[Moneaksekar] - ក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តនៅតំបន់អ្នកលឿងត្រើយខាងកើត កំពុងសប្បាយប្រមូលលុយតាមរបៀបពុករលួយ
2018-03-26
ទៅកាន់ទំព័រចុះផ្សាយក្នុង Moneaksekar
មន្ត្រីអាជ្ញាធរនិងប្រជាពលរដ្ឋរស់នៅតំបន់អ្នកលឿងត្រើយខាងកើត បានឲ្យដឹងថា ក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តនៅអ្នកលឿងត្រើយខាងកើត កំពុងសប្បាយប្រមូលលុយតាមរបៀបពុករលួយដោយគ្មានខ្លាចក្រែងអ្វីទាំងអស់។ ក្នុងមួយថ្ងៃៗមានឈ្មួញដឹកជញ្ជូនទំនិញតាមរថយន្តធំៗពីច្រកព្រំដែនក្នុងខេត្តស្វាយរៀង និងខេត្តព្រៃវែង ឆ្លងកាត់ផ្លូវជាតិលេខ១ ឆ្លងកាត់ស្ថានីយ៍ជញ្ជីងថ្លឹងរថយន្តអ្នកលឿងត្រើយខាងកើត ហើយភាគច្រើននៃរថយន្តទាំងនោះផ្ទុកទំនិញលើសទម្ងន់។ ប៉ុន្តែមន្ត្រីប្រចាំស្ថានីយ៍ថ្លឹងរថយន្តអ្នកលឿងត្រើយខាងកើត មិនចាត់វិធានការទៅលើម្ចាស់រថយន្តធំៗដឹកទំនិញលើសទម្ងន់នោះទេ គឺនាំគ្នាចាំរាប់ក្បាលរថយន្តដឹកទំនិញយកលុយយ៉ាងរីករាយ។
មន្ត្រីអាជ្ញាធរនិងសមត្ថកិច្ចមូលដ្ឋានក្នុងស្រុកពាមរក៍ តំបន់អ្នកលឿងត្រើយខាងកើត បានឲ្យដឹងថា ក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តនៅចំណុចគល់ស្ពានអ្នកលឿងត្រើយខាងកើត មិនទប់ស្កាត់រថយន្តធំៗវែងៗដែលខុសបទដ្ឋានបច្ចេកទេសនោះទេ។ ប្រការនេះហើយដែលធ្វើឲ្យផ្លូវជាតិលេខ១ ក៏ដូចជាស្ពានអ្នកលឿង រងការខូចខាតនិងទ្រុឌទ្រោមជាបន្តបន្ទាប់ដោយសាររថយន្តធំៗដឹកទំនិញឆ្លងកាត់យ៉ាងគគ្រឹកគគ្រេងទាំងយប់ទាំងថ្ងៃ។ ប្រធានស្ថានីយ៍ជញ្ជីងថ្លឹងរថយន្តនៅចំណុចគល់ស្ពានអ្នកលឿងត្រើយខាងកើត ត្រូវប្រជាពលរដ្ឋនិងមជ្ឈដ្ឋាននានារិះគន់ថា គិតតែពីរឿងប្រមូលលុយដាក់ហោប៉ៅហើយបណ្ដោយឲ្យរថយន្តធំៗវែងៗដឹកទំនិញលើសទម្ងន់ឆ្លងកាត់ស្ពានអ្នកលឿងយ៉ាងពេញបន្ទុកតែម្តង។ តាមប្រភពពីឈ្មួញមួយចំនួនបានឲ្យដឹងថា ពួកគេអាចដឹកទំនិញតាមរថយន្តធំៗសណ្ដោងកន្ទុយវែងៗឆ្លងកាត់ស្ពានអ្នកលឿង ទាំងយប់ទាំងថ្ងៃដោយគ្រាន់តែបង់លុយឲ្យមន្ត្រីប្រចាំស្ថានីយ៍ជញ្ជីងថ្លឹងរថយន្តគឺជាការស្រេច។
ប្រធានមន្ទីរសាធារណការនិងដឹកជញ្ជូនខេត្តព្រៃវែង កំពុងប្រឈមនឹងការរិះគន់ថា គឺជាអ្នកឃុបឃិតបើកដៃឲ្យក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តចំណុចគល់ស្ពានអ្នកលឿងត្រើយខាងកើត ធ្វើអ្វីៗតាមអំពើចិត្តហើយមានការបែងចែកផលប្រយោជន៍យ៉ាងរលូន។ ហេតុនេះលោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន មិនគួរមើលរំលងតទៅទៀតទេព្រោះបច្ចុប្បន្នរថយន្តដឹកទំនិញធំៗផ្ទុកលើសទម្ងន់ពីច្រកព្រំដែនក្នុងខេត្តស្វាយរៀង និងខេត្តព្រៃវែង អាចបើកបរឆ្លងកាត់ផ្លូវជាតិលេខ១ និងស្ពានអ្នកលឿងយ៉ាងអនាធិបតេយ្យ ព្រោះមន្ត្រីប្រចាំស្ថានីយ៍ជញ្ជីងថ្លឹងរថយន្តនៅចំណុចគល់ស្ពានអ្នកលឿងត្រើយខាងកើត គិតតែពីរឿងប្រមូលលុយដាក់ហោប៉ៅយ៉ាងសុខស្រួល។ មជ្ឈដ្ឋាននានាបានលើកឡើងថា ប្រសិនបើបណ្ដែតបណ្ដោយឲ្យរថយន្តធំៗដឹកទំនិញលើសទម្ងន់បើកបរឆ្លងកាត់ស្ពានអ្នកលឿងតទៅទៀត គឺស្ពាននេះត្រូវទ្រុឌទ្រោមយ៉ាងឆាប់រហ័ស ហើយក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តនៅចំណុចគល់ស្ពានអ្នកលឿងត្រើយខាងកើត ជាអ្នកទទួលខុសត្រូវធំជាងគេចំពោះការខូចខាតស្ពានមួយនេះ៕
