ភ្នំពេញ​: លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួង​សាធារណការ និង​ដឹកជញ្ជូន បាន​ណែនាំ អំពី​គម្រោង​សំខាន់ៗ ប្រមាណ ៣៣០ គម្រោង ទៅដល់​គណៈប្រតិភូ ការិយាល័យ​សេដ្ឋកិច្ច ពាណិជ្ជកម្ម ហុងកុង​។​ ​នៅក្នុង​ជំនួប កាលពី​ថ្ងៃទី​១៦ មិថុន កន្លងទៅ នៅ​ទីស្ដីការក្រសួង​សាធារណការ លោក​ទេសរដ្ឋមន្ត្រី បានលើកឡើង​ថាៈ ក្រសួង​មាន​គម្រោង​សំខាន់ៗ ប្រមាណ ៣៣០ គម្រោង ត្រូវការ​ទុនវិនិយោគ ប្រមាណ ៥០ ពាន់​លាន​ដុល្លារ ក្នុង​រយៈពេល​១០​ឆ្នាំ​។ គម្រោង​ទាំងនេះ ស្ថិតនៅក្នុង​ផែនការមេ​ភស្តុភា​រកម្ម ដើម្បី​ចូលរួមចំណែក ក្នុងការ​បង្កើន​ឧត្តមភាព ប្រកួតប្រជែង​វិស័យ​ភស្តុភា​រកម្ម និង​ការដឹកជញ្ជូន​របស់​ក​ម្ពុ​ជា​។​ ​លោក ស៊ុន ចាន់ថុល រំពឹងថាៈ លោក Sheung Yuen Lee ប្រធាន​គណៈប្រតិភូ​ការិយាល័យ សេដ្ឋកិច្ច និង​ពាណិជ្ជកម្ម ហុងកុង ប្រចាំ​ទីក្រុង​បាងកក ប្រទេស​ថៃ នឹង​ពិចារណា​លើ​ការ អភិវឌ្ឍ គម្រោង​សំខាន់ៗ ជាង ៣៣០ គម្រោង​នេះ​។​ ​គួរ​បញ្ជាក់ថា ក្នុងជំនួប​នេះ គណៈប្រតិភូ​ការិយាល័យ​សេដ្ឋកិច្ច និង​ពាណិជ្ជកម្ម​ហុងកុង មាន​គោលបំណង​ស្វែងយល់​ឱ្យបាន​ច្បាស់ អំពី​ការអភិវឌ្ឍ​ហេដ្ឋារចនាសម្ព័ន្ធ របស់ ប្រទេស​កម្ពុជា ក៏ដូចជា​ដើម្បី​វាយតម្លៃ អំពី​កាលានុវត្តភាព​ពាណិជ្ជក​ម្ម និង​ការវិនិយោគ ឱ្យបាន​ទូលំទូលាយ នៅ​កម្ពុជា​ផងដែរ​៕