ស.ស.យ.ក វិស័យសាធារណការ និងដឹកជញ្ជូន បន្ដបើកវគ្គបណ្ដុះបណ្ដាលស្ដីពីសុវត្ថិភាពចរាចរណ៍ផ្លូវគោគ ដល់យុវជន ស.ស.យ.ក អន្តរវិស័យក្នុងខេត្តព្រះវិហារ ប្រមាណ១០០រូប ព្រះវិហារ៖ ថ្ងៃព្រហស្បតិ៍ ៧រោច ខែមិគសិរ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៥ ខែធ្នូ ឆ្នាំ២០២២ ក្រុមការងារ ស.ស.យ.ក វិស័យសាធារណការ និងដឹកជញ្ជូន សហការជាមួយ ស.ស.យ.ក ខេត្ត និងមន្ទីរសាធារណការ និងដឹកជញ្ជូនខេត្តព្រះវិហារ បន្ដបើកវគ្គបណ្តុះបណ្តាលស្តីពី សុវត្ថិភាពចរាចរណ៍ផ្លូវគោក ដល់សមាជិក សមាជិកា ជាយុវជន ស.ស.យ.ក. អន្ដរវិស័យក្នុងខេត្ត ប្រមាណចំនួន១០០រូប។ វគ្គបណ្តុះបណ្តាលនេះ ធ្វើឡើងក្នុងគោលបំណងអប់រំផ្សព្វផ្សាយស្តីពី សុវត្ថិភាពចរាចរណ៍ផ្លូវគោក ដើម្បីលើកកម្ពស់ការយល់ដឹងអំពីសុវត្ថិភាពចរាចរណ៍ផ្លូវគោក ដល់សមាជិក សមាជិកា ស.ស.យ.ក. និងដើម្បីយកចំណេះដឹងនេះទៅអប់រំ ផ្សព្វផ្សាយបន្តដល់យុវជន និងប្រជាពលរដ្ឋដទៃទៀត។ នៅក្នុងវគ្គបណ្ដុះបណ្ដាលនាឱកាសនោះដែរមានការធ្វើបទបង្ហាញដោយលើកយកប្រធានបទមួយចំនួនមកធ្វើការផ្សព្វផ្សាយដែលរួមមាន ស្ថានភាពទូទៅនៃគ្រោះថ្នាក់ចរាចរណ៍ផ្លូវគោក សុជីវធម៌ក្នុងការបើកបរ ការប្រើប្រាស់ល្បឿនក្នុងការបើកបរ សិទ្ធិអាទិភាពនៅត្រង់ផ្លូវប្រសព្វ ហានិភ័យនៃការបើកបរក្រោមឥទ្ធិពលនៃគ្រឿងស្រវឹង អត្ថប្រយោជន៍នៃមួកសុវត្ថិភាព ការត្រួតពិនិត្យទោចក្រយានយន្ត កម្មវិធីយល់ដឹងអំពីទ្រឹស្តីនៃការបើកបរលើទូរស័ព្ទដៃ (Cambodia Driving Rules) និងកម្មវិធីថែទាំផ្លូវ (Road Care Mobile App)ផងដែរ៕