ពិធីបិទសន្និបាតបូកសរុបលទ្ធផលការងារឆ្នាំ២០២១ និងលើកទិសដៅការងារឆ្នាំ២០២២ របស់មន្ទីរ សាធារណការ និងដឹកជញ្ជូនខេត្តកណ្ដាល បានប្រព្រឹត្តទៅក្រោមអធិបតីភាពឯកឧត្តមរដ្ឋលេខាធិការ ប៉ាល់ ចន្ទតារា តំណាងដ៏ខ្ពង់ខ្ពស់ឯកឧត្តម ទេសរដ្ឋមន្ត្រី ស៊ុន ចាន់ថុល កណ្តាល៖ ថ្ងៃសុក្រ ៧កើត ខែចេត្រ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី០៨ ខែមេសា ឆ្នាំ២០២២ ឯកឧត្តម ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ឯកឧត្តម ទេសរដ្ឋមន្ត្រី ស៊ុន ចាន់ថុល បានអញ្ជើញជាអធិបតីក្នុងពិធីបិទសន្និបាតបូកសរុបលទ្ធផល ការងារឆ្នាំ ២០២១ និងលើកទិសដៅការងារឆ្នាំ២០២២ របស់មន្ទីរសាធារណការ និងដឹកជញ្ជូនខេត្តកណ្ដាល ដោយ មានការចូលរួមពីថ្នាក់ដឹកនាំក្រសួង មន្ត្រីរាជការ បុគ្គលិក និយោជិកជុំវិញមន្ទីរផងដែរ។ ថ្លែងក្នុងមតិសំណេះសំណាលទៅកាន់អង្គពិធីនាឱកាសនោះ ឯកឧត្តមរដ្ឋលេខាធិការ បានសំដែងនូវការ កោតសរសើរ និងវាយតម្លៃខ្ពស់ចំពោះមន្ទីរសាធារណការ និងដឹកជញ្ជូនខេត្តកណ្ដាល ដែលសម្រេចបាន នូវសមិទ្ធផលជាច្រើនរួមមានជាអាទិ៍៖ ការសាងសង់ និងស្ដារឡើងវិញនូវហេដ្ឋារចនាសម្ព័ន្ធផ្លូវថ្នល់ ផ្លូវជាតិ ផ្លូវខេត្តចំនួន៦ខ្សែរួមមាន៖ ផ្លូវជាតិលេខ២១អា ផ្លូវលេខ៤២ ផ្លូវលេខ១២១១ ផ្លូវលេខ១KD៩ ផ្លូវលេខ១១០ ផ្លូវលេខ២៦១៨ ប្រវែងសរុប១៥,៩១ គីឡូម៉ែត្រ និងជួសជុលស្ដារឡើងវិញហេដ្ឋារចនា សម្ព័ន្ធផ្លូវក្នុងក្រុងតាខ្មៅដែលខូចខាតដោយជំនន់ទឹកភ្លៀងឆ្នាំ២០២០។ ជាមួយគ្នានេះផងដែរ ឯកឧត្តមរដ្ឋលេខាធិការបានជំរុញលើកទឹកចិត្តឱ្យមន្ទីរសាធារណការ និងដឹកជញ្ជូន ខេត្តកណ្ដាល ខិតខំដោះស្រាយបញ្ហាប្រឈម និងពន្លឿនការងារមួយចំនួនដែលមានសារៈសំខាន់ជា យុទ្ធសាស្ត្រសម្រាប់ការចូលរួមស្ដារ និងជំរុញកំណើនសេដ្ឋកិច្ចជាតិឱ្យចប់សព្វគ្រប់ និងទាន់ពេលវេលា ទោះបីជាកំពុងប្រឈមនឹងវិបត្តិជំងឺកូវី-១៩ បង្អាក់ដំណើរការការងារសំខាន់ៗរបស់យើងក៏ដោយ។ ឯកឧត្តមរដ្ឋលេខាធិការ បានណែនាំឱ្យមន្ទីរសាធារណការ និងដឹកជញ្ជូនយកចិត្តទុកដាក់ខ្ពស់ថែមទៀត លើការបន្តជំរុញការបណ្តុះបណ្តាលអភិវឌ្ឍធនធានមនុស្ស វគ្គជំនាញបច្ចេកទេស ខិតខំបន្តកិច្ចសហការ ល្អជាមួយអាជ្ញាធរមូលដ្ឋាន ផ្សព្វផ្សាយច្បាប់ និងលិខិតបទដ្ឋានគតិយុត្តនានាពាក់ព័ន្ធនឹងវិស័យ សាធារណការ និងដឹកជញ្ជូន ស្របតាមអនុសាសន៍ដឹកនាំដ៏ខ្ពង់ខ្ពស់របស់ឯកឧត្តមទេសរដ្ឋមន្ត្រី អំពីការប្រែក្លាយការគំរាមកំហែងនានា ជាពិសេសវិបត្តិនៃជំងឺកូវីដ-១៩ ឱ្យទៅជាកាលានុវត្តភាព សម្រាប់ការដ្ឋាននៃការកែទម្រង់។ ឆ្លៀតក្នុងឱកាសនោះដែរ ឯកឧត្តមរដ្ឋលេខាធិការបានគូសបញ្ជាក់ផងដែរអំពីសារៈសំខាន់ជាអាទិភាពនៃ វិស័យសាធារណការ និងដឹកជញ្ជូនសម្រាប់ជំរុញកំណើនសង្គមសេដ្ឋកិច្ច និងធ្វើឱ្យប្រសើរឡើងនូវជីវភាព រស់នៅរបស់ ប្រជាពលរដ្ឋតាមគន្លងប្រក្រតីភាពថ្មី និងបានសម្ដែងការគាំទ្រពេញទំហឹងចំពោះទិសដៅការងារ ឆ្នាំ២០២២របស់មន្ទីរសាធារណការ និងដឹកជញ្ជូនខេត្តកណ្ដាល ហើយមានជំនឿយ៉ាងមុតមាំថា៖ ជាមួយ នឹងស្មារតីទទួលខុសត្រូវរួម និងភាពជាក្រុមក្នុងការបំពេញការងាររបស់ថ្នាក់ដឹកនាំ និងមន្ត្រីរាជការ បុគ្គលិកនៃ មន្ទីរសាធារណការ និងដឹកជញ្ជូនខេត្តកណ្ដាល និងក្រោមការដឹកនាំប្រកបដោយភាពឈ្លាស វៃរបស់លោកប្រធានមន្ទីរ ទិសដៅការងារឆ្នាំ២០២២នេះនឹងទទួលបានលទ្ធផលគួរជាទីមោទនៈ៕