ជំនួបសម្តែងការគួរសម និងពិភាក្សាការងារជាមួយគណៈប្រតិភូកំពង់ផែអាប៊ូដាប៊ី នៃប្រទេសអារ៉ាប់រួមអេមីរេត ទីស្តីការក្រសួង៖ នាថ្ងៃពុធ ទី១៣ ខែឧសភា ឆ្នាំ២០២៥ ឯកឧត្តម ហេង ណន រដ្ឋលេខាធិការ ក្រសួងសាធារណការ និងដឹកជញ្ជូន ទទួលជួបសម្តែងការគួរសម និងពិភាក្សាការងារជាមួយគណៈប្រតិភូកំពង់ផែ អាប៊ូដាប៊ី នៃប្រទេសអារ៉ាប់រួមអេមីរ៉េត ដឹកនាំដោយលោក Ghazi Masmoudi នាយកផ្នែកការអភិវឌ្ឍធុរកិច្ចអន្តរជាតិ ដោយមានការអញ្ជើញចូលពីថ្នាក់ដឹកនាំក្រសួង មន្ត្រីជំនាញពាក់ព័ន្ធផងដែរ។ ជំនួបនេះធ្វើឡើងក្នុងគោលបំណងដើម្បីសិក្សាស្វែងយល់ពីឱកាស ដ៏មានសក្កានុពលក្នុងការសហការ និងវិនិយោគលើវិស័យហេដ្ឋារចនាសម្ព័ន្ធ ដឹកជញ្ជូនតាមផ្លូវគោក ផ្លូវដែក ឃ្លាំងផ្ទុកទំនិញ ផ្លូវទឹក និងកំពង់ផែ នៅក្នុងប្រទេសកម្ពុជា។ ថ្លែងនាឱកាសនោះ ឯកឧត្តមរដ្ឋលេខាធិការ បានជម្រាបជូនអំពីផែនការមេគ្រប់ជ្រុងជ្រោយ ដែលជាការសំយោគបញ្ចូលគ្នានូវផែនការមេផ្លូវថ្នល់ ផែនការមេផ្លូវដែក ផែនការមេផ្លូវទឹក ផែនការមេកំពង់ផែ ផែនការមេផ្លូវអាកាស ផែនការមេឡូជីស្ទីក និងផែនការអន្តរមធ្យោបាយ ប្រកបដោយភាពប្រទាក់ក្រឡានៅក្នុងវិស័យដឹកជញ្ជូនផង ហើយស្របតាមយុទ្ធសាស្រ្តបញ្ចកោណដំណាក់កាលទី១ ដែលផែនការមេគ្រប់ជ្រុងជ្រោយនេះ នឹងជួយរួមចំណែកសម្រេចគោលដៅរបស់រាជរដ្ឋាភិបាល ក្នុងការប្រែក្លាយប្រទេសកម្ពុជាឱ្យមានចំណូលកម្រិតខ្ពស់នៅឆ្នាំ២០៥០៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube