កិច្ចប្រជុំជាមួយវេទិកាដឹកជញ្ជូនអន្តរជាតិ (ITF) ដើម្បីពិភាក្សាលើការត្រៀមរៀបចំព្រឹត្តិការណ៍សម្ពោធកម្មវិធីហេដ្ឋារចនាសម្ព័ន្ធប្រកបដោយនិរន្តរភាពក្នុងតំបន់អាស៊ី (SIPA) ដែលនឹងប្រព្រឹត្តទៅនៅកម្ពុជា ទីស្ដីការក្រសួង៖ ថ្ងៃព្រហស្បតិ៍ ៧រោច ខែមិគសិរ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៥ ខែធ្នូ ឆ្នាំ២០២២ ឯកឧត្តម ឈៀង ពេជ្រ អគ្គនាយក នៃអគ្គនាយកដ្ឋានភស្តុភារកម្ម នៃក្រសួងសាធារណការ និងដឹកជញ្ជូន បានអញ្ជើញដឹកនាំក្រុមការងារ និងមន្ត្រីជំនាញរបស់ក្រសួង ជួបពិភាក្សាជាមួយវេទិកាដឹកជញ្ជូនអន្តរជាតិ (ITF) ដើម្បីពិភាក្សាលើការត្រៀមរៀបចំព្រឹត្តិការណ៍សម្ពោធកម្មវិធីហេដ្ឋារចនាសម្ព័ន្ធប្រកបដោយនិរន្តរភាពក្នុងតំបន់អាស៊ី (SIPA) ដែលគ្រោងនឹងប្រព្រឹត្តទៅនៅក្នុងប្រទេសកម្ពុជា។  កិច្ចប្រជុំនេះរៀបចំឡើងក្នុងគោលបំណងឱ្យក្រុមការងារអាចស្វែងយល់បន្ថែមពីវេទិកាដឹកជញ្ជូនអន្តរជាតិ (ITF) និងកម្មវិធីហេដ្ឋារចនាសម្ព័ន្ធប្រកបដោយនិរន្តរភាពក្នុងតំបន់អាស៊ី (SIPA) ដើម្បីអនុញ្ញតឱ្យក្រុមការងារទាំងមូលអាចត្រៀមខ្លួនបានរួចរាល់ក្នុងការចាត់តាំងមន្ត្រីបង្គោលធ្វើការសម្របសម្រួលក្នុងពិធីសម្ពោធគម្រោង (SIPA) ដែលគ្រោងនឹងប្រព្រឹត្តទៅនៅខែមេសា ឆ្នាំ២០២៣ ខាងមុខនេះ អាចប្រព្រឹត្តទៅបានយ៉ាងរលូន និងប្រកបដោយប្រសិទ្ធភាព។  សូមជម្រាបថា៖ កម្មវិធីហេដ្ឋារចនាសម្ព័ន្ធប្រកបដោយនិរន្តរភាពក្នុងតំបន់អាស៊ី ហៅកាត់ថា SIPA នេះ គឺជាកម្មវិធីគាំទ្រដល់ការអភិវឌ្ឍប្រកបដោយនិរន្តរភាពនៃហេដ្ឋារចនាសម្ព័ន្ធដឹកជញ្ជូន ដើម្បីតភ្ជាប់ទំនាក់ទំនងរវាងអាស៊ីកណ្តាល និងអាស៊ីអាគ្នេយ៍ឱ្យកាន់តែប្រសើរឡើងជាមួយនឹងទីផ្សារពិភពលោក ក៏ដូចជាលើកកម្ពស់លទ្ធភាពរបស់ប្រជាពលរដ្ឋក្នុងការទទួលបានសេវាសាធារណៈ ដែលមានការគិតគូរដល់បរិស្ថាន៕