កិច្ចប្រជុំពិនិត្យលើសេចក្ដីព្រាងប្រកាសស្ដីពីការគ្រប់គ្រងប្រព័ន្ធទឹកកខ្វក់ និងការកំណត់ស្តង់ដា បច្ចេកទេសសម្រាប់ប្រព័ន្ធទឹកកខ្វក់ ជាមួយក្រុមការងារទីភ្នាក់ងារសហប្រតិបត្តិការអន្តរជាតិជប៉ុន (JICA) ទីស្ដីការក្រសួង៖ ថ្ងៃសុក្រ ៧ រោច ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៣ ខែមករា ឆ្នាំ២០២៣ ឯកឧត្តម សួន ភារិទ្ធ អគ្គនាយក នៃអគ្គនាយកដ្ឋានប្រព័ន្ធចម្រោះទឹកកខ្វក់ បានអញ្ជើញដឹកនាំកិច្ចប្រជុំក្រុមការងារបច្ចេកទេសជាមួយក្រុមការងារទីភ្នាក់ងារJICA ដើម្បីពិនិត្យលើសេចក្ដីព្រាង ប្រកាសស្ដីពីការគ្រប់គ្រងប្រព័ន្ធទឹកកខ្វក់ និងការកំណត់ស្តង់ដាបច្ចេកទេសសម្រាប់ប្រព័ន្ធទឹកកខ្វក់ ដោយមានការចូលរួមពីមន្ត្រីជំនាញពាក់ព័ន្ធជាច្រើនរូប។ កិច្ចប្រជុំនេះធ្វើឡើងក្នុងគោលបំណងដើម្បីប្រមូលមតិយោបល់ ធាតុចូលបន្ថែមលើប្រការនីមួយៗក្នុងប្រកាស ក៏ដូចជាពិនិត្យលើការប្រើប្រាស់អត្ថន័យ អក្ខរាវិរុទ្ធ ធ្វើយ៉ាងណាឱ្យសេចក្ដីព្រាងប្រកាសនេះ អាចកំណត់បាននូវយន្តការ និងសមត្ថកិច្ចច្បាស់លាស់ក្នុងការអភិវឌ្ឍ គ្រប់គ្រង និងតភ្ជាប់ប្រព័ន្ធទឹកកខ្វក់បានត្រឹមត្រូវតាមស្តង់ដាបច្ចេកទេស សំដៅធានាធ្វើឱ្យប្រសើរឡើងនូវសុខុមាលភាពសាធារណៈ ព្រមទាំងរួមចំណែកដល់កិច្ចការពារបរិស្ថាន ប្រកបដោយចីរភាពផងដែរ។ អង្គប្រជុំក៏បានពិភាក្សា ផ្លាស់ប្តូរយោបល់យ៉ាងផុសផុលក្នុងស្មារតីយកចិត្តទុកដាក់ខ្ពស់សំដៅឱ្យការរៀបចំសេចក្តីព្រាងប្រកាសនេះមានសុក្រឹត្យភាពខ្ពស់ និងឈានដល់ការរៀបចំប្រគល់-ទទួល នៅថ្ងៃទី១៦ ខែកុម្ភៈ ឆ្នាំ២០២៣ នាពេលខាងមុខ។ ឆ្លៀតក្នុងឱកាសនោះដែរ ឯកឧត្តមអគ្គនាយក បានថ្លែងអំគុណយ៉ាងជ្រាលជ្រៅចំពោះក្រុមការងារ ទីភ្នាក់ងារJICA ក៏ដូចជាក្រុមការងារមន្ត្រីជំនាញទាំងអស់ ដែលបានខិតខំប្រឹងប្រែងសហការយ៉ាងជិតស្និទ្ធនាពេលកន្លងមកធ្វើឱ្យសេចក្ដីព្រាងប្រកាសនេះលេចចេញជារូបរាងឡើង៕