្ធបន្តទៀត និងបញ្ចប់ភារកិច្ចការងារឱ្យបានឆាប់រហ័សតាមផែនការដែលបានកំណត់៕