ឯកឧត្តម វ៉ាស៊ឹម សុរិយា អនុរដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំប្រចាំខែលើកទី១០ ប្រចាំខែមេសា និងខែឧសភា នៃគម្រោងកែលម្អប្រព័ន្ធភស្តុភារកម្មនៅកម្ពុជា ដំណាក់កាលទី២ តាមប្រព័ន្ធវីដេអូពីចម្ងាយ កាលពីថ្ងៃ៩រោច ខែពិសាខ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃអង្គារ ទី២៤ ខែឧសភា ឆ្នាំ២០២២ នៅទីស្ដីការក្រសួង ដោយមានការចូលរួមពីក្រុមការងារពាក់ព័ន្ធនៃគម្រោង និងជំនាញការនៃទីភ្នាក់ងារសហប្រតិបត្តិការអន្តរជាតិជប៉ុន (JICA)។ នៅក្នុងឱកាសនោះ ឯកឧត្តមអនុរដ្ឋលេខាធិការ បានស្នើឱ្យក្រុមការងារទាំងអស់ ពិសេសក្រុមការងារធ្វើឱ្យប្រសើរឡើងច្រកទ្វារព្រំដែនស្ទឹងបត់ បន្តតាមដានវឌ្ឍនភាពគម្រោងស្ថានីយស្ទឹងបត់ សហការជាមួយទីភ្នាក់ងារ JICA រៀបចំកិច្ចប្រជុំអនឡាញជាមួយភាគីថៃពាក់ព័ន្ធ។ ជាពិសេសនាយកដ្ឋានគយស្រុកអារញ្ញប្រាថេត ដើម្បីបន្តជជែករៀបចំការបើកបណ្តោះអាសន្នច្រកទ្វារស្ទឹងបត់-បានណងអៀន ដោយមានប្រសាសន៍ថា ការងារនេះគួរពិភាក្សា និងសហការជាមួយគណៈអភិបាលខេត្តបន្ទាយមានជ័យ និងក្រសួងស្ថាប័នពាក់ព័ន្ធ និង អញ្ជើញចូលរួមប្រជុំ និងបានស្នើឱ្យក្រុមការងារបន្តទំនាក់ទំនង និងសហការជាមួយស្ថាប័នពាក់ព័ន្ធ និងរដ្ឋបាលខេត្តស្វាយរៀង ជំរុញការអនុវត្តគម្រោងដែលមានស្រាប់ និងជួបពិភាក្សាអំពីតម្រូវការ ក្នុងការធ្វើឱ្យប្រសើរឡើងច្រកទ្វារព្រំដែនបាវិត និងស្នើពិចារណាជំរុញការរៀបចំច្រកទ្វារព្រំដែនថ្មី និងចំណុចតភ្ជាប់ផ្លូវល្បឿនលឿន ដែលភាគីទាំងពីរកម្ពុជា និងវៀតណាម បានចុះហត្ថលេខាលើអនុស្សរណយោគយល់ (MOU)ឆ្នាំ២០១៦ កន្លងទៅ។ ទន្ទឹមនឹងនេះ ឯកឧត្តមអនុរដ្ឋលេខាធិការ បានមានប្រសាសន៍កោតសរសើរចំពោះក្រុមប្រតិបត្តិការងារ នៃគណៈកម្មការគ្រប់គ្រងគម្រោង (PMU) និងក្រុមអ្នកជំនាញការទីប្រឹក្សាទីភ្នាក់ងារ JICA ដែលបានខិតខំប្រឹងប្រែងសម្រេចលទ្ធផល ការងារជាវិជ្ជមានក្នុងការអនុវត្តការងារពាក់ព័ន្ធ និងដែលបានអនុវត្តគម្រោងដោយរលូន ប្រកបដោយវឌ្ឍនភាព និងបញ្ចប់តាមផែនការគ្រោងទុក។ សូមបញ្ជាក់ថា កិច្ចប្រជុំនេះធ្វើឡើងដើម្បីពិនិត្យវឌ្ឍនភាព នៃការអនុវត្តគម្រោង ទិសដៅ សកម្មភាពដែលត្រូវអនុវត្តបន្ត នៅខែបន្ទាប់ បញ្ហាប្រឈមនានា សំណូមពរ និងដំណោះស្រាយ និងដើម្បីពិភាក្សាទៅលើលទ្ធផលរំពឹងទុកចំនួន ៦រួមមាន៖ (១) ការតាមដានត្រួតពិនិត្យ និងរៀបចំផែនការមេស្តីពីពហុមធ្យោបាយ និងភស្តុភារ កម្មកម្ពុជា។ (២) ការរៀបចំរបាយការណ៍ឆ្នាំ និងសិក្ខាសាលាផ្សព្វផ្សាយ។ (៣) ការរៀបចំគោលនយោបាយ ជាតិ និងផែនការសកម្មភាពអនុវិស័យមួយចំនួន (ផែនការសកម្មភាពដឹកជញ្ជូន ស្តីពីការផ្លាស់ប្តូរអាកាសធាតុ ភស្តុភារកម្មបៃតង ប្រព័ន្ធត្រជាក់ គោលការណ៍ណែនាំរៀបចំមជ្ឈ មណ្ឌលភស្តុភារកម្មតំបន់ ទំនើបកម្មរថយន្តដឹកទំនិញ) ។ (៤) ការត្រួតពិនិត្យ និងតាមដានគម្រោងភស្តុភារកម្ម និងការប្រមូលវិភាគទិន្នន័យ។ (៥) ការរៀបចំវែបសាយ និងទស្សនកិច្ចសិក្សា ភស្តុភារកម្មឆ្លងកាត់ព្រំដែន ។ (៦) ការធ្វើឱ្យប្រសើរឡើងការដឹកជញ្ជូនឆ្លងកាត់ព្រំដែន៕ ដោយ ទេស ច័ន្ទសុធារី (ប្រភព៖ ក្រសួងសាធារណការ និងដឹកជញ្ជូន) សម្រួលផ្សាយដោយ៖ ធូ កុសល