[Koh Santepheap Daily] - ឯកឧត្តម ស៊ុន ចាន់ថុល ៖ ឡានប្រើអគ្គិសនីចំណាយអស់តិច គឺ១គីឡូម៉ែត្រថោកជាង៣ដងឡានប្រើប្រេងឥន្ធនៈ
រាជធានីភ្នំពេញ ៖ រដ្ឋមន្ត្រីក្រសួងសាធារណការ និងដឹកជញ្ជូនបានថ្លែងអះអាងថា ការប្រើប្រាស់រថយន្តអគ្គិសនីដែលហៅកាត់ថា (EV) គឺជួយកាត់បន្ថយការចំណាយយ៉ាងច្រើនសម្រាប់អ្នកប្រើប្រាស់ដោយសារតែវាចំណាយត្រឹមចន្លោះ ៣ ទៅ ៤ ដុល្លារតែប៉ុណ្ណោះសម្រាប់ការបើកបររយៈចម្ងាយ១០០ គីឡូម៉ែត្រ ។
ទន្ទឹមនឹងនោះ ឯកឧត្តម ស៊ុន ចាន់ថុល ទេសរដ្ឋមន្ដ្រី រដ្ឋមន្ត្រី ក្រសួងសាធារណការ និងដឹកជញ្ជូន បានបង្ហាញជំនឿយ៉ាងមុតមាំថា ការប្រើប្រាស់យានយន្ដដើរដោយថាមពលអគ្គិសនី នឹងមានការកើនឡើង នាពេលអនាគត ព្រោះថាកំណើននៃការចុះបញ្ជីយានយន្តអគ្គិសនីចំនួន៧០០% ក្នុងរយៈពេល៣ខែដំបូង ឆ្នាំ២០២២ ។
ក្នុងពិធីសម្ពោធបើកឲ្យដំណើរការស្ថានីយប្រេងឥន្ធនៈកាល់តិចទី៥០ និងស្ថានីយបញ្ចូលថាមពលយានយន្តអគ្គិសនីនៅសង្កាត់ព្រៃស ខណ្ឌដង្កោ រាជធានីភ្នំពេញ នាថ្ងៃទី២៦ ខែមេសា ឆ្នាំ២០២២ ឯឧត្តមទេសរដ្ឋមន្ត្រីបានឲ្យដឹងថា ក្រសួងក៏មានបំណងបង្កើតគណៈកម្មាធិការអន្តរក្រសួង ដើម្បីសិក្សាបន្ថែម និងអភិវឌ្ឍន៍គោលនយោបាយជាតិទូលំទូលាយមួយ ស្ដីពីយានយន្តអគ្គិសនី ហើយបច្ចុប្បន្ននេះអង្គការ UNDP កំពុងជួយជ្រោមជ្រែងដល់ក្រសួងក្នុងការបង្កើតផែនទីបង្ហាញផ្លូវសម្រាប់ការដំឡើងស្ថានីយសាកថ្មយានយន្តអគ្គិសនីនៅទូទាំងប្រទេស ។
ជាមួយគ្នានោះដែរ ឯកឧត្តម បានគូសបញ្ជាក់ថា «កំណើននៃការចុះបញ្ជីយានយន្តអគ្គិសនីចំនួន៧០០% ក្នុងរយៈពេល ៣ខែដំបូង ឆ្នាំ២០២២ ប្រៀបធៀបនឹងរយៈពេលដូចគ្នា ឆ្នាំ២០២១ ។ ខ្ញុំជំនឿយ៉ាងមុតមាំថា ការប្រើប្រាស់យានយន្ដ ម៉ូតូ និងម៉ូតូកង់បីដើរដោយថាមពលអគ្គិសនីនឹងមានការកើនឡើងច្រើននៅក្នុងពេលអនាគតនៅពេលដែលហេដ្ឋារចនាសម្ព័ន្ធបញ្ចូលថាមពលអគ្គិសនីត្រូវបានដំឡើងយ៉ាងទូលំទូលាយនៅទូទាំងប្រទេស ហើយប្រជាពលរដ្ឋកម្ពុជាមានការយល់ដឹងច្រើនអំពីអត្ថប្រយោជន៍ផ្ទាល់ខ្លួនលើការប្រើប្រាស់យានយន្ដអគ្គិសនី» ។
ឯកឧត្តមបានបន្ថែមថា ដើម្បីជំរុញឲ្យមានការប្រើប្រាស់យានយន្តអគ្គិសនីបន្ថែមទៀត ក្រសួងបានធ្វើការជាមួយក្រុមហ៊ុន Energy Lab និងក្រុមហ៊ុនGIZ ដើម្បីដាក់តាំងបង្ហាញយានយន្ត និងម៉ូតូអគ្គិសនីនៅចំណតយានយន្តទីស្ដីការក្រសួង និងបានបើកសម្ពោធឲ្យប្រើប្រាស់ស្ថានីយសាកថ្មយានយន្តអគ្គិសនីលើកដំបូងដែលផ្ដល់ដោយអង្គការ UNDP នៅទីស្តីការក្រសួង នៅថ្ងៃទី២៦ ខែមីនា ឆ្នាំ២០២២ ហើយក្រសួងនឹងសម្ពោធដាក់ឲ្យប្រើប្រាស់ស្ថានីយសាកថ្មយានយន្តអគ្គិសនីលើកទី២ ដែលផ្ដល់ដោយអង្គការ UNDP នៅក្នុងក្រុងព្រះសីហនុនៅព្រឹកថ្ងៃស្អែក ។
