(ប៉ៃលិន)៖ កំណាត់ផ្លូវជាច្រើនកន្លែងស្ថិតក្នុងភូមិអណ្តូងពីរ ឃុំស្ទឹងកាច់ ស្រុកសាលាក្រៅ ខេត្តប៉ៃលិន បានទទួលរងការខូចខាតក្លាយទៅជាជង្ហុកតូច-ធំ បង្កឱ្យមានការលំបាកក្នុងការធ្វើដំណើរ ចេញចូលទៅមករបស់ប្រជាពលរដ្ឋ ជាពិសេសលំបាកឱ្យសិស្សានុសិស្សធ្វើដំណើរទៅរៀនសូត្រផងដែរ។ បើតាមប្រជាពលរដ្ឋរស់នៅក្នុងនេះបានឱ្យដឹងថា ៖ ក្រោយពីមានការភ្លៀងធ្លាក់ខ្លាំងជោកជាំរាល់ថ្ងៃ បង្កទៅជាជំនន់ទឹកភ្លៀង ហើយក៏ហូរកាត់ផ្លូវខាងលើ បណ្តាលឱ្យដាច់ជាអន្លើ ក៏ក្លាយទៅជាជង្ហុកតូច-ធំ ក្នុងអំឡុងដីសើមផងដែរ។ ប្រភពបន្តទៀតថា ពេលនេះ រថយន្តតូចៗហើយទាប មានការលំបាកធ្វើដំណើរតាមផ្លូវមួយនេះ គឺបើកបរបានតែរថយន្តខ្ពស់ៗប៉ុណ្ណោះ ហើយពេលបើកបរម៉ូតូឆ្លងកាត់ក៏មានការរអិល ដោយសារតែទឹកជំនន់ទឹកភ្លៀងហូរក្រួសផ្នែកខាងលើទៅអស់នៅសល់តែដីបាតក្រោម លុះដក់ទឹកយូរៗទៅក៏ក្លាយជាទន់ជ្រាយ បែកភក់តែម្តង។ លោក ហ៊ត រិទ្ធី ប្រធានមន្ទីរអភិវឌ្ឍន៍ជនបទខេត្តប៉ៃលិន បានឱ្យដឹងនៅព្រឹកមិញនេះថ្ងៃទី១២​ ខែ​តុលា​ឆ្នាំ​២០២២ថា​ ផ្លូវខាងលើនេះគឺក្នុងគម្រោងជួសជុល និងស្ថាបនាចាក់កៅស៊ូ នៅចុងឆ្នាំ២០២២នេះ ដោយកំពង់សិក្សា និងធ្វើលទ្ធកម្ម ដែលទទួលបានថវិការគម្រោងធនាគាររបស់ប្រទេសចិន AIIB ។ មូលហេតុដែលផ្លូវនេះទៅជាបែបនេះកឺដោយសារមន្ទីរមិនបានថែទាំរយៈពេល២ឆ្នាំមកហើយ ដោយសារនៅជុំវិញផ្លូវនោះមានផ្លូវផ្សេងដែលអាចចរាចរបាន។ ទោះបីជាយ៉ាងណាក៏ដោយ អាជ្ញាធរខេត្ត នឹងធ្វើការជួសជុលសម្រាប់ពួកគាត់អាចឱ្យងាយស្រួលក្នុងការធ្វើដំណើរចេញចូលក្នុងផ្ទះ ឬជូនកូនចៅទៅសាលារៀនផងដែរ៕