ឯកឧត្តមទេសរដ្ឋមន្ដ្រី ក៏បានថ្លែងអំណរគុណចំពោះដៃគូអភិវឌ្ឍន៍ទាំងអស់ ជាពិសេសអាមេរិក ដែលជាដៃគូពាណិជ្ជកម្មដ៏ធំរបស់កម្ពុជា និងបានជំរុញលើកទឹកចិត្តឲ្យក្រុមហ៊ុនរបស់អាមេរិកជាច្រើនបន្ថែមទៀត មកវិនិយោគនៅកម្ពុជា ដើម្បីកសាងអនាគតកម្ពុជាកាន់តែភ្លឺស្វាងបន្ថែមទៀត ។
ជាមួយគ្នានោះដែរ ឯកឧត្តម រដ្ឋមន្ដ្រីសាធារណការ សំណូមពរពលរដ្ឋប្ដូរ ឬពន្យារបណ្ណបើកបររបស់ខ្លួន ឲ្យស្របតាមច្បាប់ ជៀសវាងផាកពិន័យ ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូន បានសំណូមពរប្រជាពលរដ្ឋ មានបណ្ណបើកបរផុតសុពលភាពមកប្ដូរ ឬពន្យារបណ្ណបើកបររបស់ខ្លួនឲ្យស្របតាមច្បាប់ ជៀសវាងការផាកពិន័យ ។
ឯកឧត្តម បានគូសបញ្ជាក់ពីសារសំខាន់នៃការប្រើប្រាស់ប្រព័ន្ធបច្ចេកវិទ្យាឌីជីថល សម្រួលដល់ការផ្តល់សេវាសាធារណៈ ប្រកបដោយតម្លាភាព ប្រសិទ្ធភាព និងគណនេយ្យភាពក្នុងការធ្វើកំណែទម្រង់ និងការអភិវឌ្ឍសេដ្ឋកិច្ចសង្គមជាតិ និងជំរុញការផ្តល់សេវាសាធារណៈឲ្យកាន់តែប្រសើរកាន់តែទូលាយ និងកាន់តែជិតស្របតាមតម្រូវការរបស់ប្រជាពលរដ្ឋ ។
ឯកឧត្តមបញ្ជាក់ថា «សំណូមពរទៅបងប្អូនប្រជាពលរដ្ឋជាអ្នកបើកបរ ដែលមានបណ្ណបើកបរផុតសុពលភាពមិនទាន់យកមកប្តូរ ឬពន្យារបណ្ណបើកបរ សូមមកប្ដូរ ឬពន្យារបណ្ណបើកបររបស់ខ្លួនឲ្យស្របច្បាប់ ដើម្បីជៀសវាងការផាកពិន័យនៅពេលបើកបរនៅតាមផ្លូវ» ។
ឯកឧត្តមបន្ដថា ម្យ៉ាងវិញទៀត ក្រសួងសាធារណការ និងដឹកជញ្ជូន បានបង្កើតមណ្ឌលផ្ដល់សេវាប្រភេទនេះ នៅក្នុងទីស្តីការក្រសួង និងតាមផ្សារទំនើបនានា គ្រាន់តែចំណាយពេលត្រឹមតែ ១៥នាទីប៉ុណ្ណោះ សម្រាប់សេវាប្ដូរ ឬពន្យារបណ្ណបើកបរ ។
ឆ្លៀតឱកាសនោះ ឯកឧត្តមទេសរដ្ឋមន្ដ្រី ក៏បានលើកឡើងអំពី គម្រោងដំឡើងស្ថានីយបញ្ចូលថាមពលរថយន្តអគ្គិសនីនៅទីតាំងមួយចំនួនតាមបណ្តារាជធានីខេត្ត ដើម្បីជំរុញលើកទឹកចិត្ត និងទាក់ទាញការចាប់អារម្មណ៍ឲ្យមានការប្រើប្រាស់យានយន្តអគ្គសនីពីសំណាក់សាធារណៈទូទៅ និងកិច្ចសហការជាមួយក្រុមហ៊ុននានា ដើម្បីជំរុញការដំឡើងស្ថានីយបញ្ចូលថាមពល អគ្គិសនីឲ្យបានច្រើនថែមទៀត ៕
